ગુજરાતમાં આ 8 જિલ્લા ગમે ત્યારે થઈ શકે છે કોરોનામુક્ત, જાણો વિગત

ગુજરાતમાં માત્ર ડાંગ જિલ્લો કોરોનામુક્ત રહ્યો છે. ડાંગમાં અગાઉ બે કેસ આવ્યા હતા. જોકે, આ બંને કેસ રિકવર થઈ ગયા છે.

અમદાવાદઃ ગુજરાતમાં કોરોનાના કેસોમાં સતત વધારો થઈ રહ્યો છે. જોકે, લોકો માટે રાહતના સમાચાર એ છે કે, રાજ્યમાં આઠ જિલ્લા એવાં છે કે જ્યાં કોરોનાના એક્ટિવ કેસ 5થી વધુ નથી. ત્યારે આ જિલ્લા ગમે ત્યારે કોરોનામુક્ત થઈ શકે છે. નોંધનીય છે કે, ગુજરાતમાં માત્ર ડાંગ જિલ્લો કોરોનામુક્ત રહ્યો છે. ડાંગમાં અગાઉ બે કેસ આવ્યા હતા. જોકે, આ બંને કેસ રિકવર થઈ ગયા છે. તેમજ ઘણાં દિવસથી આ જિલ્લામાં એક પણ કોરોનાના કેસ નોંધાયા નથી. ગુજરાતમાં મોરબીમાં 1, દેવભૂમિ દ્વારકામાં 1, છોટાઉદેપુરમાં 1, પોરબંદરમાં 2, નર્મદામાં 2, અમરેલીમાં 4, તાપીમાં 4 અને પંચમહાલમાં પાંચ એક્ટિવ કેસો છે. જો નવા કેસ નહીં નોંધાય, તો આ જિલ્લા કોરોનામુક્ત થઈ શકે છે. અગાઉ તાપી, નવસારી, નર્મદા, મોરબી, પોરબંદર, સુરેન્દ્રનગર અને ભરુચ જિલ્લા કોરોનામુક્ત બન્યા હતા. જોકે, આ જિલ્લામાં હાલ, કોરોનાની રિ-એન્ટ્રી થઈ છે. ડાંગ સિવાય બોટાદ જિલ્લો કોરોનામુક્ત થયો હોવાનું જિલ્લા પ્રશાસન દ્વારા કહેવામાં આવી રહ્યું છે. જિલ્લામાં કુલ 56 કેસ હતા જેમાં 1 દર્દી નું મોત થયેલ અને ગઈકાલ સુધીમાં તમામ 55 દર્દીને ડિસ્ચાર્જ કરી દેવામાં આવ્યા છે. જોકે, ગુજરાત સરકારની અખબારી યાદી પ્રમાણે એક એક એક્ટિવ બતાવે છે.