RR vs LSG Live Score IPL 2025: ઇન્ડિયન પ્રીમિયર લીગ (IPL) ૨૦૨૫ની ૩૬મી મેચ જયપુરના સવાઈ માનસિંહ સ્ટેડિયમમાં રાજસ્થાન રોયલ્સ (RR) અને લખનૌ સુપર જાયન્ટ્સ (LSG) વચ્ચે રમાઈ રહી છે. આ મેચમાં લખનૌ સુપર જાયન્ટ્સે ટોસ જીતીને પ્રથમ બેટિંગ કરવાનો નિર્ણય લીધો છે.

રાજસ્થાન રોયલ્સ માટે આ મેચમાં નિયમિત કેપ્ટન સંજુ સેમસન ઈજાગ્રસ્ત હોવાને કારણે રમી રહ્યો નથી. તેની ગેરહાજરીમાં યુવા ખેલાડી રિયાન પરાગ રાજસ્થાન રોયલ્સની કેપ્ટનશીપ કરી રહ્યો છે.

આ સિઝનમાં બંને ટીમોનું પ્રદર્શન જોઈએ તો લખનૌ સુપર જાયન્ટ્સે અત્યાર સુધી રમાયેલી ૭ મેચમાંથી ૪માં જીત મેળવી છે, જ્યારે રાજસ્થાન રોયલ્સ ૭ મેચમાંથી માત્ર ૨ જ જીત્યું છે. આ સ્થિતિ જોતા રાજસ્થાન રોયલ્સ માટે આ મેચમાં આકરી સ્પર્ધાનો સામનો કરવો પડી શકે છે અને પ્લેઈંગ ઈલેવનમાં પણ કેટલાક ફેરફાર જોવા મળી શકે છે.

બંને ટીમો વચ્ચેના હેડ-ટુ-હેડ રેકોર્ડની વાત કરીએ તો, રાજસ્થાન રોયલ્સનો હાથ ઉપર રહ્યો છે. રાજસ્થાને લખનૌ સામે અત્યાર સુધી રમાયેલી મેચોમાં ૪ જીત મેળવી છે, જ્યારે લખનૌ માત્ર ૧ મેચ જીતી શક્યું છે. જોકે, ક્રિકેટમાં કોઈપણ સમયે પાસું પલટાઈ શકે છે, તેથી આ મેચ પણ કપરી બની શકે છે.

બંને ટીમોની સંભવિત પ્લેઈંગ ઈલેવન:

રાજસ્થાન રોયલ્સ: રિયાન પરાગ (કેપ્ટન), યશસ્વી જયસ્વાલ, નીતીશ રાણા, ધ્રુવ જુરેલ, શિમરોન હેટમાયર, શુભમ દુબે, વાનિન્દુ હસરંગા, જોફ્રા આર્ચર, મહેશ થીક્ષાના, તુષાર દેશપાંડે/આકાશ માધવાલ.

લખનૌ સુપર જાયન્ટ્સ: મિશેલ માર્શ, એડન માર્કરામ, નિકોલસ પૂરન, આયુષ બદોની, ઋષભ પંત (કેપ્ટન અને વિકેટકીપર), ડેવિડ મિલર, અબ્દુલ સમદ, શાર્દુલ ઠાકુર, અવેશ ખાન, પ્રિન્સ યાદવ/આકાશ દીપ, દિગ્વેશ સિંહ રાઠી, રવિ બિશ્નોઈ.

લખનૌ સુપર જાયન્ટ્સે ટોસ જીતીને બેટિંગ પસંદ કરી હોવાથી, હવે જયપુરના મેદાન પર બંને ટીમો કેવું પ્રદર્શન કરે છે તે જોવું રસપ્રદ રહેશે. રાજસ્થાન રોયલ્સ માટે રિયાન પરાગની કેપ્ટનશીપ અને ટીમનો દેખાવ મહત્વનો રહેશે, જ્યારે લખનૌ સુપર જાયન્ટ્સ પોતાના વિસ્ફોટક બેટ્સમેનોના દમ પર મોટો સ્કોર ઉભો કરવાનો પ્રયાસ કરશે.

