RCB vs GT Final Live: 28 માર્ચથી શરૂ થયેલો ક્રિકેટનો મહાકુંભ આજે તેના અંતિમ ચરણમાં પહોંચી ગયો છે. IPL 2026 ની 19મી સીઝનની ફાઇનલ મેચ આજે રોયલ ચેલેન્જર્સ બેંગ્લોર (RCB) અને ગુજરાત ટાઇટન્સ (GT) વચ્ચે રમાવા જઈ રહી છે. ક્રિકેટ રસિકો જેની આતુરતાથી રાહ જોઈ રહ્યા હતા તે ટાઇટલ માટેની છેલ્લી લડાઈ આજે અમદાવાદના નરેન્દ્ર મોદી સ્ટેડિયમમાં જોવા મળશે. એક તરફ રજત પાટીદારની કેપ્ટનશીપ હેઠળ RCB સતત બીજી વખત ચેમ્પિયન બનવા મેદાનમાં ઉતરશે, તો બીજી તરફ શુભમન ગિલ પોતાની કેપ્ટનશીપમાં પહેલી ટ્રોફી ઉઠાવવાનો પ્રયાસ કરશે. ચાલો જાણીએ આ મેચની પિચ, આંકડાઓ અને બંને ટીમોની પ્લેઇંગ 11 વિશેની તમામ વિગતો.

ફાઇનલનો તખ્તો તૈયાર છે અને આંકડાઓની રમત

10 ટીમો વચ્ચેની લાંબી સફર બાદ, લીગ સ્ટેજની ટોપ 2 ટીમો ફાઇનલમાં પહોંચી છે. અગાઉ ક્વોલિફાયર 1 માં RCB એ ગુજરાતને હરાવ્યું હતું, પરંતુ હવે ફરી એકવાર બંને ટીમો આમને-સામને છે. આજની આ ફાઇનલ મેચ માટે સાંજે 7:00 વાગ્યે ટોસ થશે અને 7:30 વાગ્યે મેચની ધમાકેદાર શરૂઆત થશે. જો આપણે હેડ-ટુ-હેડ આંકડાઓ પર નજર કરીએ તો, રજત પાટીદારની ટીમ RCB ગુજરાત ટાઇટન્સ સામે 5-4 થી આગળ છે. જોકે, અમદાવાદના આ સ્ટેડિયમમાં બંને ટીમોનો રેકોર્ડ 1-1 થી બરાબરી પર છે. નોંધનીય છે કે, આ સિઝનમાં ગુજરાતે આ જ મેદાન પર RCB ને માત આપી હતી. ગુજરાતનો પોતાના હોમ ગ્રાઉન્ડ પર રેકોર્ડ પણ શાનદાર છે; IPL 2026 માં ગુજરાતે અહીં 7 માંથી 5 મેચમાં જીત નોંધાવી છે.

કેવો રહેશે પિચનો મિજાજ અને મેચની આગાહી?

આજની મેચ હાઈ-સ્કોરિંગ રહેવાની પૂરી શક્યતા છે. મિશ્ર માટીની આ પિચ પર સારો એવો ઉછાળો જોવા મળશે, જેના કારણે ફાસ્ટ બોલરોને પણ શરૂઆતમાં સારી મદદ મળી શકે છે. મોટાભાગે ટોસ જીતનાર કેપ્ટન અહીં પહેલા બેટિંગ કરવાનું પસંદ કરી શકે છે. કાગળ પર ભલે રોયલ ચેલેન્જર્સ બેંગ્લોર મજબૂત દેખાતી હોય, પરંતુ છેલ્લી મેચમાં તેમને અહીં ગુજરાત સામે હારનો સામનો કરવો પડ્યો હતો. અમારા અનુમાન મુજબ, આ મેચમાં બંને ટીમો વચ્ચે કાંટાની ટક્કર જોવા મળશે. વિજેતાની સચોટ આગાહી કરવી તો મુશ્કેલ છે, પરંતુ ફાઇનલ મેચનું દબાણ જોતાં, જે ટીમ પહેલા બેટિંગ કરીને મોટો સ્કોર બનાવશે તેના જીતવાના ચાન્સ વધુ છે. ટાર્ગેટ ચેઝ કરવા કરતા, તેને ડિફેન્ડ કરવો આ પીચ પર થોડો સરળ રહી શકે છે.

