Hun To Bolish : હું તો બોલીશ : હિંસક વારસો

15 જુલાઈના રોજ અંકલેશ્વર GIDC વિસ્તારમાં સ્કૂલમાં થયેલા સામાન્ય ઝઘડાએ હિંસક સ્વરૂપ ધારણ કર્યું હતુ. ગાર્ડન સિટીથી FDDI કોલેજ રોડ પર ધોળા દિવસે મોપેડ સવાર બે બહેનોને કાર આંતરીને ઊભી રાખી, એક જ પરિવારના 4 સભ્યોએ બેટ અને ચપ્પલ વડે હુમલો કર્યો. આ હિંસક ઘટનાના CCTV ફૂટેજ પણ સોશિયલ મીડિયા પર વાયરલ થયા છે. અંકલેશ્વરની ગાર્ડન સિટીમાં રહેતા અને કેમિકલ ટ્રેડિંગનો વ્યવસાય કરતા મુકેશ સેંગરની બે પુત્રીઓ 15 જુલાઈના રોજ બપોરે એક્ટિવા પર ટ્યુશન જવા નીકળી હતી. આ દરમિયાન FDDI કોલેજ રોડ પર એક કારે તેમની મોપેડને આંતરીને ઊભી રાખી હતી. કારમાંથી ધોરણ 12 માં સાથે જ અભ્યાસ કરતી વિદ્યાર્થિની, તેના પિતા, માતા અને દાદી નીચે ઉતર્યા હતા. તું અમારી દીકરી સાથે કેમ ઝઘડો કરે છે? તેમ કહીને આ પરિવારે બંને બહેનો સાથે ગાળાગાળી કરી ઝપાઝપી શરૂ કરી દીધી હતી. પિતાએ કારમાંથી બેટ કાઢીને પુત્રીને આપ્યું હતું અને બંને બહેનો પર હુમલો કરાવ્યો હતો. આ સાથે જ માતા અને દાદીએ પણ બંને વિદ્યાર્થિનીઓને ચપ્પલ વડે બેફામ માર માર્યો હતો. રસ્તા પર આ દ્રશ્યો જોઈને સ્થાનિક લોકો એકઠા થઈ જતાં હુમલાખોર પરિવાર બંને બહેનોને ધમકી આપીને કાર લઈને ઘટનાસ્થળેથી ફરાર થઈ ગયો હતો. ઘટનાની જાણ થતાં જ બંને બહેનોના પિતા તાત્કાલિક સ્થળ પર પહોંચ્યા હતા અને ઇજાગ્રસ્ત પુત્રીઓને સારવાર અર્થે  હોસ્પિટલમાં ખસેડી હતી.