IND vs PAK Cancel: શું BCCI ભારત-પાકિસ્તાન મેચ રદ કરશે? જાણો શું છે નિયમ
એશિયા કપ માં ભારત અને પાકિસ્તાન વચ્ચેની મેચ રદ કરવાની માંગ વચ્ચે, BCCI એ પોતાનો પક્ષ સ્પષ્ટ કર્યો.
IND vs PAK Asia Cup 2025: એશિયા કપ 2025 માં ભારત અને પાકિસ્તાન વચ્ચેની (IND vs PAK) મેચ રદ કરવા માટે દેશભરમાં હોબાળો મચ્યો છે. જોકે, આ નિર્ણય ભારતીય ક્રિકેટ કંટ્રોલ બોર્ડ (BCCI) ના હાથમાં નથી. બોર્ડે સ્પષ્ટતા કરી છે કે આ પ્રકારની મેચ રમવા અંગેનો અંતિમ નિર્ણય ભારત સરકાર દ્વારા લેવામાં આવે છે. સરકારની નીતિ મુજબ, ભારતીય ટીમ બહુપક્ષીય ટૂર્નામેન્ટમાં પાકિસ્તાન સામે રમશે, પરંતુ કોઈ દ્વિપક્ષીય શ્રેણીનું આયોજન થશે નહીં. આ મેચ 14 સપ્ટેમ્બરે દુબઈમાં રમાવાની છે.
મેચ રદ કરવાનો અધિકાર કોની પાસે?
ઘણીવાર એવું માનવામાં આવે છે કે કોઈપણ ક્રિકેટ મેચનું આયોજન કે રદ્દીકરણ કરવાની સત્તા BCCI પાસે છે. પરંતુ ભારત અને પાકિસ્તાન વચ્ચેની સંવેદનશીલ મેચના કિસ્સામાં, આ નિર્ણય ક્રિકેટ બોર્ડનો નથી. BCCI ના સચિવ દેવજીત સૈકિયાએ આ અંગે એક નિવેદન આપીને સ્પષ્ટ કર્યું છે કે બોર્ડ આ મામલે સંપૂર્ણપણે ભારત સરકારના નિર્દેશોનું પાલન કરશે.
ભારત સરકારની નીતિ અને મેચનું ભવિષ્ય
ભારત સરકારે પાકિસ્તાન સાથે ક્રિકેટ સંબંધો અંગે એક નીતિ ઘડી છે. આ નીતિ અનુસાર, ભારતીય ક્રિકેટ ટીમ એશિયા કપ અને વર્લ્ડ કપ જેવી બહુપક્ષીય ટૂર્નામેન્ટમાં પાકિસ્તાન સામે રમશે, પરંતુ બંને દેશો વચ્ચે કોઈ દ્વિપક્ષીય શ્રેણીનું આયોજન કરવામાં આવશે નહીં. આ નીતિ ભાજપના નેતા અનુરાગ ઠાકુરે પણ વારંવાર સ્પષ્ટ કરી છે. તેથી, જ્યાં સુધી સરકાર તરફથી કોઈ નવીનતમ નિર્ણય ન આવે, ત્યાં સુધી 14 સપ્ટેમ્બરે રમાનારી આ મેચ રદ થવાની શક્યતા ખૂબ ઓછી છે.
વિરોધ અને કાનૂની કાર્યવાહી
આ મેચના વિરોધમાં ભારતમાં રાજકીય પક્ષો અને લોકો દ્વારા અભિયાન ચલાવવામાં આવ્યું છે. કેટલાક કાયદાના વિદ્યાર્થીઓએ તો આ મેચ રદ કરવા માટે સુપ્રીમ કોર્ટમાં પણ અરજી દાખલ કરી હતી. તેમની અરજીમાં દલીલ કરવામાં આવી હતી કે, પહેલગામ હુમલાના થોડા જ દિવસો બાદ પાકિસ્તાન સાથે ક્રિકેટ રમવું એ શહીદ થયેલા ભારતીય સૈનિકો અને જીવ ગુમાવનારા લોકોનું અપમાન હશે. જોકે, હાઈકોર્ટે આ અરજીને ફગાવી દીધી હતી.
ઉલ્લેખનીય છે કે, ભારત અને પાકિસ્તાન વચ્ચેની આ બહુપ્રતિક્ષિત મેચ 14 સપ્ટેમ્બરે દુબઈ ઇન્ટરનેશનલ સ્ટેડિયમમાં ભારતીય સમય મુજબ રાત્રે 8 વાગ્યાથી લાઈવ પ્રસારિત થશે.
ટોપ સ્ટોરી
ટ્રેન્ડિંગ સમાચાર
