Bhavnagar News: ભાવનગરમાં ડુપ્લીકેટ દારુ પીવાથી એકનું મોત, છની તબિયત લથડી

Bhavnagar News: ભાવનગર જિલ્લાના ઘોઘા તાલુકાના ખરકડી ગામે બે દિવસ પહેલા યોજાયેલી એક દારૂની પાર્ટી બાદ કરૂણાંતિકા સર્જાઈ હતી

એક દારૂની પાર્ટી બાદ કરૂણાંતિકા સર્જાઈ હતી

Source : ફોટોઃ એબીપી અસ્મિતા

Show Quick Read

Key points generated by AI, verified by newsroom

• ભાવનગરમાં નકલી દારૂ પીતા એકનું મોત, છની હાલત ગંભીર.
• ખરકડી ગામે દારૂ પાર્ટીમાં ૧૪ લોકો સામેલ હતા.
• ઠાસરામાં ગ્રામજનોએ દારૂના અડ્ડા પર દરોડો પાડ્યો.
• પોલીસે 188 વિદેશી દારૂની બોટલો જપ્ત કરી.

Bhavnagar News: ભાવનગર જિલ્લાના ઘોઘા તાલુકાના ખરકડી ગામે બે દિવસ પહેલા યોજાયેલી એક દારૂની પાર્ટી બાદ કરૂણાંતિકા સર્જાઈ હતી. મિજબાનીમાં કથિત રીતે દારૂનું સેવન કર્યા બાદ સાતેક યુવકની તબિયત લથડી હતી. જે પૈકી ઉપેન્દ્રસિંહ ગોહિલ નામના એક યુવકનું મોત થયું હતું જ્યારે અન્ય છને અલગ- અલગ હોસ્પિટલમાં સારવારમાં ખસેડાયા છે. પોલીસે મોડી સાંજે આ દારૂકાંડમાં લઠ્ઠાકાંડની આશંકા વ્યકત કરી હતી. 

ભાવનગરના જિલ્લા પોલીસવડા નિતેશ પાંડેયએ સ્પષ્ટ કર્યું કે નકલી રોયલ સ્ટેગ નામના દારૂનું સેવન કરતા એકનું મોત થયું છે જ્યારે અન્યોની તબિયત લથડી છે. ઘોઘાના ખરકડી ગામની વાડીમાં બે દિવસ પૂર્વે આ પાર્ટીનું આયોજન કરાયું હતું. આ પાર્ટીમાં ઉપેન્દ્રસિંહ ગોહિલ, વિશ્વરાજસિંહ ગોહિલ, ઘનશ્યામસિંહ જાડેજાએ દારૂની પાર્ટીની મોજ માણી હતી. પાર્ટી બાદ 35 વર્ષીય ઉપેન્દ્રસિંહને ઓચિંતા શ્વાસ લેવામાં તકલીફ થઈ હતી અને બાદમાં ઉલ્ટી- ઉબકા શરૂ થયા હતા. સ્થિતિ વણસતા તેમને તાત્કાલિક ભાવનગરની સર ટી હોસ્પિટલ ખસેડાયો હતો. જ્યાં સારવાર દરમિયાન તેનું મોત થયું હતું. આ દરમિયાન અન્ય સાથીદારો વિશ્વરાજસિંહ ગોહિલ, ઘનશ્યામસિંહ જાડેજા અને અજાણ્યા એક યુવકની તબિયત લથડતા અલગ -અલગ હોસ્પિટલ સારવારમાં ખસેડાયા હતા.

SDM તરફથી તૈયાર કરાયેલા રિપોર્ટમાં કુલ 14 વ્યકિતએ નશાનું સેવન કર્યાનો ખુલાસો થયો છે. SDMના રિપોર્ટ મુજબ મૃતક ઉપેન્દ્રસિંહ અને તેના ત્રણ મિત્રો વિશ્વરાજસિંહ, ઘનશ્યામસિંહ અને અજાણ્યા વ્યકિત ઉપરાંત બળદેવસિંહ ગોહિલ, કનકસિંહ ગોહિલ, હરપાલસિંહ ગોહિલ, હિતેશ જોશી, સંજયસિંહ ડોડિયા, સચિનભાઈ, કપિલ દેવમુરારી, અબ્દુલ હમીન ખાન, અભય દિહોરા અને ખિલાજી હાર્દિકનો સમાવેશ થાય છે. આ ઉપરાંત નરેન્દ્રસિંહ યાદવ નામના વ્યકિતનું શંકાસ્પદ મૃત્યું થયું છે.

ઠાસરા તાલુકામાં દારૂના દૂષણ સામે જનતાએ માંડ્યો મોરચો

ખેડા જિલ્લાના ઠાસરા તાલુકાના આજરોલી ગામે પોલીસની ઢીલી કામગીરી સામે ગ્રામજનોએ જાતે જ મોરચો માંડીને વિદેશી દારૂના અડ્ડા પર જનતા રેડ કરી છે. ગામમાં ખુલ્લેઆમ ચાલી રહેલા દારૂના વેચાણ અંગે ગ્રામજનોએ અગાઉ પોલીસને જાણ કરી હતી, પરંતુ પોલીસની તપાસમાં કંઈ જ હાથ લાગ્યું ન હતું. આખરે કંટાળેલા ગામના આશરે 30 જેટલા લોકોએ એકજૂથ થઈને મોડી રાત્રે બુટલેગરના અડ્ડા પર દરોડો પાડ્યો હતો અને વિદેશી દારૂનો મોટો જથ્થો ઝડપી લીધો હતો. જનતા રેડ સફળ થતાં જ ગ્રામજનોએ પોલીસને સ્થળ પર બોલાવીને વિદેશી દારૂની 188 બોટલો જપ્ત કરાવી હતી, જોકે દારૂનો વેપલો કરતો મુખ્ય બુટલેગર અંધારાનો લાભ લઈને ફરાર થઈ ગયો હતો. ગામમાંથી દારૂના દૂષણને જડમૂળથી ખતમ કરવા માટે હવે ગ્રામ પંચાયતમાં કડક ઠરાવ કરવામાં આવશે અને ફરાર બુટલેગર સામે કડકમાં કડક કાનૂની કાર્યવાહી થાય તેવી ઉગ્ર માંગ ગ્રામજનો કરી રહ્યા છે.