Ahmedabad Rain: અમદાવાદમાં બપોર બાદ શરૂ થયો ધોધમાર વરસાદ

 અમદાવાદ શહેરમાં બપોર બાદ વાતાવરણમાં એકાએક પલટો આવ્યો હતો અને ભારે પવન સાથે ધોધમાર વરસાદ શરૂ થઈ ગયો હતો. પૂર્વ વિસ્તારથી શરૂ થયેલો વરસાદ ધીમે ધીમે પશ્ચિમ તરફ આગળ વધ્યો હતો, જેના કારણે સમગ્ર શહેરમાં વરસાદી માહોલ જામ્યો છે. શહેરના નરોડા, એરપોર્ટ, હંસપુરા, કૃષ્ણનગર, બાપુનગર, નારોલ, ઠક્કરબાપા નગર, શાહીબાગ, વસ્ત્રાલ તેમજ પશ્ચિમ વિસ્તારના ઉસ્માનપુરા અને ઈન્કમટેક્સ સહિતના અનેક વિસ્તારોમાં મુસળધાર વરસાદ ખાબક્યો હતો. વરસાદ શરૂ થતાં જ નરોડા અને કૃષ્ણનગર જેવા વિસ્તારોમાં નીચાણવાળા રસ્તાઓ પર પાણી ભરાવવાની શરૂઆત પણ થઈ ગઈ હતી.

આ દરમિયાન, એરપોર્ટ અને આસપાસના વિસ્તારોમાં પડેલા ભારે વરસાદને કારણે વિઝિબિલિટીમાં મોટા પ્રમાણમાં ઘટાડો નોંધાયો હતો, જેના કારણે રસ્તા પરથી પસાર થઈ રહેલા વાહનચાલકોને ભારે હાલાકીનો સામનો કરવો પડ્યો હતો. વાહનચાલકોને હેડલાઈટ ચાલુ રાખીને વાહન ચલાવવાની ફરજ પડી હતી. પૂર્વથી લઈને પશ્ચિમ અમદાવાદના મોટાભાગના વિસ્તારોમાં એકસાથે ઝાપટાં અને તોફાની વરસાદ શરૂ થતાં સમગ્ર શહેરમાં ઠંડક પ્રસરી ગઈ છે.