Gujarat Rain Forecast : ગુજરાતમાં 3 દિવસ વરસાદની આગાહી

Gujarat Rain Forecast : ગુજરાતમાં 3 દિવસ વરસાદની આગાહી

ગાંધીનગર: વેસ્ટર્ન ડિસ્ટર્બન્સ અને મોનસૂન ટ્રફને લીધે 24 જૂન સુધી રાજ્યમાં હળવાથી મધ્યમ વરસાદની આગાહી હવામાન વિભાગે કરી છે. હવામાન વિભાગ મુજબ વીજળીના કડાકા ભડાકા સાથે બે દિવસ રાજ્યના મોટાભાગના જિલ્લામાં વરસાદ વરસી શકે છે. આજે ચાર જિલ્લાને બાદ કરતા તમામ જિલ્લા અને સંઘ પ્રદેશમાં હવામાન વિભાગે વરસાદની આગાહી કરી છે. કાલે સૌરાષ્ટ્રના જૂનાગઢ, અમરેલી, ભાવનગર અને ગીર સોમનાથની સાથે ઉત્તર ગુજરાતના બનાસકાંઠા, સાબરકાંઠા, મહેસાણા અને અરવલ્લી જિલ્લામાં હળવોથી મધ્યમ વરસાદ વરસી શકે છે. મધ્ય ગુજરાતના મહીસાગર, ખેડા, પંચમહાલ, દાહોદ, આણંદ, વડોદરા અને છોટા ઉદેપુર જિલ્લા માટે પણ હવામાન વિભાગે વરસાદની આગાહી કરી છે. દક્ષિણ ગુજરાતના ભરૂચ, નર્મદા, સુરત, તાપી, નવસારી, ડાંગ અને વલસાડ જિલ્લામાં પણ હળવો વરસાદ વરસી શકે છે. સંઘ પ્રદેશ દીવ, દમણ અને દાદરાનગર હવેલીમાં પણ વરસાદની આગાહી કરાઈ છે. હવામાન વિભાગ મુજબ આજે અમદાવાદમાં વાદળછાયા વાતાવરણ વચ્ચે હળવો વરસાદ વરસી શકે છે. હાલ દરિયાકાંઠાના વિસ્તારોમાં દક્ષિણ-પશ્ચિમ દિશાથી પવન ફુંકાઈ રહ્યા છે. સૌરાષ્ટ્રમાં પણ આજે વરસાદની માહોલ જામ્યો હતો. રાજકોટ શહેર અને જિલ્લાના વાતાવરણમાં અચાનક પલટો આવ્યો હતો. હવામાન વિભાગની આગાહી વચ્ચે ગોંડલ અને જસદણ પંથકમાં ધીમીધારે વરસાદ વરસ્યો હતો.