બે મહિનામાં જ પકડી લીધો તો...! ધનશ્રી વર્માના વિસ્ફોટક ખુલાસા પર ચહલે તોડ્યું મૌન, કહ્યું – ‘જો આવું હોત, તો 4.5 વર્ષ....’

Dhanashree Verma cheating claim: ડાન્સર અને સોશિયલ મીડિયા પર્સનાલિટી ધનશ્રી વર્મા હાલમાં "રાઇઝ એન્ડ ફોલ" રિયાલિટી શોમાં ભાગ લઈ રહી છે.

યુઝવેન્દ્ર ચહલ - ધનશ્રી વર્મા

Source : X

Yuzvendra Chahal reaction: ભારતીય ક્રિકેટર યુઝવેન્દ્ર ચહલ અને તેની ભૂતપૂર્વ પત્ની ધનશ્રી વર્મા વચ્ચેના સંબંધોને લઈને ફરી એકવાર વિવાદ સર્જાયો છે. હાલમાં નેટફ્લિક્સના રિયાલિટી શો "રાઇઝ એન્ડ ફોલ"માં દેખાઈ રહેલી ધનશ્રી વર્માએ એક સ્પર્ધક સાથેની વાતચીતમાં દાવો કર્યો છે કે લગ્નના માત્ર બે મહિના પછી જ ચહલે તેની સાથે છેતરપિંડી કરી હતી અને તેણીએ તેને રંગેહાથ પકડ્યો હતો. આ વિસ્ફોટક નિવેદન બાદ, યુઝવેન્દ્ર ચહલે મૌન તોડ્યું છે. ચહલે આ આરોપોને સદંતર નકારી કાઢ્યા છે અને સ્પષ્ટતા કરી છે કે જો આવું થયું હોત તો તેમનો સંબંધ સાડા ચાર વર્ષ સુધી ટકી શક્યો ન હોત.

રિયાલિટી શોમાં ધનશ્રી વર્માનો મોટો ખુલાસો

ડાન્સર અને સોશિયલ મીડિયા પર્સનાલિટી ધનશ્રી વર્મા હાલમાં "રાઇઝ એન્ડ ફોલ" રિયાલિટી શોમાં ભાગ લઈ રહી છે. તાજેતરમાં, શોના એક એપિસોડમાં અભિનેત્રી કુબ્બ્રા સૈત સાથેની વાતચીત દરમિયાન ધનશ્રીએ તેના લગ્ન જીવન અંગે ચોંકાવનારો ખુલાસો કર્યો. તેણીએ દાવો કર્યો કે લગ્નના પ્રથમ વર્ષમાં જ તેને સમજાયું કે લગ્ન એક ભૂલ હતી. ધનશ્રીએ કહ્યું, "મને પહેલા વર્ષમાં જ સમજાયું કે લગ્ન એક ભૂલ હતી. મેં બીજા મહિનામાં જ તેને રંગે હાથે પકડી લીધો." આ નિવેદને સોશિયલ મીડિયા પર ખળભળાટ મચાવ્યો અને તાત્કાલિક મોટો વિવાદ ઊભો કર્યો.

યુઝવેન્દ્ર ચહલે મૌન તોડીને કર્યો ખુલાસો

સોશિયલ મીડિયા પર મામલો ગરમાયા બાદ ક્રિકેટર યુઝવેન્દ્ર ચહલે આ આરોપોનો જવાબ આપવા માટે મૌન તોડ્યું છે. HT સિટી સાથેની વાતચીતમાં ચહલે સ્પષ્ટપણે કહ્યું, "હું એક ખેલાડી છું અને હું છેતરપિંડી કરતો નથી. જો આવું કંઈક ફક્ત બે મહિનામાં બન્યું હોત, તો આ સંબંધ સાડા ચાર વર્ષ સુધી ટકી શક્યો ન હોત."

ચહલે વધુમાં જણાવ્યું કે તે આ પ્રકરણને સંપૂર્ણપણે બંધ કરીને જીવનમાં આગળ વધી ચૂક્યો છે. તેણે નારાજગી વ્યક્ત કરતા કહ્યું કે કેટલાક લોકો ભૂતકાળમાં જ અટવાઈ ગયા છે અને હજુ પણ તે જ જૂની બાબતોની ચર્ચા કરી રહ્યા છે, ભલે તે પોતે ઘણા સમય પહેલા આ મુદ્દાથી દૂર થઈ ગયો હોય.

સત્યને જાણનારા જાણે છે: ચહલ

યુઝવેન્દ્ર ચહલે ભારપૂર્વક કહ્યું કે, "આ છેલ્લી વાર છે જ્યારે હું આ વિષય પર વાત કરીશ. કોઈપણ કંઈપણ કહી શકે છે, અને તે વાયરલ થઈ જાય છે." પરંતુ સત્ય એ જ છે, અને જે લોકો મહત્ત્વપૂર્ણ છે તેઓ તે જાણે છે. તેણે અંતે સ્પષ્ટતા કરી કે "હું સિંગલ છું અને હમણાં કોઈને મળવાની કોઈ યોજના નથી." આ દ્વારા, તેણે ભૂતકાળના સંબંધો પર પૂર્ણવિરામ મૂક્યો છે.

ધનશ્રી અને ચહલ કોવિડ-19 લોકડાઉન દરમિયાન ઓનલાઈન ડાન્સ સેશન થકી એકબીજાના સંપર્કમાં આવ્યા હતા. તેમની મિત્રતા પ્રેમમાં બદલાઈ અને તેમના લગ્ન થયા. જોકે, આ વર્ષની શરૂઆતમાં ફેબ્રુઆરી મહિનામાં, બંનેએ પરસ્પર સંમતિથી છૂટાછેડા માટે અરજી કરી હતી અને કાયદેસરની પ્રક્રિયા માર્ચમાં પૂર્ણ થઈ હતી. છૂટાછેડાની પ્રક્રિયા ઝડપી હોવા છતાં, ધનશ્રીએ પોડકાસ્ટમાં તેને પોતાના માટે એક ખૂબ જ ભાવનાત્મક ક્ષણ ગણાવી હતી.