બોટાદ કથિત તોડકાંડમાં મોટો વળાંક: MLA ઉમેશ મકવાણા CMને મળ્યા, CID તપાસની કરી માંગ

ધારાસભ્ય ઉમેશ મકવાણાએ મુખ્યમંત્રી ભૂપેન્દ્ર પટેલને રૂબરૂ મળીને ભદ્રાવાડી અને દુબઈના કનેક્શનની CID ક્રાઈમ પાસે તપાસ કરાવવા રજૂઆત કરી.

botad extortion case mla umesh makwana demands high level probe cid

Source : ai

Show Quick Read

Key points generated by AI, verified by newsroom

• બોટાદના ધારાસભ્યે કથિત તોડકાંડ, ઓનલાઈન ગેમિંગની ઉચ્ચ તપાસ માંગી.
• આ નેટવર્ક કરોડો નહીં, હજારો કરોડના ગેરકાયદેસર વ્યવહારો કરે છે.
• મુખ્યમંત્રીએ નિષ્પક્ષ તપાસ કરી દોષિતો સામે કડક કાર્યવાહીની ખાતરી આપી.

Botad extortion case: બોટાદમાં 1 કરોડના કથિત તોડકાંડ અને ઓનલાઈન ગેમિંગના ગેરકાયદેસર નેટવર્ક અંગે બોટાદના ધારાસભ્ય ઉમેશ મકવાણાએ ગાંધીનગર ખાતે રાજ્યના મુખ્યમંત્રી શ્રી ભૂપેન્દ્ર પટેલ સાથે રૂબરૂ મુલાકાત કરી છે. આ બેઠકમાં તેમણે આ સમગ્ર મામલાની અત્યંત ગંભીર અને ઉચ્ચસ્તરીય તપાસ કરાવવાની પ્રબળ માંગણી કરી છે.

આજે ગાંધીનગરમાં બોટાદ જિલ્લાના કોળી સમાજના આગેવાનો, યુવાનો અને વડીલો સાથે એક અગત્યની બેઠક યોજવામાં આવી હતી. આ બેઠક બાદ ધારાસભ્ય ઉમેશભાઈ મકવાણાએ મુખ્યમંત્રીશ્રીને મળીને સમગ્ર સ્થિતિનો ચિતાર આપ્યો હતો. તેમણે સ્પષ્ટપણે જણાવ્યું હતું કે, આ મામલો માત્ર 1 કરોડ રૂપિયાના તોડકાંડ પૂરતો મર્યાદિત નથી. આ તો બોટાદ જિલ્લામાં છેલ્લા કેટલાક સમયથી ચાલતા ઓનલાઈન ગેમિંગ અને સટ્ટાબાજીના મોટા નેટવર્ક સાથે જોડાયેલો ગંભીર મુદ્દો છે. આ સિન્ડિકેટ દ્વારા કરોડો નહિ પરંતુ હજારો કરોડ રૂપિયાના ગેરકાયદેસર નાણાકીય વ્યવહારો થતા હોવાની પ્રબળ આશંકા છે. આથી આ વિશાળ નેટવર્ક પાછળ કોણ જવાબદાર છે, નાણાં ક્યાંથી આવે છે અને ક્યાં જાય છે, તથા તેનું સંચાલન કોણ કરે છે તેની ઊંડાણપૂર્વક તપાસ થવી અત્યંત આવશ્યક છે.

ધારાસભ્યશ્રીએ વિશેષ ભાર મૂકીને માંગ કરી હતી કે હાલમાં બોટાદ પોલીસ દ્વારા ચાલી રહેલી તપાસને વધુ વ્યાપક બનાવવી જોઈએ. આ કેસની તપાસ રેન્જ આઈ.જી. કક્ષાના ઉચ્ચ અધિકારી અથવા સી.આઈ.ડી. ક્રાઈમ મારફતે નિષ્પક્ષ રીતે કરાવવામાં આવે. તેમણે ઉમેર્યું હતું કે ભદ્રાવાડી ગામ સાથે જોડાયેલી કેટલીક વ્યક્તિઓ કે જેઓ હાલમાં દુબઈમાં બેસીને આ ઓનલાઈન ગેમિંગનું આખું સિન્ડિકેટ ચલાવતા હોવાની શંકા છે, તેમની ભૂમિકા, તેમના નાણાકીય વ્યવહારો અને સ્થાનિક સંપર્કોની પણ ઝીણવટભરી ટેકનિકલ તપાસ થવી જોઈએ.

આ ઉપરાંત, ગારીયાધાર, ગઢડા તાલુકાના ટાટમ, રામપરા, વાવડી અને બોટાદ તાલુકાના કાનિયાડ જેવા વિવિધ ગ્રામ્ય વિસ્તારોમાં પણ ઓનલાઈન ગેમિંગનું મોટું નેટવર્ક સક્રિય હોવાની માહિતી મળી છે. આથી તપાસ માત્ર એક સ્થળ કે વ્યક્તિ પૂરતી સીમિત ન રહેતા, સમગ્ર નેટવર્કની તમામ કડીઓ જોડીને તેના મૂળ સુધી પહોંચવું જોઈએ.

ધારાસભ્યશ્રીએ ચિંતા વ્યક્ત કરતા જણાવ્યું હતું કે ઓનલાઈન ગેમિંગ અને સટ્ટાનું આ દુષણ 13 થી 30 વર્ષની વયના યુવાનોમાં ખૂબ જ ઝડપથી ફેલાઈ રહ્યું છે. જેના કારણે અનેક યુવાનો આર્થિક અને સામાજિક રીતે પાયમાલ થઈ રહ્યા છે. જો આ નેટવર્કના તાર વિદેશમાં બેઠેલા સૂત્રધારો સાથે જોડાયેલા હોય, તો તેની પણ તપાસ કરી કાયદા મુજબ કડક પગલાં લેવા જોઈએ. મુખ્યમંત્રી શ્રી ભૂપેન્દ્ર પટેલે ધારાસભ્યશ્રી અને આગેવાનોની આ રજૂઆતને અત્યંત ગંભીરતાથી સાંભળીને ખાતરી આપી હતી કે આ સમગ્ર મામલે યોગ્ય અને નિષ્પક્ષ તપાસ કરવામાં આવશે અને કોઈપણ દોષિતને બક્ષવામાં આવશે નહિ.