ખેડૂતોના ખાતામાં સીધા જમા થશે પૈસા! ₹2585 ના ભાવે ઘઉંની ખરીદી માટે આ રીતે કરાવો નોંધણી, હેલ્પલાઇન નંબર જાહેર
રવિ સીઝન 2026-27: ઓનલાઇન નોંધણી પ્રક્રિયા શરૂ, 4 March થી 15 May સુધી ચાલશે ખરીદી; VCE મારફતે બાયોમેટ્રિક પદ્ધતિથી થશે કામગીરી, જાણો કયા દસ્તાવેજોની પડશે જરૂર.
Wheat MSP Price Gujarat 2026-27: ગુજરાતના ખેડૂતો માટે રાજ્ય સરકાર દ્વારા ખેતપેદાશોના યોગ્ય ભાવ મળી રહે તે દિશામાં મોટો નિર્ણય લેવામાં આવ્યો છે. રાજ્યના ધરતીપુત્રોને તેમના પરસેવાની કમાણીના પોષણક્ષમ અને ન્યાયી ભાવ મળી રહે તે હેતુથી 'રવિ માર્કેટીંગ સીઝન 2026-27' અંતર્ગત લઘુત્તમ ટેકાના ભાવે (MSP) ઘઉંની ખરીદી કરવાની સત્તાવાર જાહેરાત કરવામાં આવી છે. ભારત સરકાર દ્વારા આ વર્ષ માટે ઘઉંનો ટેકાનો ભાવ ₹2585 પ્રતિ ક્વિન્ટલ (એટલે કે ₹517 પ્રતિ મણ) નક્કી કરવામાં આવ્યો છે, જે ગત વર્ષોની તુલનામાં આકર્ષક છે. આ સમગ્ર ખરીદી પ્રક્રિયાનું સંચાલન 'ગુજરાત રાજ્ય નાગરિક પુરવઠા નિગમ લિમિટેડ' દ્વારા કરવામાં આવશે.
જે ખેડૂત મિત્રો પોતાના ઘઉં ટેકાના ભાવે સરકારને વેચવા માંગતા હોય, તેમણે નિર્ધારિત સમયમર્યાદામાં ઓનલાઇન નોંધણી કરાવવી ફરજિયાત છે. રજીસ્ટ્રેશનની પ્રક્રિયા અત્યારે ચાલુ છે અને તેની છેલ્લી તારીખ 1 માર્ચ, 2026 નક્કી કરવામાં આવી છે. નોંધણી કરાવ્યા બાદ, વાસ્તવિક ખરીદીની પ્રક્રિયા 4 માર્ચ, 2026 થી શરૂ થશે અને 15 મે, 2026 સુધી ચાલશે. આ લાંબો સમયગાળો એટલા માટે રાખવામાં આવ્યો છે જેથી રાજ્યના તમામ વિસ્તારોના ખેડૂતો પોતાની અનુકૂળતા મુજબ પાક તૈયાર કરી વેચાણ કરી શકે.
નોંધણીની પ્રક્રિયાને સરળ બનાવવા માટે સરકારે ગ્રામીણ કક્ષાએ વ્યવસ્થા ઉભી કરી છે. ખેડૂતોએ નોંધણી માટે કોઈ સરકારી કચેરીના ધક્કા ખાવાની જરૂર નથી, તેઓ પોતાના જ ગામમાં ગ્રામ પંચાયત ખાતે 'વીલેજ કોમ્પ્યુટર એન્ટરપ્રેન્યોર' (VCE) પાસે જઈને ઓનલાઇન રજીસ્ટ્રેશન કરાવી શકે છે. આ વખતે પારદર્શિતા જાળવવા માટે સરકારે વિશેષ જોગવાઈ કરી છે, જેમાં ખેડૂત ખાતેદારોનું 'બાયોમેટ્રિક ઓથેન્ટીકેશન' (આંગળાની છાપ) લેવામાં આવશે. આ જ પદ્ધતિ જ્યારે ખેડૂત પાક વેચવા કેન્દ્ર પર જશે ત્યારે પણ અમલમાં રહેશે, જેથી વચેટિયાઓની કોઈ શક્યતા રહે નહીં.
રજીસ્ટ્રેશન કરાવવા જતી વખતે ખેડૂતોએ કેટલાક જરૂરી દસ્તાવેજો પોતાની સાથે રાખવાના રહેશે. જેમાં મુખ્યત્વે આધાર કાર્ડની નકલ, અદ્યતન ગામ નમૂનો 7/12 અને 8-A ની નકલનો સમાવેશ થાય છે. એક મહત્વની સૂચના એ છે કે જો સાત-બારના ઉતારામાં ઘઉંની વાવણી અંગેની એન્ટ્રી ન પડી હોય, તો ખેડૂતે તલાટી-કમ-મંત્રીનો સહી-સિક્કા વાળો વાવણીનો દાખલો રજૂ કરવાનો રહેશે. આ ઉપરાંત, પૈસા સીધા ખાતામાં જમા થાય તે માટે બેંક પાસબુકની નકલ અથવા કેન્સલ ચેક પણ આપવો પડશે, જેમાં ખેડૂતનું નામ અને ખાતા નંબર સ્પષ્ટ હોવા જોઈએ.
એકવાર સફળતાપૂર્વક નોંધણી થઈ ગયા બાદ, ખેડૂતોએ પોતાના વારાની રાહ જોવાની રહેશે. પુરવઠા નિગમ દ્વારા જ્યારે પણ જે-તે ખેડૂતનો ખરીદી માટેનો ક્રમ આવશે, ત્યારે તેમને તેમના રજીસ્ટર્ડ મોબાઈલ નંબર પર 'SMS' દ્વારા જાણ કરવામાં આવશે. આ મેસેજમાં કઈ તારીખે અને કયા ખરીદી કેન્દ્ર પર ઘઉં લઈને જવાનું છે તેની વિગતવાર માહિતી હશે. ખેડૂતે જ્યારે પણ કેન્દ્ર પર જવાનું થાય ત્યારે પોતાની ઓળખ માટે અસલ આધાર કાર્ડ સાથે રાખવું અનિવાર્ય છે.
નોંધણી કે ખરીદી પ્રક્રિયા દરમિયાન જો કોઈ ખેડૂતને મુશ્કેલી પડે અથવા કોઈ પ્રશ્ન હોય, તો તેની સહાય માટે સરકારે હેલ્પલાઈન નંબરો પણ જાહેર કર્યા છે. ખેડૂતો 8511171718 અથવા 8511171719 પર સંપર્ક કરીને માર્ગદર્શન મેળવી શકે છે. રાજ્ય સરકારના આ આગોતરા આયોજનથી ખેડૂતોને સીઝન દરમિયાન ખુલ્લા બજારમાં નીચા ભાવે પાક વેચવાની મજબૂરી નહીં રહે અને સીધા તેમના બેંક ખાતામાં ટેકાના ભાવની રકમ જમા થઈ જશે.
ટોપ સ્ટોરી
ટ્રેન્ડિંગ સમાચાર
