RBIએ આ બેન્કનું લાયસન્સ કર્યું રદ, છ સપ્તાહમાં બેન્ક થઇ જશે બંધ, શું તમારું તો એકાઉન્ટ નથી ને ?

આરબીઆઈએ કહ્યું કે બેંક આજથી છ અઠવાડિયા પછી બેંકિંગ વ્યવસાય કરવાનું બંધ કરશે

પ્રતિકાત્મક તસવીર

Source : Getty

નવી દિલ્હી: ભારતીય રિઝર્વ બેંકે મહારાષ્ટ્રના પુણે સ્થિત રુપી કો-ઓપરેટિવ બેંકનું લાયસન્સ રદ કર્યું છે. રિઝર્વ બેંકના આ પગલાને કારણે બેંકના ગ્રાહકોના જમા નાણાં બેંકમાં અટવાઈ ગયા છે કારણ કે રિઝર્વ બેંકનું કહેવું છે કે બેંક તેના તમામ થાપણદારોના પૈસા પરત કરવાની સ્થિતિમાં નથી. હવેથી 6 અઠવાડિયા પછી બેંકે પોતાનો વ્યવસાય બંધ કરવો પડશે.

રિઝર્વ બેંક ઓફ ઈન્ડિયાએ બુધવારે કહ્યું હતું કે તેણે 12 સપ્ટેમ્બર, 2017ના મુંબઈ હાઈકોર્ટના આદેશના પાલનમાં રૂપી કો-ઓપરેટિવ બેંક લિ. પૂણેનું લાયસન્સ રદ કર્યું છે. આ આદેશ આજથી છ અઠવાડિયા પછી એટલે કે 22 સપ્ટેમ્બર 2022થી અમલમાં આવશે. રિઝર્વ બેંકે કહ્યું કે જો રૂપી કો-ઓપરેટિવ બેંકને તેનો બેંકિંગ વ્યવસાય ચાલુ રાખવાની મંજૂરી આપવામાં આવે તો તે જાહેર હિતમાં રહેશે નહીં. બેંકની વર્તમાન નાણાકીય સ્થિતિ બહુ સારી નથી. તે તેના થાપણદારોને સંપૂર્ણ નાણાં પરત કરવાની સ્થિતિમાં નથી.

6 અઠવાડિયામાં બેંક બંધ થઈ જશે

મની કંટ્રોલના અહેવાલ મુજબ, આરબીઆઈએ કહ્યું કે બેંક આજથી છ અઠવાડિયા પછી બેંકિંગ વ્યવસાય કરવાનું બંધ કરશે. આરબીઆઈએ કહ્યું કે બેંક પર બેંકિંગના વ્યવસાય પર પ્રતિબંધ મૂકવામાં આવશે. પ્રતિબંધ લાગુ થયા બાદ બેંક ન તો ગ્રાહકો પાસેથી પૈસા જમા કરાવી શકશે અને ન તો તેમને પૈસા આપી શકશે.

લિક્વિડેટરની નિમણૂક કરવામાં આવશે

આરબીઆઈએ કહ્યું છે કે મહારાષ્ટ્રમાં સહકારી કમિશ્નર અને સહકારી મંડળીના રજિસ્ટ્રારને બેંક બંધ કરવા અને બેંક માટે લિક્વિડેટરની નિમણૂક કરવા માટે કહેવામાં આવ્યું છે. બેંક પાસે પૂરતી મૂડી અને કમાણીની સંભાવના નથી. આ બેંકિંગ રેગ્યુલેશન એક્ટ, 1949ની કલમ 11(1) અને કલમ 22(3)(d) તેમજ કલમ 56 ની જોગવાઈઓ અનુસાર નથી. બેંક કલમ 22(3)(a), 22(3)(b), 22(3)(c), 22(3)(d) અને 22(3)(e) ની શરતોનું પાલન કરવામાં નિષ્ફળ રહી છે.

ગ્રાહકોને માત્ર પાંચ લાખ પાછા મળશે

ગ્રાહકોને વધુમાં વધુ રૂ. 5 લાખ સુધીની તેમની થાપણો પાછી મળશે. આરબીઆઈએ કહ્યું કે બેંક દ્વારા આપવામાં આવેલા ડેટા અનુસાર, ડીઆઈસીજીસીના 99% થી વધુ થાપણદારો તેમની થાપણો મેળવવા માટે હકદાર છે.