બિન સચિવાલય કલાર્ક અને ઓફિસ આસિસટન્ટની પરીક્ષા યોજવા મુદ્દે મોટા સમાચાર, જાણો ક્યારે જાહેર થશે નવી તારીખ ?
ગુજરાત ગૌણ સેવા પસંદગી મંડળ દ્વારા રવિવારે લેવાનારી બિન સચિવાલય કલાર્ક અને ઓફિસ આસિસટન્ટની યોજાનારી પરીક્ષા ત્રીજી વાર મોકૂફ રાખવામાં આવી છે. આ પરીક્ષાની નવી તારીખ 15-20 દિવસમાં જાહેર થશે.
અમદાવાદ : ગુજરાત ગૌણ સેવા પસંદગી મંડળ દ્વારા રવિવારે લેવાનારી બિન સચિવાલય કલાર્ક અને ઓફિસ આસિસટન્ટની યોજાનારી પરીક્ષા ત્રીજી વાર મોકૂફ રાખવામાં આવી છે. આ પરીક્ષાની નવી તારીખ 15-20 દિવસમાં જાહેર થશે અને બે મહિનામાં પરીક્ષા લેવાશે એવું સરકારનાં સૂત્રોએ જણાવ્યું છે.
ગુજરાત ગૌણ સેવા પસંદગી મંડળે બુધવારે મોડી સાંજે સત્તાવાર જાહેરાત કરી હતી કે, વહીવટી કારણોસર પરીક્ષા મોકૂફ રાખવામાં આવી છે. હવે આગામી દિવસોમાં ફરી વાર પરીક્ષાની તારીખ જાહેર કરવામાં આવશે એવું કહેવાયું હતું પણ ક્યારે લેવાશે એ નક્કી નથી. ગુરૂવારે સરકારનાં સૂત્રોએ કહ્યું હતું કે, વહીવટી કારણોસર મોકૂફ રખાયેલી આ પરીક્ષાની નવી તારીખની 15-20 દિવસમાં જાહેરાત કરી દેવાશે.
ગુજરાત ગૌણ સેવા પસંદગી મંડળના નિર્ણયથી 10 લાખ પરીક્ષાર્થી નિરાશ છે. આ નિર્ણયથી પરીક્ષાર્થીઓમાં ભારે આક્રોશની લાગણી છે. ગુજરાત ગૌણ સેવા પસંદગી મંડળ દ્વારા બિન સચિવાલય કલાર્કની પરિક્ષા અગાઉ પણ રદ કરવામાં આવી હતી. 2018માં આ પરીક્ષાનું નોટિફિકેશન બહાર પડ્યું પછી બે વાર આ પરીક્ષા રદ થઇ ચૂકી છે.
આખરે ત્રણ વર્ષ બાદ ગુજરાત ગૌણ સેવા પસંદગી મંડળે પરીક્ષા યોજવા નિર્ણય લેતાં લાખો વિદ્યાર્થીઓએ પરિક્ષાની તૈયારીઓ કરી હતી. હવે પખવાડિયામાં જ સરકારે ગુલાટં લગાવી દીધી છે. બિન સચિવાલયની કલાર્કની 3901 જગ્યાઓ માટે રવિવારે પરિક્ષા યોજાવાની હતી.
ત્રણ વર્ષના લાંબા ઇન્તજાર બાદ પરિક્ષા યોજાવવાની હોઇ પરિક્ષાર્થીઓએ રાતદિવસ વાંચન કરી મહેનત કરી રહ્યાં હતાં. પાટનગર ગાંધીનગર સહિત અન્ય શહેરોમાં કોચિગ કલાસમાં જઇને તૈયારીઓ કરી રહ્યાં હતાં ત્યારે છેલ્લી ઘડીએ ગુજરાત ગૌણ સેવા પસંદગી મંડળે આ પરીક્ષા મોકુફ રાખવાની જાહેરાત કરી છે. રવિવારે યોજાનારી પરીક્ષામાં ગુજરાતભરમાંથી કુલ દસેક લાખ પરિક્ષાર્થીઓ ભાગ લેવાના હતાં.
પરીક્ષા મોકુફ રાખવાના નિર્ણયથી લાખો પરિક્ષાર્થીઓ નિરાશ થયા છે. ગુજરાત ગૌણ સેવા પસંદગી મંડળે પણ પરીક્ષા સેન્ટરો નક્કી કરીને પરીક્ષાની તૈયારીઓને આખરી ઓપ આપી દીધો હતો પણ છેલ્લે પરીક્ષા મોકૂફ રાખવાનો નિર્ણય લીધો છે.
ટ્રેન્ડિંગ સમાચાર
ટોપ સ્ટોરી
