વિવાદિત કલાકાર દેવાયત ખવડ ફરી વિવાદમાં: એક જ દિવસમાં બે ડાયરા રાખતા સાણંદ નજીક મોડી રાત્રે બબાલ
એક જ દિવસમાં બે ડાયરાના કાર્યક્રમ રાખ્યા બાદ બીજામાં ગેરહાજર રહેતા સર્જાયો વિવાદ, પોલીસ ફરિયાદની તૈયારી
Devayat Khawad controversy: ગુજરાતના જાણીતા કલાકાર દેવાયત ખવડ ફરી એકવાર વિવાદમાં સપડાયા છે. સૂત્રો દ્વારા મળતી માહિતી મુજબ, સાણંદ નજીક મોડી રાત્રે દેવાયત ખવડને લઈને બબાલ થઈ હોવાના અહેવાલ સામે આવ્યા છે. આ બબાલનું કારણ દેવાયત ખવડની એક જ દિવસમાં બે ડાયરાના કાર્યક્રમમાં હાજરીને લઈને હોવાનું માનવામાં આવે છે.
સૂત્રો દાવો કરી રહ્યા છે કે દેવાયત ખવડે એક જ દિવસમાં બે ડાયરાના કાર્યક્રમ રાખ્યા હતા. તેઓ એક કાર્યક્રમમાં હાજર રહ્યા હતા, પરંતુ બીજા કાર્યક્રમમાં કોઈ કારણોસર હાજર રહ્યા નહોતા. આ ગેરહાજરીને કારણે બીજા કાર્યક્રમના આયોજકો અને લોકોમાં નારાજગી ફેલાઈ હતી, જે બાદમાં બબાલમાં પરિણમી હતી.
રિપોર્ટ અનુસાર, આ બબાલ એટલી વધી ગઈ હતી કે દેવાયત ખવડની ગાડીમાં તોડફોડ કરવામાં આવી હોવાની વાત પણ સામે આવી રહી છે. એટલું જ નહીં, દેવાયત ખવડના ડ્રાઈવર કાનાભાઈ સાથે પણ મારામારી થઈ હોવાના અહેવાલ મળી રહ્યા છે. જો કે આ ઘટનામાં દેવાયત ખવડને કોