અમદાવાદની સ્કૂલે વિદ્યાર્થીનીને આપ્યું એવું એલ.સી. કે જેની વિગત જાણીને ચોંકી જશો

માત્ર સ્કૂલ જ નહીં આ પહેલા વિદ્યાર્થીનીના પિતાએ ગાંધીનગરના જિલ્લા કલેક્ટરને પત્ર લખીને આ માટે વિનંદી કરી હતી.

અમદાવાદઃ સામાન્ય રીતે સ્કૂલમાંથી આપવામાં આવતા એલસીમાં નામ, અટક, પિતાનું નામ, સરનામું, ધર્મ, જાતિ વગેરે લખેલા હોય છે પરંતુ અમદાવાદમાં એક સ્કૂલે એવું એલસી સર્ટિફિકેટ આપ્યું જે જોઈને તમે પણ ચોંકી જશો. મળતી માહિતી મુજબ અમદાવાદની ચાંદખેડા વિસ્તારમાં આવેલી એચ.ડી. સનરાઈઝ ઇંગ્લિશ સ્કૂલે વિદ્યાર્થીને એવું એલસી આપ્યું છે જેમાં વિદ્યાર્થિનીના ધર્મ, જાતિ, અટક અને પિતાના નામનો ઉલ્લેખ જ કરવામાં આવ્યો નથી. આ માટે ખુદ પિતાએ જ શાળાને વિનંદી કરી હતી કે તેની દીકરીના લિવિંગ સર્ટિફિકેટમાં ધર્મ, જાતિ, અટક અને પિતાના નામનો ઉલ્લેખ કરવો નહીં. વાલીની આ રજૂઆતને ધ્યાનમાં રાખતા શાળાએ તેને માન્ય રાખી અને તેમના કહેવા પ્રમાણેનું લિવિંગ સર્ટિફિકેટ વિદ્યાર્થીનીને આપ્યું. માત્ર સ્કૂલ જ નહીં આ પહેલા વિદ્યાર્થીનીના પિતાએ ગાંધીનગરના જિલ્લા કલેક્ટરને પત્ર લખીને આ માટે વિનંદી કરી હતી. બાદમાં આ પત્ર કલેક્ટરે ડીઈઓને ફોરવર્ડ કર્યો હતો. બાદમાં ડીપીઈઓએ શાળાને નિર્દેશ આપ્યા હતા કે આ મામલે કાયદા અનુસાર પગલા લેવા. પહેલા શાળાએ આવું લિવિંગ સર્ટિફિકેટ આપવાની ના પાડી હતી બાદમાં વાલીએ ગાંધીનગર કલેક્ટરને રૂબરૂ રજૂઆત કરતાં શાળાએ આ સર્ટિફિકેટ આપ્યું હતું. વિદ્યાર્થિનીના પિતાનું માનવું છે કે જો પિતા કે અટકનો ઉલ્લેખ બાળકના નામ પાછળ ન હોય તો ભવિષ્યમાં બાળક કોઈ બાબતથી પીડિત બન્યું હોય તો પિતા કે અટકના ચક્કરમાં ફસાયા વગર માનસિક ત્રાસમાંથી બચી જાય છે. નોંધનીય છે કે, આ પહેલા વર્ષ 2016માં હાઈકોર્ટે એક જાહેરહિતની અરજીમાં ચુકાદો આવ્યા બાદ તામિલનાડુની સ્નેહા નામની યુવતી જાતિ કે ધર્મ વગરનું લિવિંગ સર્ટિફિકેટ મેળવનારી દેશની પ્રથમ નાગરિક બની હતી.