બિસ્કિટ આપવાના બહાને બાળકીને ડુંગરમાં લઈ જઈ આચર્યું દુષ્કર્મ, માતા આવતાં જ નરાધમ ભાગ્યો

માલપુર તાલુકાના એક ગામમાં બિસ્કિટ લેવા ગયેલી ધોરણ 3 ની વિદ્યાર્થિનીને જંગલમાં લઈ જઈને નાના ખાંટ નામના આરોપીએ પીંખી નાખી. આરોપી અગાઉ પણ દુષ્કર્મના કેસમાં ઝડપાઈ ચૂક્યો છે.

aravalli malpur child assault case accused nana khant arrested details

Source : abp asmita

Show Quick Read

Key points generated by AI, verified by newsroom

• અરવલ્લીમાં ૮ વર્ષની બાળકી પર ગામના શખ્સે દુષ્કર્મ આચર્યું.
• પોલીસે ગણતરીના કલાકોમાં આરોપી નાના ખાંટને ઝડપી પાડ્યો.
• આરોપી અગાઉ પણ આવા જ ગુનામાં જામીન પર છૂટેલો હતો.
• પોલીસે પોક્સો હેઠળ ગુનો નોંધી, જામીન રદ કરવાની કાર્યવાહી કરી.

Aravalli Crime News: અરવલ્લી જિલ્લાના માલપુર તાલુકામાંથી એક હચમચાવી દે તેવી ઘટના સામે આવી છે. અહીં એક 8 વર્ષની માસૂમ બાળકીને ગામના જ એક હેવાને પોતાની વાસનાનો શિકાર બનાવી છે. ધોરણ 3 માં અભ્યાસ કરતી આ બાળકી પર દુષ્કર્મ ગુજારનાર આરોપી નાના ખાંટને પોલીસે ગણતરીના કલાકોમાં ઝડપી પાડીને જેલના સળિયા પાછળ ધકેલી દીધો છે. આ આરોપી અગાઉ 2 વર્ષ પહેલાં પણ એક મહિલા પર દુષ્કર્મ ગુજારવાના આરોપમાં જેલની હવા ખાઈ ચૂક્યો છે અને હાલ જામીન પર બહાર હતો. જામીન પર છૂટીને તેણે ફરીથી આ જઘન્ય અપરાધને અંજામ આપ્યો છે.

આ સમગ્ર કંપાવનારી ઘટનાની વિગતે વાત કરીએ તો, માલપુર તાલુકાના એક ગામમાં રહેતી 8 વર્ષની બાળકી પોતાના ઘરની નજીક આવેલા એક ગલ્લા (દુકાન) પર બિસ્કિટ લેવા માટે ગઈ હતી. આ જ સમયે ગલ્લા પર બેઠેલા નાનાભાઈ રમણભાઈ ખાંટ નામના આરોપીની નજર આ ફૂલ જેવી માસૂમ પર બગડી. તેણે બાળકીને લલચાવી-ફોસલાવીને નજીકમાં આવેલા ડુંગર અને જંગલ વિસ્તાર તરફ લઈ ગયો હતો. ત્યાં આ નરાધમે બાળકી સાથે બળજબરી કરી, અત્યંત ક્રૂરતાપૂર્વક મારામારી કરી અને તેને બચકાં પણ ભર્યા. અંતે તેણે બાળકી પર દુષ્કર્મ આચર્યું.

બાળકીએ પીડાના માર્યા બૂમાબૂમ કરી મૂકતા તેની માતાનો જીવ તાળવે ચોંટ્યો અને તે તાત્કાલિક અવાજ આવતો હતો તે દિશામાં ડુંગર તરફ દોડી ગઈ. બાળકીની માતાને ત્યાં આવતી જોઈને આરોપી એટલો ગભરાઈ ગયો કે તે અર્ધનગ્ન હાલતમાં જ ત્યાંથી રફુચક્કર થઈ ગયો. આ ભયાનક ઘટના બાદ પીડિત બાળકીના પરિવારજનોએ ભારે હૈયે પોલીસમાં ફરિયાદ નોંધાવી હતી. મામલાની ગંભીરતાને જોતા પોલીસે પણ તાત્કાલિક એક્શનમાં આવીને આરોપી નાના ખાંટને વાંકાનેડા ગામેથી દબોચી લીધો હતો.

આ પણ વાંચોઃ લોકોના સ્વાસ્થ્ય સાથે ગંભીર ચેડાં: અમદાવાદમાં 1768 કિલો નકલી ઘી, રાજકોટમાં 5400 લીટર દૂધ ઝડપાયું

આરોપીની ધરપકડ કર્યા બાદ પોલીસે તેને સાથે રાખીને ઘટનાસ્થળ પર સમગ્ર ક્રાઈમ સીનનું રિ-કન્સ્ટ્રક્શન (Re-construction) પણ કર્યું હતું. પોલીસની સઘન તપાસમાં એ ખુલાસો થયો છે કે આ ગુનેગાર માનસિકતા ધરાવતો શખ્સ અગાઉ પણ આવા જ એક ગુનામાં પકડાયો હતો. હાલમાં પોલીસે આ આરોપી વિરુદ્ધ પોક્સો (POCSO) એક્ટ અને દુષ્કર્મ સહિતની અલગ-અલગ કડક કલમો હેઠળ ગુનો દાખલ કરી વધુ તપાસ હાથ ધરી છે. આ સાથે જ તેના જૂના કેસના જામીન રદ કરાવવા માટે પણ પોલીસે કાયદાકીય પગલાં લેવાની શરૂઆત કરી દીધી છે.

આ પણ વાંચોઃ અમદાવાદના શાહપુરમાં નકલી દારૂ બનાવતી ફેક્ટરી ઝડપાઈ: 4 આરોપીઓ ઝડપાયા, મુખ્ય સૂત્રધાર ફરાર