FIH Women's Nations Cup: ભારતીય મહિલા હોકી ટીમની સતત ત્રીજી જીત, સાઉથ આફ્રિકાને 2-0થી હરાવ્યું

ભારતીય મહિલા હોકી ટીમે FIH મહિલા નેશન્સ કપમાં દક્ષિણ આફ્રિકાને 2-0થી હરાવ્યું હતું.

ફોટોઃ ટ્વિટર

ભારતીય મહિલા હોકી ટીમે FIH મહિલા નેશન્સ કપમાં દક્ષિણ આફ્રિકાને 2-0થી હરાવ્યું હતું.  બુધવારે (14 ડિસેમ્બર) પુલ-બી મેચમાં ટીમ ઈન્ડિયાએ શાનદાર પ્રદર્શન કરીને સતત ત્રીજી જીત મેળવી હતી. પહેલા જ સેમીફાઈનલમાં જગ્યા બનાવી ચૂકેલી ટીમે ગ્રુપમાં પ્રથમ સ્થાન મેળવ્યું હતું. ભારત તરફથી દીપ ગ્રેસ એક્કા અને ગુરજીત કૌરે એક-એક ગોલ કર્યા હતા.

Indian women's hockey team continue winning momentum, beat South Africa 2-0

Read @ANI Story | https://t.co/fyuZppn4Dr
#HockeyIndia #FIH #FIHWomenNationsCup2022 #IndianWomenHockeyTeam pic.twitter.com/cph62HfyLa

— ANI Digital (@ani_digital) December 14, 2022

ભારતીય ટીમે મેચમાં શાનદાર શરૂઆત કરી હતી. તેણે પહેલા ક્વાર્ટરથી જ દક્ષિણ આફ્રિકાની ટીમ પર દબાણ બનાવી રાખ્યું હતું. ટીમ ઈન્ડિયાને તેનો ફાયદો 14મી મિનિટે મળ્યો હતો. દીપ ગ્રેસ એક્કાએ શાનદાર ગોલ કરીને ટીમને 1-0ની સરસાઈ અપાવી હતી.

આ પછી બીજા અને ત્રીજા ક્વાર્ટરમાં બંને ટીમો એક પણ ગોલ કરી શકી ન હતી. ભારતે ચોથા ક્વાર્ટરમાં મેચ સમાપ્ત થવાની એક મિનિટ પહેલા જ વધુ એક ગોલ કર્યો હતો. 59મી મિનિટે ગુરજીત કૌરે બોલ ગોલ પોસ્ટમાં નાખ્યો હતો. ભારતે ગ્રુપમાં નવ પોઈન્ટ્સ મેળવ્યા છે. અગાઉ તેણે ચિલીને 3-1થી અને જાપાનને 2-1થી હરાવ્યું હતું.

આઠ ટીમોની ટૂર્નામેન્ટ ભારત માટે મહત્વપૂર્ણ છે કારણ કે તે પ્રમોશન-રેલિગેશન સિસ્ટમમાં મુખ્ય ભૂમિકા ભજવે છે. ટુર્નામેન્ટની ચેમ્પિયનને 2023-24 FIH હોકી વિમેન્સ પ્રો લીગમાં પ્રમોટ કરવામાં આવશે. FIH હોકી વિમેન્સ પ્રો લીગ એ આગામી વર્ષની એશિયન ગેમ્સ અને 2024 પેરિસ ઓલિમ્પિક્સ પહેલા એક મહત્વપૂર્ણ ટુર્નામેન્ટ છે.

સતત બીજી વખત ફાઇનલમાં પહોંચ્યું ફ્રાન્સ

FIFA World Cup 2022: FIFA વર્લ્ડ કપની બીજી સેમિફાઇનલ મેચમાં ફ્રાન્સે મોરોક્કોને 2-0થી હરાવ્યું હતું. આ જીત સાથે ફ્રાન્સ સતત બીજી વખત ફાઇનલમાં પહોંચ્યું છે. આ પહેલા ફ્રાન્સ ફિફા વર્લ્ડ કપ 2018 જીત્યું હતું. ફ્રાન્સ ફિફા વર્લ્ડ કપ 2022માં ડિફેન્ડિંગ ચેમ્પિયન તરીકે મેદાનમાં ઉતર્યું હતું. ફ્રાન્સે ચોથી વખત ફિફા વર્લ્ડ કપની ફાઇનલમાં જગ્યા બનાવી છે. હવે ફાઇનલમાં લિયોનેલ મેસ્સીની ટીમ આર્જેન્ટિના સામે ટકરાશે. ફ્રાન્સ અને આર્જેન્ટિના વચ્ચે ફાઈનલ મેચ 17 ડિસેમ્બરે રમાશે.

આ મેચ જીતીને ફ્રાન્સની ટીમે સતત બીજી વખત અને એકંદરે ચોથી વખત ફાઇનલમાં પ્રવેશ કર્યો છે. આ પહેલા ફ્રાન્સ ત્રણ વખત ફાઈનલ રમ્યું હતું અને તેણે 1998 અને 2018માં બે વખત ટાઈટલ જીત્યા હતા. જ્યારે 2006માં તે રનર્સ-અપ રહી હતી. ફ્રાન્સની ટીમ પણ બે વખત ત્રીજા નંબરે અને એકવાર ચોથા નંબર પર રહી છે. આ વખતે ફ્રાન્સની ટીમ કુલ સાતમી વખત ટોપ-4માં પહોંચી છે.