CSK vs RCB Score IPL 2025 Live Updates: IPL 2025ની આઠમી મેચ ચેન્નાઈ સુપર કિંગ્સ (CSK) અને રોયલ ચેલેન્જર્સ બેંગ્લોર (RCB) વચ્ચે એમએ ચિદમ્બરમ સ્ટેડિયમ ખાતે રમાઈ રહી છે. મેચની શરૂઆતથી જ રોમાંચ જોવા મળી રહ્યો છે, જેમાં RCBના ઓપનર ફિલ સોલ્ટે ધમાકેદાર બેટિંગ કરીને ટીમને જોરદાર શરૂઆત અપાવી છે, જ્યારે CSKના બોલરો વિકેટ મેળવવા માટે સંઘર્ષ કરી રહ્યા છે.

આ સિઝનમાં પોતાની પ્રથમ મેચમાં કોલકાતા નાઈટ રાઈડર્સને હરાવનારી RCB આજે ચેન્નાઈ સામે પણ સારું પ્રદર્શન કરવાના ઈરાદે મેદાનમાં ઉતરી છે. શક્ય છે કે RCBની પ્લેઈંગ ઈલેવનમાં કેટલાક ફેરફાર પણ જોવા મળી શકે છે. બીજી તરફ, CSKએ પોતાની પ્રથમ મેચમાં મુંબઈ ઈન્ડિયન્સને હરાવીને શાનદાર શરૂઆત કરી હતી અને આજે તેઓ આ જીતના મોમેન્ટમને જાળવી રાખવા માંગશે.

રુતુરાજ ગાયકવાડની આગેવાની હેઠળની CSKએ પ્રથમ મેચમાં બેટ્સમેનોના શાનદાર પ્રદર્શનથી મુંબઈને ૪ વિકેટે હરાવ્યું હતું. રચિન રવિન્દ્ર અને ઋતુરાજે અડધી સદી ફટકારી હતી અને આજે પણ તેઓ ટીમ માટે મહત્વની ઇનિંગ્સ રમી શકે છે. CSKના બોલરોમાં નૂર અહેમદ અને ખલીલ અહેમદ RCBના બેટ્સમેનોને રોકવામાં મહત્વની ભૂમિકા ભજવી શકે છે.

RCBની ટીમ આ મેચ માટે પોતાની પ્લેઈંગ ઈલેવનમાં ફેરફાર કરી શકે છે. ભુવનેશ્વર કુમાર જે પ્રથમ મેચમાં રમી શક્યો નહોતો, તે હવે ફિટ થઈ ગયો છે અને તેને આજે તક મળી શકે છે. વિરાટ કોહલી અને ફિલિપ સોલ્ટે KKR સામે શાનદાર બેટિંગ કરી હતી અને કોહલી આજે ચેન્નાઈના બોલરો સામે પણ વિસ્ફોટક બેટિંગ કરી શકે છે. કેપ્ટન રજત પાટીદારની સાથે ટીમ ડેવિડ અને કૃણાલ પંડ્યાને પણ પ્લેઈંગ ઈલેવનમાં સામેલ કરી શકે છે, જેમણે IPLમાં ઘણી વખત સારું પ્રદર્શન કર્યું છે.

આ મેચ માટે બંને ટીમોની સંભવિત પ્લેઈંગ ઈલેવન આ પ્રમાણે હોઈ શકે છે:

ચેન્નાઈ સુપર કિંગ્સ: રાહુલ ત્રિપાઠી, રચિન રવિન્દ્ર, રૂતુરાજ ગાયકવાડ (કેપ્ટન), શિવમ દુબે, દીપક હુડા, રવિન્દ્ર જાડેજા, સેમ કુરન, એમએસ ધોની (વિકેટકીપર), રવિચંદ્રન અશ્વિન, નાથન એલિસ, નૂર અહેમદ, ખલીલ અહેમદ.

રોયલ ચેલેન્જર્સ બેંગ્લોર: વિરાટ કોહલી, ફિલ સોલ્ટ (wk), દેવદત્ત પડિકલ, રજત પાટીદાર (c), લિયામ લિવિંગ્સ્ટન, જીતેશ શર્મા (wk), ટિમ ડેવિડ, કૃણાલ પંડ્યા, રસિક દાર, યશ દયાલ, જોશ હેઝલવુડ/ભુવનેશ્વર કુમાર, સુયશ શર્મા.

