અમદાવાદમાં ઘરનું સ્વપ્ન થશે સાકાર: મુખ્યમંત્રી આવાસ યોજના હેઠળ 553 LIG ફ્લેટ્સનો ડ્રો! જાણો અરજી સહિતની તમામ વિગતો
આ 1 BHK ફ્લેટ્સ ભૂકંપ પ્રુફ બાંધકામ, આકર્ષક એલિવેશન, ફાયર સેફ્ટી જેવી આધુનિક સુવિધાઓથી સજ્જ છે.
Ahmedabad mukhyamantri awas yojana: અમદાવાદ મ્યુનિસિપલ કોર્પોરેશન (AMC) એ મુખ્યમંત્રી આવાસ યોજના હેઠળ ઓછી અને મધ્યમ આવક ધરાવતા પરિવારો માટે 553 LIG (લોઅર ઇન્કમ ગ્રુપ) આવાસોની ફાળવણી માટે ઓનલાઈન અરજીઓ આમંત્રિત કરી છે. આ આવાસો નિકોલ, ચાંદખેડા, રખિયાલ, વસ્ત્રાલ અને વેજલપુર જેવા અમદાવાદના મુખ્ય વિસ્તારોમાં આવેલા છે, જે વર્ષ 2016-17 માં બાંધવામાં આવ્યા હતા. અરજી પ્રક્રિયા જુલાઈ 30, 2025 થી શરૂ થઈ ગઈ છે અને સપ્ટેમ્બર 12 સુધી ચાલશે. વાર્ષિક રૂ. 3 લાખ થી રૂ. 6 લાખ સુધીની આવક ધરાવતા પરિવારો આ 1 BHK ફ્લેટ્સ માટે અરજી કરી શકશે, જેમાં ભૂકંપ પ્રુફ બાંધકામ, વિટ્રીફાઈડ ટાઈલ્સ, પાર્કિંગ, ફાયર સેફ્ટી અને ગ્રેનાઈટ કિચન પ્લેટફોર્મ જેવી સુવિધાઓ ઉપલબ્ધ છે. ફાળવણી કોમ્પ્યુટરાઇઝડ ડ્રો દ્વારા થશે અને મેઈન્ટેનન્સ રકમ રૂ. 50,000 નિર્ધારિત કરાઈ છે.
કયા વિસ્તારોમાં ઉપલબ્ધ છે આવાસો?
આ આવાસો અમદાવાદના અગ્રણી વિસ્તારો જેવા કે નિકોલ, ચાંદખેડા, રખિયાલ, વસ્ત્રાલ અને વેજલપુરમાં આવેલા છે. આ યુનિટ્સ વર્ષ 2016-17 માં બાંધવામાં આવ્યા હતા અને હાલમાં કુલ 553 યુનિટ્સ ખાલી છે, જેની ફાળવણી માટે AMC એ પ્રક્રિયા શરૂ કરી છે. આ વિસ્તારો શહેરી સુવિધાઓ અને કનેક્ટિવિટીની દ્રષ્ટિએ ખૂબ જ અનુકૂળ છે.
કોણ અરજી કરી શકશે?
LIG એટલે કે લોઅર ઇન્કમ ગ્રુપ હેઠળ આવતા પરિવારો આ આવાસો માટે અરજી કરી શકશે. આ યોજનાનો લાભ તે લોકો લઈ શકશે જેમની વાર્ષિક આવક રૂ. 3 લાખ થી રૂ. 6 લાખ સુધીની છે. આ પાત્રતા માપદંડ વધુને વધુ જરૂરિયાતમંદ પરિવારોને તેમના પોતાના ઘરના સ્વપ્નને સાકાર કરવામાં મદદરૂપ થશે.
આવાસોની વિશેષતાઓ:
AMC દ્વારા ઓફર કરવામાં આવી રહેલા આ 1 BHK ફ્લેટ્સ આકર્ષક સુવિધાઓથી સજ્જ છે, જે આધુનિક જીવનશૈલીને અનુરૂપ છે:
- ભૂકંપ પ્રુફ બાંધકામ: સુરક્ષાને પ્રાથમિકતા આપતું મજબૂત બાંધકામ.
- વીટ્રીફાઈડ ટાઈલ્સ ફ્લોરિંગ: આકર્ષક અને સરળ જાળવણીવાળું ફ્લોરિંગ.
- પાર્કિંગ સહિત અન્ય જગ્યા પર પેવર બ્લોકનું પેવિંગ: સુવ્યવસ્થિત પાર્કિંગ અને ચાલવા માટે સપાટી.
- આકર્ષક એલિવેશન: સુંદર અને આધુનિક બાહ્ય દેખાવ.
- ફાયર સેફ્ટી: આગ સામે રક્ષણ માટે જરૂરી સુવિધાઓ.
- ગ્રેનાઈટનું કિચન પ્લેટફોર્મ: ટકાઉ અને આકર્ષક રસોડું પ્લેટફોર્મ.
- પાવર કોટેડ એલ્યુમિનિયમ ગ્લાસ સ્લાઈડિંગ વિન્ડોઝ: આધુનિક અને કાર્યક્ષમ બારીઓ.
અરજી પ્રક્રિયા અને અંતિમ તારીખ
ઇચ્છુક અરજદારો AMC ની સત્તાવાર વેબસાઈટ https://ahmedabadcity.gov.in પર જઈને જુલાઈ 30, 2025 થી ઓનલાઈન ફોર્મ ભરી શકશે. ઓનલાઈન અરજી કરવાની છેલ્લી તારીખ સપ્ટેમ્બર 12, 2025 નિર્ધારિત કરવામાં આવી છે. સમયસર અરજી કરીને આ યોજનાનો લાભ લેવા AMC દ્વારા અપીલ કરવામાં આવી છે.
આ આવાસો માટે મેઈન્ટેનન્સની રકમ રૂ. 50,000 નિર્ધારિત કરવામાં આવી છે. આ તક અમદાવાદમાં પોતાનું ઘર ખરીદવાનું સ્વપ્ન જોતા પરિવારો માટે ખૂબ જ મહત્વપૂર્ણ સાબિત થશે. જે લોકો લાંબા સમયથી પોતાના ઘરની શોધમાં હતા, તેમના માટે આ એક સુવર્ણ અવસર છે.
ટોપ સ્ટોરી
ટ્રેન્ડિંગ સમાચાર
