Gold Silver Price: સોનાના ભાવ 11 મહિનાના તળિયે, ચાંદીના ભાવમાં પણ ઘટાડો

રોકાણકારોના વેચાણને કારણે આંતરરાષ્ટ્રીય બજારમાં સોનાની કિંમત 1.5 ટકા ઘટીને 1,710 ડોલર પ્રતિ ઔંસ થઈ ગઈ છે.

પ્રતિકાત્મક તસવીર

Gold Silver Prices Today: સોનાના ભાવમાં મોટો ઘટાડો થયો છે. આંતરરાષ્ટ્રીય બજારમાં સોનાની કિંમત 11 મહિનાની નીચી સપાટીએ પહોંચી ગઈ છે. વાસ્તવમાં અમેરિકામાં મોંઘવારી દર 41 વર્ષમાં સર્વોચ્ચ સ્તરે પહોંચી ગયો છે, ત્યારબાદ વ્યાજદરમાં વધારો થવાની સંભાવના છે. જેના કારણે સોનાના ભાવમાં આ ઘટાડો જોવા મળી રહ્યો છે. રોકાણકારોના વેચાણને કારણે આંતરરાષ્ટ્રીય બજારમાં સોનાની કિંમત 1.5 ટકા ઘટીને 1,710 ડોલર પ્રતિ ઔંસ થઈ ગઈ છે. તેથી ચાંદીના ભાવમાં 2.2 ટકાનો ઘટાડો થયો છે અને તે ઘટીને 18.76 ડોલર પ્રતિ ઔંસ પર આવી ગયો છે.

સ્થાનિક બજારમાં પણ સોનાની કિંમત બે મહિનાની નીચી સપાટીએ આવી ગઈ છે. એમસીએક્સ પર સોનાની કિંમત 1 ટકા ઘટીને 50,821 રૂપિયા પ્રતિ 10 ગ્રામ થઈ ગઈ છે. તો ચાંદીના ભાવમાં 3.5 ટકાનો ઘટાડો થયો છે અને તે 55,194 રૂપિયા પ્રતિ કિલો પર ટ્રેડ થઈ રહ્યો છે. આ મહિનાની શરૂઆતમાં, જ્યારે કેન્દ્ર સરકાર દ્વારા સોનાની આયાત પર કડક કાર્યવાહી કરવા માટે આયાત ડ્યૂટીમાં વધારો કરવામાં આવ્યો હતો, ત્યારે સોનાની કિંમત 52,300 રૂપિયા પ્રતિ 10 ગ્રામ થઈ ગઈ હતી. પરંતુ ત્યારપછી રોકાણકારોના વેચાણને કારણે ભાવમાં ઘટાડો જોવા મળી રહ્યો છે.

બીજી તરફ દિલ્હીના બુલિયન માર્કેટમાં સોનાની કિંમત 163 રૂપિયા ઘટીને 50,314 રૂપિયા પ્રતિ 10 ગ્રામ પર આવી ગઈ છે. છેલ્લા ટ્રેડિંગ સેશનમાં સોનાનો ભાવ 50,477 રૂપિયા પ્રતિ 10 ગ્રામ પર બંધ થયો હતો. ચાંદી પણ રૂ. 195 ઘટીને રૂ. 56,254 પ્રતિ કિલોગ્રામ પર આવી હતી, જ્યારે ચાંદી અગાઉના ટ્રેડિંગ સત્રમાં રૂ. 56,449 પ્રતિ કિલોગ્રામ પર બંધ હતી.

HDFC સિક્યોરિટીઝના વરિષ્ઠ વિશ્લેષક (કોમોડિટીઝ) તપન પટેલે જણાવ્યું હતું કે, "ન્યુયોર્ક સ્થિત કોમોડિટી એક્સચેન્જ કોમેક્સ પર ગઈકાલે રાત્રે થયેલા ઘટાડાને કારણે દિલ્હીમાં 24 કેરેટ સોનાની કિંમતમાં રૂ. 163નો ઘટાડો થયો છે.”