ભક્તિ માટે શ્રેષ્ઠ પણ શુભ પ્રસંગો માટે નિષેધ: જાણો હોળાષ્ટકના આ 8 દિવસોમાં શું કરવું અને શું ટાળવું?
હોળાષ્ટક 2026 ક્યારથી શરૂ થાય છે? 24 February થી 3 March સુધી શુભ કાર્યો કેમ ન કરવા? જાણો હોળાષ્ટકનું મહત્વ, પૌરાણિક કથા અને પૂજા વિધિ વિશેની સંપૂર્ણ વિગતવાર માહિતી.
Holashtak 2026 starting date: હિન્દુ ધર્મમાં હોળીના તહેવારનું જેટલું મહત્વ છે, તેટલું જ મહત્વ તેની પહેલા આવતા 'હોળાષ્ટક'નું પણ છે. આ વર્ષે 24 February 2026 થી હોળાષ્ટકનો પ્રારંભ થઈ રહ્યો છે, જે હોળીકા દહન એટલે કે 2 March 2026 સુધી ચાલશે. જ્યોતિષશાસ્ત્ર અને પૌરાણિક માન્યતાઓ અનુસાર, હોળીના આઠ દિવસ પહેલાનો આ સમયગાળો અત્યંત સંવેદનશીલ અને અશુભ માનવામાં આવે છે, તેથી જ આ દરમિયાન લગ્ન, ગૃહપ્રવેશ અને નવા વ્યવસાય જેવા તમામ માંગલિક કાર્યો પર નિષેધ મૂકવામાં આવે છે. પૃથ્વી પર નકારાત્મક શક્તિઓનો પ્રભાવ વધતો હોવાથી ભક્તોને આ સમય દરમિયાન માત્ર ભક્તિ અને સાધનામાં ધ્યાન પરોવવા માટે સૂચવવામાં આવે છે.
હોળાષ્ટક એટલે શું? જાણો તેનું પૌરાણિક મહત્વ
'હોળાષ્ટક' શબ્દ 'હોળી' અને 'અષ્ટક' (આઠ) મળીને બન્યો છે. ફાલ્ગુન માસના શુક્લ પક્ષની અષ્ટમી તિથિથી શરૂ થઈને પૂર્ણિમા સુધીના આ આઠ દિવસો ભારે માનવામાં આવે છે. પૌરાણિક કથા મુજબ, અસુરોનો રાજા હિરણ્યકશ્યપ તેના પરમ વિષ્ણુ ભક્ત પુત્ર પ્રહલાદને ભક્તિ માર્ગ પરથી હટાવવા માંગતો હતો. આ માટે તેણે હોળીકા દહનના આઠ દિવસ પહેલા પ્રહલાદને અસહ્ય યાતનાઓ આપવાનું શરૂ કર્યું હતું. આ આઠ દિવસોમાં પ્રહલાદ પર થયેલા જુલમને કારણે વાતાવરણમાં શોક અને નકારાત્મકતા ફેલાઈ હતી. જોકે, આઠમા દિવસે પ્રહલાદનો વિજય થયો અને હોળીકા બળીને ભસ્મ થઈ ગઈ. આ જ કારણ છે કે આ સમયગાળાને શુભ કાર્યો માટે અયોગ્ય ગણવામાં આવે છે.
હોળાષ્ટક 2026: શું ન કરવું? (નિષેધ કાર્યોની યાદી)
હોળાષ્ટક શરૂ થતાની સાથે જ હિન્દુ સંસ્કૃતિના 16 સંસ્કારો સહિતના તમામ માંગલિક કાર્યો થંભી જાય છે. આ દરમિયાન નીચેની પ્રવૃત્તિઓ ટાળવી જોઈએ:
- માંગલિક પ્રસંગો: લગ્ન, સગાઈ કે જનોઈ જેવા સંસ્કારો આ સમયમાં કરવા જોઈએ નહીં.
- નવી ખરીદી: નવું ઘર, જમીન કે વાહન ખરીદવાનું ટાળવું જોઈએ. તેમજ સોના ચાંદીના દાગીનાની ખરીદી પણ અશુભ માનવામાં આવે છે.
- ગૃહ પ્રવેશ: નવા મકાનમાં પ્રવેશ કરવો કે ઓફિસનું ઉદ્ઘાટન કરવું આ દિવસોમાં વર્જિત છે.
- નવો વેપાર: કોઈ પણ નવો વ્યવસાય કે પ્રોજેક્ટ આ આઠ દિવસોમાં શરૂ કરવો જોઈએ નહીં.
- વિશેષ માન્યતા: નવપરિણીત સ્ત્રીઓએ તેમના સાસરિયાના ઘરે પ્રથમ હોળી ન જોવી જોઈએ તેવી પણ પરંપરા પ્રચલિત છે.
ભક્તિ અને દાનનો મહિમા: શું કરવું જોઈએ?
ભલે આ સમય શુભ કાર્યો માટે પ્રતિબંધિત હોય, પરંતુ ધાર્મિક દ્રષ્ટિએ મંત્ર સાધના માટે તે શ્રેષ્ઠ માનવામાં આવે છે.
- મહામૃત્યુંજય મંત્ર: સ્વાસ્થ્ય સંબંધી સમસ્યાઓ દૂર કરવા માટે આ દિવસોમાં મહામૃત્યુંજય મંત્રનો જાપ અત્યંત ફળદાયી નીવડે છે.
- દાન પુણ્ય: હોળાષ્ટક દરમિયાન ગરીબોને અન્ન, વસ્ત્ર કે જરૂરિયાતની વસ્તુઓનું દાન કરવાથી વિશેષ પુણ્ય પ્રાપ્ત થાય છે.
- ભજન કીર્તન: ભગવાન વિષ્ણુ અને ઈષ્ટદેવની પૂજા કરવાથી માનસિક શાંતિ મળે છે અને નકારાત્મકતા દૂર થાય છે.
- વૈદિક અનુષ્ઠાન: જો કોઈ ગ્રહદોષ હોય તો નિષ્ણાત જ્યોતિષીની સલાહ લઈ ધાર્મિક વિધિઓ કરી શકાય છે.
ટોપ સ્ટોરી
ટ્રેન્ડિંગ સમાચાર
