વર્લ્ડકપ ફાઇનલ: લોર્ડ્સના મેદાન પર ટોસ જીતીને શું કરવું રહેશે ફાયદાકારક, જાણો શું કહી રહ્યા છે આંકડાઓ?

આ વર્લ્ડકપમાં ટોસની ભૂમિકા ખૂબ મહત્વની સાબિત થઇ છે એવામાં ફાઇનલ મેચમાં પણ ટોસ ખૂબ મહત્વની ભૂમિકા ભજવે તેવી માનવામાં આવી રહ્યું છે

  નવી દિલ્હીઃ ઇગ્લેન્ડના ઐતિહાસિક મેદાન લોર્ડ્સમાં આજે ઇગ્લેન્ડ અને ન્યૂઝીલેન્ડ વચ્ચે વર્લ્ડકપની ફાઇનલ મેચ રમાશે. બંન્ને ટીમો એક પણ વખત વર્લ્ડકપ જીતી શકી નથી ત્યારે આ વખતે વિશ્વ ક્રિકેટને નવો ચેમ્પિયન મળશે. ન્યૂઝીલેન્ડની ટીમ બીજી વખત વર્લ્ડકપની ફાઇનલમાં પહોંચી છે જ્યારે યજમાન ઇગ્લેન્ડ ચોથી વખત ફાઇનલમાં પહોંચી છે. આ વર્લ્ડકપમાં ટોસની ભૂમિકા ખૂબ મહત્વની સાબિત થઇ છે એવામાં ફાઇનલ મેચમાં પણ ટોસ ખૂબ મહત્વની ભૂમિકા ભજવે તેવી માનવામાં આવી રહ્યું છે. આ વર્લ્ડકપમાં લોર્ડ્સના મેદાન પર રમાયેલી ચાર મેચમાં ચારેય મેચમાં પ્રથમ બેટિંગ કરનારી ટીમનો વિજય થયો છે. આંકડાઓ પર નજર નાખવામાં આવે તો લોર્ડ્સમાં ટોસ જીતીને પ્રથમ બેટિંગ કરનારી ટીમ 21 મેચમાંથી 9 મેચમાં વિજય મેળવ્યો છે જ્યારે ટોસ જીતીને પ્રથમ ફિલ્ડિંગ કનારી ટીમોએ 20 મેચ જીતી છે જ્યારે 21 મેચ હારી છે. લોર્ડ્સના ઐતિહાસિક મેદાન પર ઇગ્લેન્ડ અને ન્યૂઝીલેન્ડની ટીમના પ્રદર્શનની વાત કરવામાં આવે તો ઇગ્લેન્ડે અત્યાર સુધીમાં કુલ 54 મેચ રમી છે જેમાંથી 24 મેચમાં જીત મળી છે જ્યારે 27 મેચમાં હારનો સામનો કરવો પડ્યો છે. જ્યારે બે મેચ ડ્રો અને એક મેચમાં પરિણામ આવ્યું નહોતું. આ મેદાન પર ઇગ્લેન્ડના જીતનો ચાન્સ 47 ટકા છે. લોર્ડ્સના મેદાન પર કુલ 65 વન-ડે મેચમાંથી 21 વખત ટોસ જીતીને પ્રથમ બેટિંગ કરનારી ટીમને 9 વખત જીત મળી છે જ્યારે 12 વખત હારનો સામનો કરવો પડ્યો છે. જ્યારે 44 વખત ટોસ જીતીને પ્રથમ ફિલ્ડિંગ કરનારી ટીમનો 20 વખત વિજય થયો હતો જ્યારે 21 વખત હારનો સામનો કરવો પડ્યો છે. ટોસ જીતીને પ્રથમ બેટિંગ કરનારી ટીમે 42 ટકા મેચમાં જીત હાંસલ કરી છે જ્યારે ટોસ જીતીને પ્રથમ ફિલ્ડિંગ કરનારી ટીમે 45 ટકા મેચમા જીત હાંસલ કરી છે. જ્યારે 47 ટકા મેચમાં હારનો સામનો કરવો પડ્યો છે એવામાં આ મેદાન પર ટોસ હાર-જીતમાં વધુ અંતર પેદા કરશે નહી.