આ બેંકના ગ્રાહકોનો બન્ને બાજુ મરો, રકમ ઉપાડવા તો ઠીક પણ હવે જમા કરવા પર પણ લાગશે ચાર્જ

ભારતીય સ્ટેટ બેંક 1 ઓક્ટોબરથી તેના નિયમોમાં ફેરફાર કરવા જઈ રહી છે.

નવી દિલ્હીઃ દેશની સૌથી મોટી સરકારી બેંક સ્ટેટ બેંક ઓફ ઇન્ડિયાના ગ્રાહક ધ્યાન આપે. એસબીઆઈ પોતાના સર્વિસ ચાર્જમાં ફેરફાર કરવા જઈ રહી છે. તેમાં બેંકમાં રૂપિયા જમા કરાવવા, રૂપિયા ઉપાડવા, ચેકનો ઉપયોગ, એટીએમ ટ્રાન્ઝેક્શન સાથે જોડાયેલ સર્વિસ ચાર્જ સામેલ છે. સર્વિસ ચાર્જમાં ફેરફાર મામલે એસબીઆઈએ પોતાની વેબસાઈટ પર એક સર્ક્યુલર જાહેર કર્યું છે. ભારતીય સ્ટેટ બેંક 1 ઓક્ટોબરથી તેના નિયમોમાં ફેરફાર કરવા જઈ રહી છે. અત્યાર સુધી SBIના એટીએમ કાર્ડ દ્વારા બીજી બેંકમાંથી પાંચ કરતા વધુ વખત નાણાં ઉપાડવા પર સર્વિસ ટેક્સ વસૂલવામાં આવતો હતો. જો કે હવે મહિનામાં ત્રણ કરતા વધારે વખત રોકડ જમા કરાવવા પર 50 રૂપિયા ફી ચૂકવવી પડશે જેમાં જીએસટી અલગથી લાગશે. SBIએ 1 ઓક્ટોબરથી ચેક રીટર્ન માટેના નિયમોમાં ફેરફાર કરવાની પણ જાહેરાત કરી છે. જો કોઈ ટેકનિકલ કારણોસર કોઈ ચેક પાછો આવે છે, તો ચેક જારી કરનારને 169 રૂપિયાનો વધારાનો ચાર્જ ચૂકવવો પડશે, જેમાં જીએસટી પણ શામેલ છે. બેંકે રીઅલ ટાઇમ ગ્રોસ સેટલમેન્ટ (RTGS) પરના ચાર્જમાં રાહતની જાહેરાત કરી છે. આનાથી બેંક શાખામાં જવું અને RTGS કરવું સસ્તું થશે. હાલ બેથી પાંચ લાખ રૂપિયા સુધીના RTGS પર 25 રૂપિયા અને 5 લાખ રૂપિયાથી વધુના RTGS પર 50 રૂપિયા ચાર્જ લેવાય છે. જોકે 1 ઓક્ટોબરથી આ નિયમમાં ફેરફાર કરવામાં આવ્યો છે, જેમાં બેથી પાંચ લાખ રૂપિયામાં RTGS પર 20 રૂપિયા (વધારાના જીએસટી)નો ચાર્જ ચૂકવવો પડશે. પાંચ લાખ રૂપિયાથી વધુની RTGS પર 40 રૂપિયા (વધારાના જીએસટી)નો ચાર્જ ચૂકવવો પડશે.