IND vs ENG Highlights Day 3: જો રુટે અનેક રેકોર્ડ બનાવ્યા, માન્ચેસ્ટરમાં ઈંગ્લેન્ડ પાસે 186 રનની લીડ
માન્ચેસ્ટર ટેસ્ટના ત્રીજા દિવસના અંત સુધીમાં ઇંગ્લેન્ડે 7 વિકેટ ગુમાવીને 544 રન બનાવી લીધા છે. ભારતીય ટીમ પ્રથમ ઇનિંગમાં 358 રનમાં ઓલઆઉટ થઈ ગઈ હતી.
IND vs ENG Highlights Day 3: માન્ચેસ્ટર ટેસ્ટના ત્રીજા દિવસના અંત સુધીમાં ઇંગ્લેન્ડે 7 વિકેટ ગુમાવીને 544 રન બનાવી લીધા છે. ભારતીય ટીમ પ્રથમ ઇનિંગમાં 358 રનમાં ઓલઆઉટ થઈ ગઈ હતી. પ્રથમ દાવમાં ઇંગ્લેન્ડની કુલ લીડ વધીને 186 રન થઈ ગઈ છે. ત્રીજા દિવસે સ્ટમ્પ સુધી કેપ્ટન બેન સ્ટોક્સ 77 રન બનાવીને રમી રહ્યા છે, અને લિયામ ડોસન પણ ક્રીઝ પર મજબૂતીથી ઉભો છે.
ત્રીજા દિવસે ઇંગ્લેન્ડે પોતાનો સ્કોર 225/2 થી આગળ વધાર્યો. પ્રથમ સત્રમાં, જો રૂટ અને ઓલી પોપે ભારતીય બોલરો સામે રન બનાવ્યા હતા. બંનેએ સાથે મળીને 144 રનની ભાગીદારી સાથે ટીમ ઇન્ડિયાને બેકફૂટ પર મૂકી દીધી. લંચ પછી ભારતીય કેપ્ટને સ્પિનરોમાં વિશ્વાસ દર્શાવ્યો અને વોશિંગ્ટન સુંદર અને રવિન્દ્ર જાડેજાને વિકેટ લેવાની જવાબદારી સોંપી. સુંદરે ઓલી પોપને 71 રનના સ્કોર પર આઉટ કરીને આ રણનીતિ સાચી સાબિત કરી, તેના થોડા સમય પછી સુંદરે હેરી બ્રુકને પણ આઉટ કર્યો હતો.
એવું લાગતું હતું કે ભારત મેચમાં વાપસી કરી રહ્યું છે, પરંતુ પછી જો રૂટ અને બેન સ્ટોક્સની જોરદાર ભાગીદારીએ ટીમ ઈન્ડિયાને ફરીથી બેકફૂટ પર મૂકી દીધી. મેચ દરમિયાન બેન સ્ટોક્સ રિટાયર્ડ હર્ટ થઈને પેવેલિયન પરત ફર્યા, પરંતુ જ્યારે વિકેટો પડવા લાગી ત્યારે તે ફરીથી બેટિંગ કરવા આવ્યો.
જો રૂટે 150 રનની ઇનિંગ રમીને ઘણા રેકોર્ડ બનાવ્યા છે. તે રાહુલ દ્રવિડ, જેક્સ કાલિસ અને રિકી પોન્ટિંગને પાછળ છોડીને ટેસ્ટ ક્રિકેટના ઇતિહાસમાં સૌથી વધુ રન બનાવવાના મામલે બીજા સ્થાને આવી ગયો છે. આ સાથે તે ટેસ્ટમાં ભારત સામે સૌથી વધુ સદી (12) ફટકારનાર બેટ્સમેન પણ બની ગયો છે. રૂટ 150 ના સ્કોર પર સ્ટમ્પ આઉટ થયો હતો. ઈંગ્લેન્ડની ટીમ ઓછામાં ઓછી 250 રનની લીડ તરફ આગળ વધી રહી છે.
ભારતીય બોલિંગ વિશે વાત કરીએ તો અત્યાર સુધી રવિન્દ્ર જાડેજા અને વોશિંગ્ટન સુંદરે બે-બે વિકેટ લીધી છે. જ્યારે જસપ્રીત બુમરાહ, અંશુલ કંબોજ અને મોહમ્મદ સિરાજે એક-એક વિકેટ લીધી છે.
જો રૂટે ભારત સામે માન્ચેસ્ટર ટેસ્ટમાં ઇતિહાસ રચ્યો છે. તેણે 178 બોલમાં પોતાની ટેસ્ટ કારકિર્દીની 38મી સદી ફટકારી હતી. આ સાથે તેણે ટેસ્ટ ક્રિકેટમાં સૌથી વધુ સદી ફટકારવાના મામલે કુમાર સંગાકારાની બરાબરી કરી લીધી છે. રૂટે ભારત સામે ટેસ્ટમાં સૌથી વધુ સદી ફટકારવાનો રેકોર્ડ પણ બનાવ્યો છે. ભારત સામે આ તેની 12મી ટેસ્ટ સદી છે.
ટોપ સ્ટોરી
ટ્રેન્ડિંગ સમાચાર
