ટિકિટ બુક કરતા પહેલા જ ખબર પડી જશે ટિકિટ કન્ફર્મ થશે કે નહીં! રેલવેએ લોન્ચ કરી આ ખાસ એપ

RailOne app ticket booking: AI ની મદદથી વેઇટિંગ ટિકિટ કન્ફર્મ થવાની 94% સચોટ આગાહી કરશે આ એપ, સાથે જનરલ ટિકિટ બુકિંગ અને લાઈવ ટ્રેન ટ્રેકિંગની પણ સુવિધા મળશે એક જ જગ્યાએ.

RailOne Mobile App Predicts Waitlist Ticket Confirmation Probability

Source : ai

Show Quick Read

Key points generated by AI, verified by newsroom

• રેલવેએ 'RailOne' એપ લોન્ચ કરી, વેઇટિંગ ટિકિટ કન્ફર્મ થવાની સંભાવના જણાવશે.
• AI ટેકનોલોજી ટિકિટ કન્ફર્મ થવાની 94% સચોટ આગાહી કરશે.
• એક જ એપમાં રિઝર્વેશન, જનરલ ટિકિટ, પ્લેટફોર્મ ટિકિટ બુકિંગ શક્ય.
• જનરલ ટિકિટ પર 3% ડિસ્કાઉન્ટ, લાઈવ ટ્રેન લોકેશન ટ્રેક થશે.

RailOne app ticket booking: ભારતીય રેલવેમાં રોજેરોજ મુસાફરી કરતા લાખો લોકો માટે એક ખૂબ જ સારા અને રાહતના સમાચાર છે. તહેવારો કે રજાઓમાં કન્ફર્મ ટિકિટ ન મળવી અને વેઇટિંગ ટિકિટ કન્ફર્મ થશે કે નહીં તેની લાંબી ચિંતા હવે ભૂતકાળ બની જશે. રેલવે મંત્રાલયે 'RailOne' (રેલવન) નામની એક નવી અને એડવાન્સ મોબાઈલ એપ લોન્ચ કરી છે. આ એપની સૌથી મોટી ખાસિયત એ છે કે તે તમે ટિકિટ બુક કરો તે પહેલાં જ જણાવી દેશે કે તમારી વેઇટિંગ ટિકિટ કન્ફર્મ થવાના કેટલા ચાન્સ છે. આ ઉપરાંત, આ એક જ એપમાં રિઝર્વેશન, જનરલ ટિકિટ બુકિંગ, પ્લેટફોર્મ ટિકિટ અને ટ્રેનનું લાઈવ લોકેશન ટ્રેક કરવા જેવી તમામ સુવિધાઓ પૂરી પાડવામાં આવી છે.

આજે રેલવેમાં મુસાફરોનો ધસારો એટલો વધી ગયો છે કે અમુક રૂટની રેગ્યુલર ટ્રેનોમાં કન્ફર્મ સીટ મેળવવી લોઢાના ચણા ચાવવા સમાન છે. ઘણીવાર તો બુકિંગ ખુલતાની સાથે જ બધી સીટો ફૂલ થઈ જતી હોય છે. આવા સમયે મજબૂરીમાં લોકોને વેઇટિંગ ટિકિટ લેવી પડે છે અને પછી છેલ્લી ઘડી સુધી તે કન્ફર્મ થવાની રાહ જોવી પડે છે. જો ટિકિટ કન્ફર્મ ન થાય તો છેવટે મુસાફરી રદ કરવાનો વારો આવે છે. પરંતુ હવે નવી RailOne એપ મુસાફરોની આ મુશ્કેલીનો અંત લાવશે. આ એપ AI (આર્ટિફિશિયલ ઈન્ટેલિજન્સ) ટેકનોલોજીનો ઉપયોગ કરીને બુકિંગ પહેલાં જ ટિકિટ કન્ફર્મ થવાની સંભાવનાની સચોટ આગાહી કરી આપે છે. આ વર્ષની શરૂઆતમાં જ આ ફીચર લાવવામાં આવ્યું હતું, અને શરૂઆતમાં આ આગાહીની ચોકસાઈ 53% હતી, જે હવે સુધરીને 94% સુધી પહોંચી ગઈ છે. યુઝર્સ તરફથી પણ આ ફીચરના ખૂબ વખાણ થઈ રહ્યા છે.

RailOne એપ માત્ર ટિકિટ કન્ફર્મેશન પૂરતી સીમિત નથી, તેમાં મુસાફરો માટે બીજી ઘણી શાનદાર સુવિધાઓ આપવામાં આવી છે. અગાઉ લોકોએ જનરલ (અનરિઝર્વ્ડ) ટિકિટ બુક કરવા માટે અલગ એપ ડાઉનલોડ કરવી પડતી હતી, પણ હવે આ એક જ એપથી રિઝર્વેશનવાળી ટિકિટની સાથે સાથે જનરલ ક્લાસની ટિકિટ પણ બુક કરી શકાશે. એટલું જ નહીં, તમે આ મોબાઈલ એપ દ્વારા ઓનલાઈન પ્લેટફોર્મ ટિકિટ પણ ખરીદી શકો છો. મુસાફરી દરમિયાન તમારી ટ્રેન ક્યાં પહોંચી છે તેનું લાઈવ લોકેશન પણ આમાં ચેક કરી શકાય છે અને જો કોઈ તકલીફ પડે તો 'રેલ મદદ' હેલ્પલાઈન પર સીધી ઓનલાઈન ફરિયાદ પણ નોંધાવી શકાય છે. સૌથી સારી વાત એ છે કે, RailOne એપ પર અનરિઝર્વ્ડ (જનરલ) ટિકિટ બુક કરાવવા પર મુસાફરોને 3% જેટલું સ્પેશિયલ ડિસ્કાઉન્ટ પણ આપવામાં આવી રહ્યું છે.