EPFO વ્યાજને લઈ સરકારે લીધો મોટો નિર્ણય, જાણો આ વર્ષે ખાતામાં કેટલું વ્યાજ જમા થશે

EPFO interest rate 2025: નાણાકીય વર્ષ 2024-25 માટે સરકારે કર્મચારી ભવિષ્ય નિધિ પરના વ્યાજ દરને મંજૂરી આપી, ગત વર્ષનો દર જાળવી રખાયો.

ઈપીએફઓ વ્યાજ દર

Source : ABP Desam

EPF 8.25% interest confirmed: કેન્દ્ર સરકારે કર્મચારી ભવિષ્ય નિધિ સંગઠન (EPFO) ના કરોડો ખાતાધારકો માટે રાહતના સમાચાર આપ્યા છે. નાણાકીય વર્ષ 2024-25 માટે એમ્પ્લોઈ પ્રોવિડન્ટ ફંડ (EPF) પરના વ્યાજ દરને 8.25% પર યથાવત રાખવાની મંજૂરી આપવામાં આવી છે. આ નિર્ણયથી દેશના 7 કરોડથી વધુ EPFO સબસ્ક્રાઇબર્સને સીધો ફાયદો થશે. નાણા મંત્રાલયની લીલી ઝંડી મળ્યા બાદ હવે ટૂંક સમયમાં જ આ વ્યાજની રકમ ખાતાધારકોના ખાતામાં જમા કરવામાં આવશે.

આ અંગેની જાહેરાત કરતાં શ્રમ મંત્રાલયના એક અધિકારીએ જણાવ્યું હતું કે, "નાણા મંત્રાલયે નાણાકીય વર્ષ 2024-25 માટે EPF પર 8.25 ટકા વ્યાજ દર આપવા માટે સંમતિ દર્શાવી છે અને શ્રમ મંત્રાલયે ગુરુવારે EPFO ને આ સંદર્ભમાં જાણ કરી દીધી છે."

અત્રે ઉલ્લેખનીય છે કે કર્મચારી ભવિષ્ય નિધિ સંગઠને (EPFO) 28 ફેબ્રુઆરીના રોજ યોજાયેલી તેની સેન્ટ્રલ બોર્ડ ઓફ ટ્રસ્ટીઝની 237મી બેઠકમાં નાણાકીય વર્ષ 2024-25 માટે EPF થાપણો પર 8.25 ટકા વ્યાજ દર જાળવી રાખવાનો પ્રસ્તાવ મૂક્યો હતો. આ દર પાછલા નાણાકીય વર્ષ 2023-24 માં આપવામાં આવેલા વ્યાજ દર જેટલો જ છે. કેન્દ્રીય શ્રમ અને રોજગાર મંત્રી મનસુખ માંડવિયાની અધ્યક્ષતામાં આ બેઠક નવી દિલ્હીમાં યોજાઈ હતી.

વ્યાજ દરોનો ઇતિહાસ

જો ભૂતકાળના વ્યાજ દરો પર નજર કરીએ તો, ફેબ્રુઆરી 2024માં, EPFO એ નાણાકીય વર્ષ 2023-24 માટે વ્યાજ દર 2022-23 ના 8.15 ટકાથી વધારીને 8.25 ટકા કર્યો હતો. તે પહેલાં, માર્ચ 2022 માં, 2021-22 માટે EPF પરનો વ્યાજ દર ઘટાડીને 8.1 ટકા કરવામાં આવ્યો હતો, જે ચાર દાયકાથી વધુ સમયનો સૌથી નીચો સ્તર હતો. નાણાકીય વર્ષ 2020-21 માં આ દર 8.5 ટકા હતો.

EPF બેલેન્સ કેવી રીતે તપાસશો?

EPFO તેના સભ્યોને વિવિધ માધ્યમો દ્વારા તેમના પીએફ ખાતાનું બેલેન્સ તપાસવાની સુવિધા પૂરી પાડે છે:

1. SMS દ્વારા: તમારા રજિસ્ટર્ડ મોબાઇલ નંબર પરથી 'EPFOHO UAN' લખીને 7738299899 પર SMS મોકલો.
2. મિસ્ડ કોલ દ્વારા: તમારા રજિસ્ટર્ડ મોબાઇલ નંબર પરથી 9966044425 પર મિસ્ડ કોલ આપો. કોલ આપમેળે ડિસ્કનેક્ટ થઈ જશે અને તમને SMS દ્વારા બેલેન્સની માહિતી મળશે.
3. ઉમંગ એપ (UMANG App) દ્વારા: સ્માર્ટફોનમાં ઉમંગ એપ ડાઉનલોડ કરી, EPFO સેવાઓ પસંદ કરી, 'વ્યૂ પાસબુક' વિકલ્પ પર ક્લિક કરી UAN અને OTP વડે લોગિન કરીને પાસબુક અને બેલેન્સ જોઈ શકાય છે.
4. EPFO વેબસાઇટ દ્વારા: EPFO ની સત્તાવાર વેબસાઇટ (epfindia.gov.in) પર જઈને 'Our Services' માં 'For Employees' સેક્શનમાં 'Member Passbook' પર ક્લિક કરો. UAN, પાસવર્ડ અને કેપ્ચા દાખલ કરીને લોગિન કર્યા પછી સંપૂર્ણ પાસબુક જોઈ શકાશે.

આ નિર્ણયથી નોકરિયાત વર્ગમાં ખુશીની લહેર જોવા મળી રહી છે, કારણ કે EPF એ તેમના ભવિષ્ય માટે બચતનું એક મહત્વપૂર્ણ સાધન છે અને તેના પર મળતું વ્યાજ તેમની નિવૃત્તિ યોજનાઓ પર સીધી અસર કરે છે.