ગુજરાતમાં ખરીફ સિઝનનું 70% વાવેતર પૂર્ણ, કપાસ અને મગફળી તરફ ખેડૂતોનો સૌથી વધુ ઝુકાવ

સારો વરસાદ થતાં રાજ્યમાં 59.26 લાખ હેક્ટરમાં વાવેતર સંપન્ન; સોયાબીન અને કઠોળના વાવેતરમાં પણ નોંધપાત્ર ઉછાળો જોવા મળ્યો.

gujarat kharif sowing reaches 70 percent cotton groundnut lead 2026

Source : ai

Show Quick Read

Key points generated by AI, verified by newsroom

• ગુજરાતમાં ૭૦% ખરીફ વાવેતર પૂર્ણ, કપાસ-મગફળી મુખ્ય પાક.
• સોયાબીન, કઠોળના વાવેતરમાં નોંધપાત્ર ઉત્સાહ, વૃદ્ધિ જોવાઈ.
• ધાન્ય પાકો ૮.૩૯ લાખ હેક્ટર, જુવારનું વાવેતર બમણું થયું.

Gujarat kharif sowing 2026: ગુજરાતમાં સારો વરસાદ થતા જ ખેડૂતોએ ખેતરોમાં ધમધમાટ શરૂ કરી દીધો છે અને ચાલુ ખરીફ સિઝનમાં વાવેતરની કામગીરીએ ભારે જોર પકડ્યું છે. કૃષિ વિભાગના લેટેસ્ટ આંકડા મુજબ, રાજ્યમાં સામાન્ય વાવેતર વિસ્તારની સામે અત્યાર સુધીમાં 70% એટલે કે 59.26 લાખ હેક્ટરમાં વાવેતર પૂરું થઈ ગયું છે. ખાસ વાત એ છે કે, ગુજરાતના ખેડૂતોએ ફરી એકવાર રોકડિયા અને તેલીબિયાં પાકો પર પોતાનો સૌથી વધુ ભરોસો મૂક્યો છે, જેમાં કપાસ અને મગફળીનું વાવેતર સૌથી મોખરે છે અને કુલ વાવેતરમાં તેમનો જ હિસ્સો 63% થી વધુ છે.

કપાસ અને મગફળીનો દબદબો

રાજ્યના કૃષિ અર્થતંત્રમાં કરોડરજ્જુ સમાન ગણાતા કપાસનું સૌથી વધુ 20 લાખ હેક્ટરમાં વાવેતર થયું છે. બીજા નંબરે મગફળી આવે છે, જેનું વાવેતર 17.50 લાખ હેક્ટરથી વધુ વિસ્તારમાં નોંધાયું છે. આ આંકડાઓ પરથી સ્પષ્ટ અંદાજ લગાવી શકાય છે કે દર વર્ષની જેમ ચાલુ વર્ષે પણ ખેડૂતોનો ઝુકાવ સૌથી વધુ તેલીબિયાં અને રોકડિયા પાકો તરફ જ રહ્યો છે.

સોયાબીન અને અન્ય પાકોમાં ખેડૂતોનો જબરદસ્ત ઉત્સાહ

ચાલુ ખરીફ સિઝનમાં ખેડૂતોએ સોયાબીનના વાવેતરમાં અભૂતપૂર્વ ઉત્સાહ બતાવ્યો છે. રાજ્યમાં સોયાબીનના 2.79 લાખ હેક્ટર વિસ્તારમાં વાવેતર પૂર્ણ થઈ ગયું છે. સામાન્ય વાવેતર વિસ્તારની સરખામણીએ જો ટકાવારી કાઢીએ તો મુખ્ય પાકોની સ્થિતિ નીચે મુજબ છે:

પાકનું નામ સામાન્ય વિસ્તારની સામે વાવેતર પૂર્ણ (%)

સોયાબીન 99%

મગફળી 91%

મકાઈ 90%

અડદ 86%

કપાસ 84%

કઠોળ પાકોના વાવેતરમાં પણ સારો સુધારો

ગયા વર્ષની સરખામણીએ આ વર્ષે કઠોળ પાકોના વાવેતરમાં નોંધપાત્ર સુધારો જોવા મળ્યો છે. ગયા વર્ષે આ જ સમયગાળામાં કઠોળનું વાવેતર 2.52 લાખ હેક્ટરમાં હતું, જે ચાલુ વર્ષે વધીને 2.85 લાખ હેક્ટર સુધી પહોંચી ગયું છે (જે સામાન્ય વિસ્તારના 68% થાય છે).

તુવેર: 1.94 લાખ હેક્ટરમાં વાવેતર (76%)

અડદ: 70,772 હેક્ટરમાં વાવેતર (86%)

મગ: 11,900 હેક્ટરમાં વાવેતર (21%)

આ પણ વાંચોઃ શું ખેડૂતોની લોન માફ થશે? સંસદમાં વિપક્ષના સવાલ પર સરકારે આપી દીધો સ્પષ્ટ જવાબ

ધાન્ય પાકો અને જુવારમાં ઉછાળો

રાજ્યમાં ધાન્ય પાકોનું કુલ વાવેતર 8.39 લાખ હેક્ટરમાં (61%) નોંધાયું છે. જેમાં 4.63 લાખ હેક્ટર સાથે ડાંગર પહેલા ક્રમે અને 2.54 લાખ હેક્ટર સાથે મકાઈ બીજા ક્રમે છે. ડાંગરની રોપણી હજુ ચાલુ હોવાથી આગામી દિવસોમાં આ આંકડો વધવાની પૂરી સંભાવના છે. આશ્ચર્યજનક રીતે, રાજ્યમાં જુવારનું વાવેતર ચાલુ વર્ષે 10,301 હેક્ટરમાં થયું છે, જે ગયા વર્ષે આ સમયગાળામાં માત્ર 4,319 હેક્ટર હતું (એટલે કે બમણાથી પણ વધુ ઉછાળો).

દિવેલા, ઘાસચારો અને શાકભાજીની સ્થિતિ

દિવેલા અને તલ: હાલમાં દિવેલા (એરંડા) નું વાવેતર 52,655 હેક્ટર અને તલનું વાવેતર 7,597 હેક્ટરમાં થયું છે. દિવેલાનું વાવેતર મુખ્યત્વે ઓગસ્ટ મહિનામાં થતું હોવાથી આગામી બે અઠવાડિયામાં તેનો વિસ્તાર વધવાની શક્યતા છે.

અન્ય પાકો: પશુઓ માટે ઘાસચારાનું વાવેતર 5.21 લાખ હેક્ટરમાં (સામાન્ય વિસ્તારના 51%) થયું છે. આ ઉપરાંત શાકભાજીનું 1.71 લાખ હેક્ટરમાં (64%) અને બાજરાનું 1.06 લાખ હેક્ટરમાં (60%) વાવેતર પૂર્ણ થઈ ચૂક્યું છે.

આ પણ વાંચોઃ PM કિસાન યોજના: આ ખેડૂતોના ખાતામાં સૌથી પહેલા આવશે 24મા હપ્તાના પૈસા, ચેક કરો લિસ્ટ