Wi-Fiની સ્પીડ વધારવા માંગો છો? તો અજમાવી જુઓ આ ટ્રીક, બફરિંગથી મળશે મુક્તિ

શું તમારું Wi-Fi વારંવાર ડિસકનેક્ટ થઇ જાય છે અને મૂવી જોતી વખતે બફરિંગ માથાનો દુખાવો બની ગયો છે? એક પણ પૈસો ખર્ચ્યા વિના તમારા ઇન્ટરનેટની ગતિ વધારવાની આ સરળ રીતો શીખી લો

પ્રતીકાત્મક

Wi-Fi  speed: આજકાલ ફોનમાં ઈન્ટરનેટ ઉપલબ્ધ હોય છે, પરંતુ તે લોકોની તમામ જરૂરિયાતો પૂરી કરી શકતું નથી. તેથી લોકો ઘરમાં Wi-Fi લગાવે છે. ઘરે Wi-Fi હોવાથી ઓનલાઈન સર્ફિંગથી લઈને OTT પર ફિલ્મો જોવા સુધીનું દરેક કામ સરળતાથી થઈ જાય છે. પરંતુ ઘણી વખત એવું બને છે કે બ્રોડબેન્ડ પ્લાન મોંઘો હોવા છતાં Wi-Fiની સ્પીડ ઘણી ઓછી થઈ જાય છે. જેના કારણે અનેક કામ અટકી જાય છે.

ઘણી વખત આ માટે ઈન્ટરનેટ સર્વિસ પ્રોવાઇડર જવાબદાર નથી હોતો. પરંતુ સમસ્યા આપણા ઘરની અંદર જ રાઉટરની ખોટી પોઝિશનિંગ અને ખોટી સેટિંગ્સમાં છુપાયેલી હોય છે. જો તમારા ઘરમાં પણ Wi-Fi સિગ્નલ વારંવાર ગાયબ થઈ જાય છે અથવા ઈન્ટરનેટ અટકીને ચાલે છે, તો પરેશાન થવાની જરૂર નથી. કેટલીક સરળ ટ્રિક્સ અપનાવીને તમે તમારા ઘરના Wi-Fiની સ્પીડ વધારી શકો છો.

પહેલા રાઉટરને યોગ્ય જગ્યાએ રાખો

ઘણીવાર લોકો Wi-Fi રાઉટરને ઘરના કોઈ ખૂણામાં, ટીવીની પાછળ અથવા બંધ કબાટની અંદર રાખે છે, જેથી ઘરની સજાવટ ખરાબ ન લાગે. પરંતુ આવું ન કરવું જોઈએ. Wi-Fiના રેડિયો સિગ્નલ દરેક દિશામાં ફેલાય છે અને દિવાલો, કાચ અથવા ભારે ફર્નિચર સાથે અથડાઈને નબળા પડી શકે છે.

રાઉટરને હંમેશા ઘરની વચ્ચે અને થોડી ઊંચાઈ પર ખુલ્લી જગ્યામાં રાખવો જોઈએ. જેથી ઘરના દરેક ખૂણા સુધી સિગ્નલ સરળતાથી પહોંચી શકે. આ ઉપરાંત રાઉટરને માઇક્રોવેવ ઓવન, કોર્ડલેસ ફોન અથવા બ્લૂટૂથ ડિવાઇસ જેવા ઇલેક્ટ્રોનિક સામાનથી દૂર રાખો. આ ગેજેટ્સ Wi-Fiની ફ્રીક્વન્સીમાં અવરોધ પેદા કરી શકે છે.

રાઉટરની પોઝિશનમાં થોડો ફેરફાર કરીને જ તમે ઈન્ટરનેટની સ્પીડમાં મોટો ફરક અનુભવી શકો છો.

Wi-Fi ચેનલ અને ફ્રીક્વન્સી બેન્ડ બદલવું પણ જરૂરી

શું તમે ક્યારેય ધ્યાન આપ્યું છે કે તમારા આસપાસના પાડોશીઓ પણ એ જ Wi-Fi ચેનલનો ઉપયોગ કરી રહ્યા છે, જે તમારા ઘરમાં ચાલી રહી છે? જ્યારે એક જ ચેનલ પર ઘણા રાઉટર કામ કરવા લાગે છે, ત્યારે સિગ્નલ એકબીજા સાથે ટકરાવા લાગે છે અને ઈન્ટરનેટ ધીમું થઈ જાય છે.

આધુનિક રાઉટર ડ્યુઅલ-બેન્ડ 2.4GHz અને 5GHz સપોર્ટ સાથે આવે છે. જો તમારું ડિવાઇસ રાઉટરની નજીક હોય તો 5GHz બેન્ડનો ઉપયોગ કરો. કારણ કે તેમાં સામાન્ય રીતે ઓછી ભીડ હોય છે અને સારી સ્પીડ મળે છે.

જ્યારે 2.4GHz બેન્ડ વધુ દૂર સુધી સિગ્નલ પહોંચાડવા માટે સારું હોય છે. રાઉટરના એડમિન પેનલમાં જઈને ઓછો ઉપયોગ થતી ચેનલ પસંદ કરી શકાય છે. તેનાથી નેટવર્ક ટ્રાફિક ઓછો થઈ શકે છે અને ઈન્ટરનેટ વધુ સારી રીતે ચાલી શકે છે.

આ કામ કરવાથી પણ સ્પીડ વધશે

ઘણીવાર આપણા Wi-Fiનો પાસવર્ડ આસપાસના લોકો અને સંબંધીઓને ખબર પડી જાય છે. જેના કારણે અનેક ડિવાઇસ ચુપચાપ Wi-Fi સાથે કનેક્ટ રહે છે અને બેકગ્રાઉન્ડમાં ડેટાનો ઉપયોગ કરતા રહે છે.

તમારા પોતાના ફોન, લેપટોપ અને Smart TVમાં રહેલી બિનજરૂરી એપ્સ અને બેકગ્રાઉન્ડ ડેટા પણ નેટવર્ક પર વધારાનો લોડ કરી શકે છે. સમયાંતરે રાઉટરના એડમિન પેજ પર જઈને ચેક કરતા રહો કે તમારા નેટવર્ક સાથે કયા-કયા ડિવાઇસ કનેક્ટેડ છે. કોઈ અજાણ્યું ડિવાઇસ જોવા મળે તો તેને બ્લોક કરી દો અને Wi-Fi પાસવર્ડ બદલી નાખો.

આ ઉપરાંત અઠવાડિયામાં ઓછામાં ઓછું એક વખત તમારા Wi-Fi રાઉટરને Restart એટલે કે Reboot જરૂર કરો. તેનાથી રાઉટરની મેમરી રિફ્રેશ થઈ શકે છે અને કનેક્શનની કામગીરીમાં સુધારો થઈ શકે છે.

આ નાની-નાની બાબતોનું ધ્યાન રાખીને તમે કોઈ વધારાનો ખર્ચ કર્યા વગર તમારા ઘરના ઈન્ટરનેટ કનેક્શનને વધુ સારી રીતે ચલાવી શકો છો.