પતિને કિડની વેચવા પત્નીએ કર્યો તૈયાર, બાદમાં 10 લાખ રૂપિયા લઇને બોયફ્રેન્ડ સાથે ફરાર

એક મહિલાએ તેના પતિને કિડની વેચવા માટે મનાવી લીધો અને બદલામાં મળેલા 10 લાખ રૂપિયા લઈને તેના પ્રેમી સાથે ભાગી ગઈ હતી

પ્રતિકાત્મક તસવીર

Source : ફોટોઃ abp live

પશ્ચિમ બંગાળના હાવડા જિલ્લામાં એક ચોંકાવનારી ઘટના સામે આવી છે. એક મહિલાએ તેના પતિને કિડની વેચવા માટે મનાવી લીધો અને બદલામાં મળેલા 10 લાખ રૂપિયા લઈને તેના પ્રેમી સાથે ભાગી ગઈ હતી. આ મામલો સામે આવ્યા બાદ પોલીસે તપાસ શરૂ કરી છે.

પત્નીએ કિડની વેચવા માટે દબાણ કર્યું

ન્યૂઝ એજન્સીના અહેવાલ મુજબ, પીડિત વ્યક્તિના પરિવારે તેને લઇને સાંકરાઇલ પોલીસ સ્ટેશનમાં ફરિયાદ નોંધાવી છે જેમાં કહેવામાં આવ્યું છે કે તેની પત્ની છેલ્લા એક વર્ષથી તેની કિડની વેચવા માટે દબાણ કરી રહી હતી. તેમણે દલીલ કરી હતી કે આમ કરીને તેઓ તેમના પરિવારની આર્થિક સ્થિતિ સુધારી શકે છે અને તેમની 12 વર્ષની પુત્રીને સારી શાળામાં પ્રવેશ અપાવી શકે છે.

પત્નીની વાતથી પ્રભાવિત થઈને પતિએ પોતાની કિડની વેચવાનો નિર્ણય કર્યો. મહિલાએ ખરીદનાર સાથે 10 લાખ રૂપિયામાં સોદો કર્યો અને તેના પતિની ગયા મહિને સર્જરી થઈ હતી. જ્યારે પતિ પોતાની કિડની વેચીને ઘરે પાછો ફર્યો ત્યારે તેની પત્નીએ તેને આરામ કરવાની અને બહાર ન જવાની સલાહ આપી જેથી તે ઝડપથી સ્વસ્થ થઈ શકે. પરંતુ થોડા દિવસો પછી તે અચાનક ઘરેથી ગાયબ થઈ ગઈ. જ્યારે પતિએ તપાસ કરી ત્યારે તેને ખબર પડી કે કબાટમાંથી 10 લાખ રૂપિયા રોકડા અને બીજા કેટલાક પૈસા ગાયબ હતા.

પત્ની ફેસબુક પર મળેલા પ્રેમી સાથે ભાગી ગઈ હતી

પરિવાર અને મિત્રોની મદદથી તપાસ કર્યા બાદ પતિને ખબર પડી કે તેની પત્ની કોલકાતાના બેરકપુર વિસ્તારમાં બીજા પુરુષ સાથે રહે છે. ફરિયાદમાં એમ પણ કહેવામાં આવ્યું છે કે તેણી છેલ્લા એક વર્ષથી તેના પ્રેમી સાથે સંબંધમાં હતી, જેને તેણી ફેસબુક પર મળી હતી અને તે તેની સાથે ભાગી ગઈ હતી.

જ્યારે પરિવાર પહોંચ્યો ત્યારે પત્નીએ તેને મળવાની ના પાડી દીધી

જ્યારે પતિ, તેની માતા અને પુત્રી તે ઘરમાં પહોંચ્યા જ્યાં મહિલા રહેતી હતી. ત્યારે તેણીએ બહાર આવવાની ના પાડી દીધી. તેના પ્રેમીએ પરિવારને કહ્યું કે તે તેના પતિને છૂટાછેડા આપશે અને તેના સાસરિયાઓ પર શારીરિક અને માનસિક ત્રાસ આપવાનો આરોપ લગાવશે.

પત્નીએ કહ્યું, પૈસા ફક્ત મારી બચત માટે

મહિલાએ પોતાના પરના તમામ આરોપોને નકારી કાઢ્યા અને કહ્યું કે તેણે તેના પતિના ઘરેથી કોઈ પૈસા લીધા નથી. તેણીએ દાવો કર્યો કે તે ફક્ત તેની બચત જ લાવી હતી. પોલીસે પતિની ફરિયાદના આધારે કેસ નોંધ્યો છે. અધિકારીઓએ જણાવ્યું હતું કે મહિલા અને તેના પ્રેમીની પૂછપરછ કરવામાં આવશે અને કેસની સત્યતા જાણવામાં આવશે.