બંને ટીમોની સંભવિત પ્લેઇંગ 11

RCB (રોયલ ચેલેન્જર્સ બેંગ્લોર): વેંકટેશ ઐયર, વિરાટ કોહલી, દેવદત્ત પડિકલ, રજત પાટીદાર (કેપ્ટન), જિતેશ શર્મા (વિકેટકીપર), ટિમ ડેવિડ, કૃણાલ પંડ્યા, ભુવનેશ્વર કુમાર, જોશ હેઝલવુડ, રસિક સલામ દાર, જેકબ ડફી, રોમારિયો શેફર્ડ

GT (ગુજરાત ટાઇટન્સ): સાઈ સુદર્શન, શુભમન ગિલ (કેપ્ટન), જોસ બટલર (વિકેટકીપર), નિશાંત સિંધુ, વોશિંગ્ટન સુંદર, જેસન હોલ્ડર, રાશિદ ખાન, રાહુલ તેવતિયા, કાગીસો રબાડા, મોહમ્મદ સિરાજ, પ્રસિદ્ધ કૃષ્ણ, અરશદ ખાન / આર. સાઈ કિશોર

23:31 PM (IST) • 31 May 2026

IPL 2026: RCBએ રચ્યો ઇતિહાસ, ગુજરાતને હરાવી સતત બીજી વખત ચેમ્પિયન બન્યું બેંગ્લોર

રોયલ ચેલેન્જર્સ બેંગ્લોર (RCB) એ રવિવારે (31 મે) આઈપીએલ 2026 (IPL 2026) ની રોમાંચક ફાઇનલ મેચમાં ગુજરાતને 5 વિકેટે હરાવીને ઇતિહાસ રચી દીધો છે. અમદાવાદના નરેન્દ્ર મોદી સ્ટેડિયમ ખાતે રમાયેલા આ મહામુકાબલામાં RCBએ શાનદાર પ્રદર્શન કરતા 12 બોલ બાકી રહેતા જ જીતનું લક્ષ્ય હાંસલ કરી લીધું હતું. આ જીત સાથે બેંગ્લોરે સતત બીજી વખત આઈપીએલ ટ્રોફી પોતાના નામે કરી છે.

નોંધનીય છે કે, રોયલ ચેલેન્જર્સ બેંગ્લોરે IPL 2025 નો ખિતાબ પણ જીત્યો હતો, જે તેમનો પ્રથમ આઈપીએલ ખિતાબ હતો. હવે સતત બીજો ખિતાબ જીતીને RCB એ મુંબઈ ઇન્ડિયન્સ (2019, 2020) અને ચેન્નાઈ સુપર કિંગ્સ (2010, 2011) ના ખાસ રેકોર્ડની બરાબરી કરી લીધી છે. આઈપીએલના ઇતિહાસમાં સતત બે વાર ટ્રોફી જીતનારી RCB હવે ત્રીજી ટીમ બની ગઈ છે.

ફાઇનલ મેચમાં આરસીબીના ફાસ્ટ બોલરોએ મેચની શરૂઆતથી જ ગુજરાતના બેટ્સમેનો પર દબાણ બનાવી રાખ્યું હતું. ખાસ કરીને ફાસ્ટ બોલર રસિક સલામ ડારે ઘાતક બોલિંગ કરતા મહત્વની 3 વિકેટ ઝડપી હતી અને ગુજરાતને મોટા સ્કોર તરફ વધતા અટકાવ્યું હતું.

23:29 PM (IST) • 31 May 2026

RCB વિરુદ્ધ GT ફાઇનલ લાઇવ સ્કોર: રોયલ ચેલેન્જર્સ બેંગ્લોરનો સ્કોર 148-5

17 ઓવર પછી, RCB એ 5 વિકેટે 148 રન બનાવ્યા છે. બેંગ્લોરને હવે ટાઇટલ જીતવા માટે 18 બોલમાં ફક્ત 8 રનની જરૂર છે. વિરાટ કોહલી 39 બોલમાં 64 રન બનાવીને આઠ ચોગ્ગા અને બે છગ્ગા સાથે રમી રહ્યો છે. જીતેશ શર્મા 11 બોલમાં 9 રન બનાવીને રમી રહ્યો છે, જેમાં એક ચોગ્ગાનો સમાવેશ થાય છે.