વિઝડન એવોર્ડ્સ 2026 માં ભારતનો ડંકો: 9 માંથી 7 એવોર્ડ્સ ભારતીય ખેલાડીઓના નામે! જુઓ લિસ્ટ

દીપ્તિ શર્મા બની 'વર્લ્ડની બેસ્ટ વુમન ક્રિકેટર', તો અભિષેક શર્માને મળ્યો બેસ્ટ T20 ખેલાડીનો ખિતાબ; વિઝડનના ટોપ 5 ક્રિકેટર્સમાં 4 તો આપણા જ છે.

Wisden Award Winners 2026 List 7

Source : x

Show Quick Read

Key points generated by AI, verified by newsroom

• વિઝડન એવોર્ડ્સ ૨૦૨૬: ભારતીય ખેલાડીઓએ ૯ માંથી ૭ એવોર્ડ જીત્યા.
• દીપ્તિ શર્મા 'વુમન્સ ક્રિકેટર ઓફ ધ યર' અને મિશેલ સ્ટાર્ક 'મેન્સ ક્રિકેટર' બન્યા.
• ટોપ ૫ ક્રિકેટર્સમાં ૪ ભારતીયો: ગિલ, પંત, જાડેજા, સિરાજનો સમાવેશ.
• શુભમન ગિલ અને ઋષભ પંતના શાનદાર પ્રદર્શનની વિઝડનમાં પ્રશંસા.

Wisden Awards 2026: ક્રિકેટ જગતના સૌથી પ્રતિષ્ઠિત મનાતા 'વિઝડન એવોર્ડ્સ 2026' ની જાહેરાત થઈ ગઈ છે, અને આ વખતે આ એવોર્ડ્સમાં માત્ર ને માત્ર ભારતીય ખેલાડીઓનો જ જલવો જોવા મળ્યો છે. તમને જાણીને ગર્વ થશે કે 9 મુખ્ય પુરસ્કારોમાંથી 7 એવોર્ડ તો આપણા ભારતીય ક્રિકેટરોએ જ પોતાના નામે કરી લીધા છે. મહિલા ક્રિકેટમાં દીપ્તિ શર્માએ મેદાન માર્યું છે, તો પુરુષોમાં શુભમન ગિલ, ઋષભ પંત અને અભિષેક શર્મા જેવા ખેલાડીઓએ ભારતનું નામ દુનિયાભરમાં રોશન કર્યું છે. ચાલો વિગતે જાણીએ આ એવોર્ડ્સમાં કયા કયા ખેલાડીઓએ બાજી મારી છે.

દીપ્તિ શર્મા અને મિશેલ સ્ટાર્ક બન્યા 'લીડિંગ ક્રિકેટર'

વિઝડન ક્રિકેટર્સ અલ્માનેકે ગયા વર્ષની એશિઝ સિરીઝમાં જબરદસ્ત પ્રદર્શન કરવા બદલ ઓસ્ટ્રેલિયાના મિશેલ સ્ટાર્કને વિશ્વનો બેસ્ટ મેન્સ ક્રિકેટર (લીડિંગ ક્રિકેટર ઇન ધ વર્લ્ડ) જાહેર કર્યો છે. પણ આપણા માટે સૌથી મોટી ખુશીની વાત એ છે કે મહિલા કેટેગરીમાં આ મોટો એવોર્ડ આપણી દીપ્તિ શર્માને મળ્યો છે. 2025 ના વનડે વર્લ્ડ કપમાં ભારતને જીતાડવામાં દીપ્તિનો સિંહફાળો હતો, જેના માટે તેને 'પ્લેયર ઓફ ધ ટુર્નામેન્ટ' અને હવે 'વુમન્સ ક્રિકેટર ઓફ ધ યર' નો એવોર્ડ એનાયત કરવામાં આવ્યો છે.

ટોપ 5 ક્રિકેટર્સમાં 4 ભારતીયોનો દબદબો

વિઝડનના એડિટર લોરેન્સ બૂથે વર્ષના જે 5 બેસ્ટ ક્રિકેટરોની યાદી જાહેર કરી છે, તેમાં તો પૂરેપૂરો ભારતનો જ દબદબો છે. આ 5 માંથી 4 ખેલાડીઓ ભારતીય છે! 2025 ના ઇંગ્લેન્ડ પ્રવાસમાં શાનદાર રમત બતાવવા બદલ ઋષભ પંત, શુભમન ગિલ, રવિન્દ્ર જાડેજા અને મોહમ્મદ સિરાજને આ લિસ્ટમાં સામેલ કરવામાં આવ્યા છે. ખાસ વાત એ છે કે ટેસ્ટ કેપ્ટન તરીકે શુભમન ગિલની આ પહેલી જ ટેસ્ટ સિરીઝ હતી. આ ઉપરાંત, ધમાકેદાર બેટિંગ કરવા બદલ અભિષેક શર્માને 'મેન્સ T20 ક્રિકેટર ઓફ ધ યર' તરીકે પસંદ કરવામાં આવ્યો છે.

ગિલ અને પંતના પ્રદર્શન પર વિઝડન પણ ફિદા

લોરેન્સ બૂથે શુભમન ગિલના વખાણ કરતા લખ્યું છે કે, એન્ડરસન-તેંડુલકર સિરીઝમાં ગિલની રન બનાવવાની ભૂખ કમાલની હતી. તેણે આખી સિરીઝમાં 754 રન ફટકાર્યા, જે ઇંગ્લેન્ડ સામે કોઈ એક સિરીઝમાં કોઈપણ ભારતીયનો અત્યાર સુધીનો સૌથી મોટો સ્કોર છે. એજબેસ્ટન ટેસ્ટમાં તો તેણે 269 અને 161 રનની બે શાનદાર ઇનિંગ્સ રમી હતી, જેના માટે તેને એક જ ટેસ્ટમાં બેસ્ટ પરફોર્મન્સ માટે 'વિઝડન ટ્રોફી' પણ આપવામાં આવી છે. આ સિવાય હેડિંગ્લી અને ઓલ્ડ ટ્રેફોર્ડમાં પણ તેણે સદીઓ ફટકારી હતી.

બીજી તરફ, ઋષભ પંત વિશે વાત કરતા બૂથે કહ્યું કે, પંતની નીડર બેટિંગ આ ઉનાળાની સૌથી યાદગાર ક્ષણોમાંની એક હતી. હેડિંગ્લીમાં 134 અને 118 રનની તેની બે ઇનિંગ્સ અદભુત હતી. એટલું જ નહીં, તેણે આ સિરીઝમાં 3 અડધી સદી પણ ફટકારી હતી, જેમાંથી છેલ્લી ફિફ્ટી તો તેણે પોતાના પગમાં ઈજા હોવા છતાં ફટકારીને સૌના દિલ જીતી લીધા હતા.

આ પણ વાંચો

પ્રફુલ હિંગે કોણ છે? 24 વર્ષના બોલરે IPL ડેબ્યૂમાં જ રચ્યો ઇતિહાસ, 30 લાખમાં SRH સાથે જોડાયો હતો