IND vs SL Day 2 Highlights: બીજા દિવસે ભારત 460/9, દેવદત્ત પડિકલની 167 રનની ઐતિહાસિક સદી

શ્રીલંકા સામે પ્રથમ ટેસ્ટના બીજા દિવસે ભારતે 9 વિકેટે 460 રન બનાવ્યા; દેવદત્ત પડિક્કલ 167 રન બનાવી આઉટ, કેએલ રાહુલ 82 અને ધ્રુવ જુરેલે પણ ફટકારી શાનદાર ફિફ્ટી.

IND vs SL 1st Test Day 2 Highlights Padikkal 167 India Score

Source : सोशल मीडिया (एक्स)

Show Quick Read

Key points generated by AI, verified by newsroom

• વરસાદ પ્રભાવિત દિવસે ભારતે 460/9નો મજબૂત સ્કોર બનાવ્યો.
• દેવદત્ત પડિક્કલે ઐતિહાસિક 167 રનની શાનદાર ઈનિંગ રમી.
• રાહુલ 82 રન બનાવી સદી ચૂક્યો, જુરેલે 51 કર્યા.
• જયસૂર્યાએ 4 અને નુવંથાને 3 વિકેટો ઝડપી.

IND vs SL 1st Test Day 2 highlights: ભારત અને શ્રીલંકા વચ્ચે ગેલ ઈન્ટરનેશનલ સ્ટેડિયમ ખાતે રમાઈ રહેલી પહેલી ટેસ્ટ મેચમાં વરસાદ સતત વિલન બની રહ્યો છે. પ્રથમ દિવસની જેમ મેચનો બીજો દિવસ પણ ખરાબ હવામાન અને વરસાદથી પ્રભાવિત રહ્યો હતો. વરસાદના કારણે બીજા દિવસે દોઢ સેશન સુધી તો મેચ શરૂ જ થઈ શકી ન હતી. આખા દિવસમાં માત્ર 43 ઓવરની જ રમત શક્ય બની શકી. આ સમયગાળામાં ભારતીય ટીમે સ્કોરબોર્ડમાં 172 રન ઉમેર્યા હતા. એક સમયે એવું લાગી રહ્યું હતું કે ટીમ ઈન્ડિયા કદાચ આજની રમત પૂરી થાય તે પહેલા જ ઓલઆઉટ થઈ જશે, પરંતુ એવું થયું નહીં.

બીજા દિવસના અંતે ભારતનો સ્કોર 460/9

બીજા દિવસની રમત પૂરી થઈ ત્યારે (સ્ટમ્પ્સ સમયે) ભારતીય ટીમે 9 વિકેટના નુકસાને 460 રનનો મજબૂત સ્કોર ઊભો કરી લીધો છે. હાલમાં કુલદીપ યાદવ 13 બોલમાં 12 રન અને પ્રસિદ્ધ કૃષ્ણા 4 બોલમાં 1 રન બનાવીને ક્રીઝ પર અણનમ છે. શ્રીલંકાના બોલર્સની વાત કરીએ તો, પ્રભાત જયસૂર્યાએ સૌથી વધુ 4 વિકેટ ઝડપી છે, જ્યારે કેશરા નુવંથાને 3 મહત્વની સફળતા મળી છે.

દેવદત્ત પડિક્કલની ઐતિહાસિક ઈનિંગ

બીજા દિવસનું મુખ્ય આકર્ષણ યુવા બેટ્સમેન દેવદત્ત પડિક્કલ રહ્યો હતો. તેણે શાનદાર 167 રનની ઐતિહાસિક ઈનિંગ રમી હતી. પોતાની 230 બોલની ઈનિંગમાં તેણે 15 ચોગ્ગા અને 1 છગ્ગો ફટકાર્યો હતો. ખાસ વાત એ છે કે 21મી સદીમાં ત્રીજા નંબરે બેટિંગમાં આવીને સદી ફટકારનાર તે ભારતનો માત્ર બીજો ડાબોડી (Left-handed) બેટ્સમેન બની ગયો છે. એટલું જ નહીં, શ્રીલંકા સામે ત્રીજા નંબરે કોઈ ભારતીય બેટ્સમેન દ્વારા નોંધાયેલો આ બીજો સૌથી મોટો ટેસ્ટ સ્કોર પણ છે.

That will be Stumps on Day 2 in Galle!

A strong batting display from #TeamIndia as they reach 460/9 💪

Scorecard ▶️ https://t.co/M9LVyCAp8y#SLvIND pic.twitter.com/pKakUsHrpB

— BCCI (@BCCI) August 16, 2026

આ પણ વાંચોઃ 2027 ODI વર્લ્ડ કપની તારીખ લીક? આફ્રિકામાં રમાનારી ટૂર્નામેન્ટનું ગાંધી કનેક્શન!

રાહુલ સદી ચૂક્યો, જુરેલની આક્રમક ફિફ્ટી

પ્રથમ દિવસે રિટાયર્ડ હર્ટ થયેલો કેએલ રાહુલ બીજા દિવસે ફરીથી બેટિંગ કરવા મેદાનમાં ઉતર્યો હતો. પરંતુ તે પોતાની સદી પૂરી કરી શક્યો ન હતો. રાહુલ 175 બોલમાં 10 ચોગ્ગા અને 1 છગ્ગાની મદદથી 82 રન બનાવીને પેવેલિયન પરત ફર્યો હતો. છઠ્ઠા નંબરે બેટિંગ કરવા આવેલા વિકેટકીપર-બેટ્સમેન ધ્રુવ જુરેલે આક્રમક અંદાજમાં રમતા માત્ર 68 બોલમાં 51 રન બનાવ્યા, જેમાં 4 ચોગ્ગા અને 1 છગ્ગો સામેલ હતો.

લોઅર ઓર્ડરમાં રવિન્દ્ર જાડેજા ખાસ કંઈ કમાલ કરી શક્યો ન હતો અને 25 બોલમાં 13 રન બનાવીને આઉટ થઈ ગયો. માનવ સુથારે 43 બોલમાં 2 ચોગ્ગાની મદદથી 24 રનનું યોગદાન આપ્યું. મોહમ્મદ સિરાજે મેદાનમાં આવીને એક શાનદાર સિક્સર ફટકારીને દર્શકોનું મનોરંજન કર્યું હતું, જોકે તે 15 બોલમાં 11 રન બનાવીને આઉટ થયો. અંતમાં કુલદીપ યાદવ અને પ્રસિદ્ધ કૃષ્ણાએ 17 બોલમાં 13 રનની નાની પણ મહત્વની ભાગીદારી કરીને ટીમને ઓલઆઉટ થતા બચાવી લીધી હતી.

આ પણ વાંચોઃ ટીમ ઈન્ડિયાને મોટો ઝટકો: 77 રને રમતો કેએલ રાહુલ ઈજાગ્રસ્ત, મેદાનની તસવીરોએ વધારી ચિંતા