હૈદરાબાદની હારનો સૌથી મોટો ખલનાયક: એક જ મેચ બાદ તમામ હીરોગીરી નીકળી ગઈ
મુંબઈ સામે માત્ર ૨ રન બનાવીને ટીમ પર બોજારૂપ સાબિત થયો, પ્લેઓફની આશા પર લાગ્યો મોટો ફટકો.
Ishan kishan villain: સનરાઈઝર્સ હૈદરાબાદને IPL 2025ની વધુ એક મેચમાં હારનો સામનો કરવો પડ્યો છે અને આ વખતે મુંબઈ ઈન્ડિયન્સે તેમને ૪ વિકેટે પરાજય આપ્યો છે. આ હાર માટે જો કોઈ એક ખેલાડીને સીધો જવાબદાર ઠેરવી શકાય તો તે છે ઈશાન કિશન. આ વર્ષની IPLમાં શાનદાર શરૂઆત કરનારી હૈદરાબાદની ટીમની સ્થિતિ હાલમાં ઘણી કફોડી છે અને પ્લેઓફમાં પહોંચવું પણ મુશ્કેલ લાગી રહ્યું છે.
ઈશાન કિશને આ વર્ષની પ્રથમ મેચમાં ભલે શાનદાર સદી ફટકારી હોય, પરંતુ ત્યારબાદ તેનું બેટ જાણે સાવ શાંત થઈ ગયું છે. મુંબઈ સામેની મહત્વપૂર્ણ મેચમાં પણ તે માત્ર ૨ રન બનાવીને આઉટ થઈ ગયો હતો અને ટીમની હારનું એક મોટું કારણ બન્યો હતો.
ગુરુવારે પ્રથમ બેટિંગ કરવા ઉતરેલી હૈદરાબાદની ટીમને અભિષેક શર્મા અને ટ્રેવિસ હેડે સારી શરૂઆત અપાવી હતી. પાવરપ્લેમાં ટીમે કોઈ વિકેટ ગુમાવ્યા વિના ૪૬ રન બનાવ્યા હતા. જોકે, આઠમી ઓવરમાં ૫૯ રનના સ્કોર પર અભિષેકની વિકેટ પડી હતી, જેણે ૨૮ બોલમાં ૪૦ રન બનાવ્યા હતા. ત્યારબાદ ત્રીજા નંબરે બેટિંગ કરવા આવેલા ઈશાન કિશન પાસેથી ટીમ ઘણી અપેક્ષા રાખી રહી હતી, પરંતુ તે ફરી એકવાર નિષ્ફળ રહ્યો હતો. તે માત્ર ત્રણ બોલ રમ્યો અને માત્ર ૨ રન બનાવીને વિલ જેક્સનો શિકાર બન્યો હતો.
ખાસ વાત એ છે કે ઈશાન કિશને પોતાની IPL કરિયરની શરૂઆત મુંબઈ ઈન્ડિયન્સ સાથે કરી હતી અને તે વાનખેડે સ્ટેડિયમની પીચથી સારી રીતે પરિચિત છે. તેણે આ મેદાન પર ઘણા વર્ષો સુધી ક્રિકેટ રમ્યું છે, પરંતુ હૈદરાબાદ માટે તે અહીં કંઈ ખાસ પ્રદર્શન કરી શક્યો નહીં.
આ વર્ષે IPLની પહેલી જ મેચમાં રાજસ્થાન રોયલ્સ સામે અણનમ ૧૦૬ રન બનાવ્યા બાદ ઈશાન કિશનનું બેટ લગભગ શાંત જ રહ્યું છે. તે પછીની મેચોમાં તે માત્ર એક જ વખત બે આંકડાનો સ્કોર પાર કરી શક્યો છે. લખનૌ સુપર જાયન્ટ્સ સામેની મેચમાં તો તે ખાતું પણ ખોલી શક્યો નહોતો અને ગોલ્ડન ડકનો શિકાર બન્યો હતો. ત્યારબાદ દિલ્હી સામે ૨ રન, કોલકાતા સામે ૨ રન અને ગુજરાત ટાઇટન્સ સામે તેણે ૧૭ રન બનાવ્યા હતા. પંજાબ કિંગ્સ સામે તેણે અણનમ ૯ રન બનાવ્યા હતા અને હવે મુંબઈ સામે તે ફરીથી ૨ રન બનાવીને પેવેલિયન ભેગો થયો હતો.
જો ઈશાન કિશને ટ્રેવિસ હેડને યોગ્ય સાથ આપ્યો હોત તો હૈદરાબાદની ટીમ ૨૦૦ની આસપાસનો સ્કોર બનાવી શકી હોત, જે કદાચ મેચ જીતવા માટે પૂરતો સાબિત થઈ શક્યો હોત. પરંતુ ઈશાન કિશનની નિષ્ફળતાએ ટીમને મોટું નુકસાન પહોંચાડ્યું હતું અને આ હાર માટે તેને સૌથી મોટો ખલનાયક ગણી શકાય છે.
ટોપ સ્ટોરી
ટ્રેન્ડિંગ સમાચાર
