અમેરિકાએ ચીનને ભીંસમાં લીધું તો ચીન દોડતું દોડતું ભારત પાસે મદદ માંગવા આવ્યું, શું ભારત કરશે મદદ?
યુએસ-ચીન વેપાર તણાવ ચરમસીમાએ, અમેરિકાના જંગી ટેરિફથી ત્રસ્ત ચીને ભારતને સાથ આપવા અપીલ કરી, નવી દિલ્હી માટે કયા વિકલ્પો ઉપલબ્ધ?
US China trade war: અમેરિકા અને ચીન વચ્ચેનો વેપાર તણાવ સતત વધી રહ્યો છે, અને હવે તે એક નવા સ્તરે પહોંચી ગયો છે. અમેરિકાએ ચીન પર ૧૨૫ ટકા સુધીનો જંગી ટેરિફ લાદી દીધો છે, જેના કારણે પરેશાન થયેલા બેઇજિંગે હવે પોતાના પાડોશી દેશ ભારત પાસે મદદની ગુહાર લગાવી છે. ચીને ભારતને કહ્યું છે કે આ મુશ્કેલ સમયમાં બંને દેશોએ એકબીજાનો સાથ આપવો જોઈએ.
અમેરિકા અને ચીન વચ્ચે છેલ્લા કેટલાક સમયથી વેપારને લઈને ખેંચતાણ ચાલી રહી છે. ચીન દ્વારા લાદવામાં આવેલા ૮૪ ટકા ટેરિફથી નારાજ અમેરિકાએ હવે વધુ આક્રમક વલણ અપનાવ્યું છે. અમેરિકાએ ચીન પરના ટેરિફને ૧૦૪ ટકાથી વધારીને સીધા ૧૨૫ ટકા કરી દીધા છે. આ પગલાને યોગ્ય ઠેરવતા અમેરિકાના રાષ્ટ્રપતિ ડોનાલ્ડ ટ્રમ્પે દલીલ કરી છે કે જ્યારે તેમણે અગાઉ ટેરિફ લગાવ્યા હતા, ત્યારે અન્ય દેશો તેમની સાથે વાટાઘાટો કરવા આગળ આવ્યા હતા, જ્યારે ચીને આવું કર્યું નહોતું. તેમણે કહ્યું કે ચીને ટેરિફ સાથે બદલો લીધો, જે આદરનું સ્વરૂપ નથી.
બીજી તરફ, અમેરિકા સાથે વધેલા વેપાર તણાવથી ચિંતિત ચીને હવે ભારત તરફ મીટ માંડી છે. ચીની દૂતાવાસના પ્રવક્તા યુ જિંગે મંગળવારે એક નિવેદન જારી કરીને જણાવ્યું હતું કે બેઇજિંગ અને નવી દિલ્હી વચ્ચેના આર્થિક અને વેપારી સંબંધો પરસ્પર લાભ પર આધારિત છે. તેમણે સોશિયલ મીડિયા પર પોસ્ટ કરતાં વધુમાં કહ્યું કે બંને વિકાસશીલ દેશોએ અમેરિકન ટેરિફના પડકારોનો સામનો કરવા માટે સાથે આવવું જોઈએ અને આ મુશ્કેલ સમયને પાર કરવો જોઈએ. યુ જિંગે ભારપૂર્વક જણાવ્યું કે વેપાર અને ટેરિફ યુદ્ધમાં કોઈ વિજેતા હોતું નથી. તેમણે તમામ દેશોને ગહન પરામર્શના સિદ્ધાંતોનું પાલન કરવા અને તમામ એકપક્ષીય અને સંરક્ષણવાદી પગલાંનો વિરોધ કરવા પણ આહ્વાન કર્યું હતું.
હવે સવાલ એ ઊભો થાય છે કે આ પરિસ્થિતિમાં ભારત પાસે કયા વિકલ્પો છે અને ભારત શું કરશે? વાસ્તવમાં, આ બે મોટા દેશો વચ્ચેની લડાઈની અસર ટેસ્લા અને એપલ જેવી મોટી કંપનીઓ પર પણ પડી શકે છે, કારણ કે ચીનનું બજાર તેમના માટે ખૂબ મોંઘું થઈ જશે. બીજી તરફ, ચીન હવે અમેરિકાને બદલે યુરોપિયન દેશો અથવા અન્ય સ્થળોએ પોતાની સ્થાનિક બ્રાન્ડ્સને વધુ મહત્વ આપી શકે છે.
આ તમામ પરિબળોને જોતાં અમેરિકાની સ્પર્ધા નબળી પડશે અને ભારત માટે આ એક મોટી તક સાબિત થઈ શકે છે. જો અમેરિકન કંપનીઓ ચીનને બદલે ભારતમાં રોકાણ કરવાનું વિચારે તો તેનાથી ભારતમાં વિદેશી રોકાણ વધશે અને ભારતીય અર્થતંત્રને મજબૂતી મળશે. જો કે, એ વાત પણ સાચી છે કે ઘણી ઇલેક્ટ્રોનિક પ્રોડક્ટ્સ માટે ભારત હજુ પણ ચીન પર નિર્ભર છે. આવી સ્થિતિમાં, જો ટેરિફ વધે તો ભારતીય ગ્રાહકોને તે માલ માટે ઊંચી કિંમત ચૂકવવી પડી શકે છે. આ ઉપરાંત, વૈશ્વિક વેપારમાં અસ્થિરતા આવવાથી ભારતીય નિકાસકારોને પણ મુશ્કેલીઓનો સામનો કરવો પડી શકે છે, જેના કારણે નિકાસમાં ઘટાડો થવાની સંભાવના છે.
હવે જોવાનું એ રહે છે કે ભારત આ પરિસ્થિતિમાં કયો રસ્તો અપનાવે છે. શું ભારત ચીનનો સાથ આપશે કે પછી અમેરિકા સાથે પોતાના સંબંધોને ધ્યાનમાં રાખીને કોઈ મધ્યસ્થીનો રસ્તો કાઢશે? આ એક જટિલ પરિસ્થિતિ છે અને ભારતનો નિર્ણય આગામી સમયમાં વૈશ્વિક વેપાર પર મોટી અસર કરી શકે છે.
Before You Go
Bhavnagar Fake liquor scandal | ભાવનગરમાં ડુપ્લીકેટ દારૂમાં શિક્ષક હિતેશ પરમારનું શંકાસ્પદ મોત
ટોપ સ્ટોરી
ટ્રેન્ડિંગ સમાચાર