23:23 PM (IST) • 19 Apr 2025

RR vs LSG: રોમાંચક જંગમાં લખનૌનો વિજય! રાજસ્થાને 2 રને બાજી ગુમાવી

લખનૌ સુપર જાયન્ટ્સે શુક્રવારે રમાયેલી એક રોમાંચક મેચમાં રાજસ્થાન રોયલ્સને માત્ર 2 રને પરાજય આપ્યો હતો. અવેશ ખાન દ્વારા ફેંકવામાં આવેલી છેલ્લી ઓવર આ મેચનો ટર્નિંગ પોઇન્ટ સાબિત થઈ. અવેશે નિર્ણાયક ઓવરમાં માત્ર 6 રન આપ્યા અને મહત્વની એક વિકેટ પણ પોતાના નામે કરી.

રાજસ્થાન રોયલ્સ તરફથી ઓપનર યશસ્વી જયસ્વાલે શાનદાર બેટિંગનું પ્રદર્શન કર્યું હતું. તેણે 52 બોલમાં 5 ચોગ્ગા અને 4 છગ્ગાની મદદથી 74 રન બનાવ્યા હતા. મિડલ ઓર્ડરમાં રિયાન પરાગે 39 રનનું યોગદાન આપ્યું હતું, જ્યારે યુવા બેટ્સમેન વૈભવ સૂર્યવંશીએ પોતાની ડેબ્યૂ મેચમાં 34 રન નોંધાવ્યા હતા. જો કે, અન્ય બેટ્સમેનોના સાથના અભાવે રાજસ્થાન લક્ષ્ય સુધી પહોંચી શક્યું નહોતું.

લખનૌ સુપર જાયન્ટ્સના બોલરોએ અંતિમ ઓવરોમાં શાનદાર પ્રદર્શન કર્યું હતું. અવેશ ખાને 3 વિકેટ ઝડપી હતી, જ્યારે શાર્દુલ ઠાકુર અને એડન માર્કરામને 1-1 સફળતા મળી હતી.

આ પહેલાં, પ્રથમ બેટિંગ કરતા લખનૌ સુપર જાયન્ટ્સે 20 ઓવરમાં 5 વિકેટના નુકસાન પર 180 રન બનાવ્યા હતા. ટીમ માટે આયુષ બદોનીએ વિસ્ફોટક અડધી સદી ફટકારી હતી અને 50 રન બનાવ્યા હતા. ઓપનર એડન માર્કરામે પણ 66 રનની મહત્વની ઇનિંગ રમી હતી. અંતિમ ઓવરોમાં અબ્દુલ સમદે માત્ર 10 બોલમાં અણનમ 30 રન બનાવીને ટીમના સ્કોરને મજબૂત બનાવ્યો હતો.

રાજસ્થાન રોયલ્સના બોલિંગ આક્રમણની વાત કરીએ તો, વાનિન્દુ હસરગાએ સૌથી વધુ 2 વિકેટ લીધી હતી. જોફ્રા આર્ચર, સંદીપ શર્મા અને તુષાર દેશપાંડેએ પણ 1-1 વિકેટ પોતાના નામે કરી હતી. જો કે, બેટિંગમાં મળેલી શરૂઆતનો તેઓ ફાયદો ઉઠાવી શક્યા નહીં અને રોમાંચક મુકાબલામાં 2 રને હારનો સામનો કરવો પડ્યો.

23:16 PM (IST) • 19 Apr 2025

RR vs LSG Live Score: રાજસ્થાનને પાંચમો ફટકો પડ્યો, હેટમાયર આઉટ

રાજસ્થાનની પાંચમી વિકેટ પડી. શિમરોન હેટમાયર 12 રન બનાવીને આઉટ થયો હતો. અવેશ ખાને તેને પેવેલિયનનો રસ્તો બતાવ્યો. રાજસ્થાનને જીતવા માટે 3 બોલમાં 6 રનની જરૂર છે.