23:20 PM (IST) • 28 Mar 2025

CSK vs RCB Live Score: CSKને તેમના જ ઘરમાં RCBએ ધૂળ ચટાડી, ૫૦ રને ભવ્ય વિજય મેળવ્યો

રોયલ ચેલેન્જર્સ બેંગ્લોરે ચેન્નાઈ સુપર કિંગ્સને તેમના જ ગઢમાં હરાવીને એક મોટી જીત નોંધાવી છે. ચેપોકના મેદાન પર રમાયેલી IPL 2025ની આ મેચમાં RCBએ CSKને ૫૦ રનથી પરાજય આપ્યો હતો. આ જીતમાં RCBના બેટ્સમેન રજત પાટીદારની શાનદાર અડધી સદી અને બોલર જોશ હેઝલવુડની ઘાતક બોલિંગ મહત્વની રહી હતી.

પ્રથમ બેટિંગ કરતા રોયલ ચેલેન્જર્સ બેંગ્લોરે ૨૦ ઓવરમાં ૭ વિકેટ ગુમાવીને ૧૯૬ રન બનાવ્યા હતા. RCB તરફથી રજત પાટીદારે સૌથી વધુ ૩૨ બોલમાં ૫૧ રન બનાવ્યા હતા, જેમાં ૪ ચોગ્ગા અને ૩ છગ્ગાનો સમાવેશ થાય છે. આ ઉપરાંત, વિરાટ કોહલીએ ૩૧ રનનું યોગદાન આપ્યું હતું, જ્યારે ફિલિપ સોલ્ટે ૧૬ બોલમાં ૩૨ રન ફટકાર્યા હતા. દેવદત્ત પડિકલે ૨૭ રન અને ટિમ ડેવિડે ૨૨ રનનું યોગદાન આપ્યું હતું.

જવાબમાં ઉતરેલી ચેન્નાઈ સુપર કિંગ્સની ટીમ લક્ષ્યનો પીછો કરવામાં નિષ્ફળ રહી હતી અને નિર્ધારિત ઓવરોમાં માત્ર ૧૪૬ રન જ બનાવી શકી હતી. CSK તરફથી રચિન રવિન્દ્રએ ૩૧ બોલમાં ૪૧ રન બનાવ્યા હતા, જેમાં ૫ ચોગ્ગાનો સમાવેશ થાય છે. રવિન્દ્ર જાડેજા ૨૫ રન બનાવીને આઉટ થયો હતો, જ્યારે અશ્વિને ૧૧ રનનું યોગદાન આપ્યું હતું. અન્ય કોઈ બેટ્સમેન ખાસ પ્રદર્શન કરી શક્યો નહોતો.

RCB તરફથી બોલિંગમાં જોશ હેઝલવુડે શાનદાર પ્રદર્શન કર્યું હતું અને ૩ મહત્વની વિકેટો ઝડપી હતી. આ ઉપરાંત, યશ દયાલ અને લિવિંગસ્ટને પણ ૨-૨ વિકેટ લઈને CSKના બેટ્સમેનોને દબાણમાં રાખ્યા હતા. આ જીત સાથે રોયલ ચેલેન્જર્સ બેંગ્લોરે ચેન્નાઈ સુપર કિંગ્સને તેમના જ ઘરઆંગણે હરાવીને એક મોટી અપસેટ સર્જ્યો છે.

23:11 PM (IST) • 28 Mar 2025

CSK vs RCB Live Score: CSK ને આઠમો ફટકો, જાડેજા પણ આઉટ

CSKની આઠમી વિકેટ પડી. રવિન્દ્ર જાડેજા 19 બોલમાં 25 રન બનાવીને આઉટ થયો હતો. હવે નૂર અહેમદ બેટિંગ કરવા આવ્યો છે. ધોની 14 રન બનાવીને રમી રહ્યો છે. CSKએ 19 ઓવરમાં 8 વિકેટ ગુમાવીને 130 રન બનાવ્યા છે.