5000 કરોડના કૌભાંડનો મુખ્ય સૂત્રધાર અમદાવાદનો યુવક, મુંબઇ પોલીસના શહેરમાં ધામા, જાણો ક્યા પડાયા દરોડા

અમદાવાદ: સમગ્ર દેશમાં ખળભળાટ મચાવનારા દેશના સૌથી મોટા કોલ સેન્ટરની તપાસના તાર અમદાવાદ સુધી પહોંચ્યા છે. આ કૌભાંડનો માસ્ટરમાઇન્ડ અમદાવાદનો હોવાનું સામે આવતા થાણે ક્રાઇમબ્રાન્ચ અને મુંબઇ પોલીસે અમદાવાદના પ્રહલાદનગર વિસ્તારમાં આવેલા પિનેકલ બિઝનેસ પાર્કમાં ચાલતા પાંચ કોલ સેન્ટર પર રેડ મારી છે. નોંધનીય છે કે થોડા દિવસો અગાઉ મુંબઇમાં ચાલતા બોગસ કોલ સેન્ટરનો ભેદ ઉકેલાયો હતો. અહીં છેતરપિંડી કરી રોજના એક કરોડ રૂપિયાની કમાણી કરતા હતા.

જો કોઇ કર્મચારીઓ વિદેશીઓને ઠગવામાં સારી કામગીરી કરી હોય તો તેમને બે થી 20 હજાર રૂપિયા સુઘીનું ઇન્સેટિવ આપવામાં આવતું હતું. વિદેશમાં બેઠેલા ઓપરેટર દ્વારા વિદેશી નાગરિકોના ડેટા અમદાવાદ મોકલવામાં આવતો હતો ત્યાર બાદ તમામ લોકોને ફોન કોલ્સ થતા હતા. જોકે સાગર ઠક્કર તમામ કોલ સેન્ટર બંધ કરીને ફરાર થઇ ગયો છે. આ કેસમાં હાલ તો સાગર ઠક્કરની ધરપકડ કરવા માટે પોલીસ તનતોડ મહેનત કરી રહી છે. આનંદનગર, નવરંગપુરા જેવા વિસ્તારોમાં અગાઉ પોલીસે આવા ગેરકાયદે કોલ સેન્ટરો પર દરોડા પાડ્યા હતા.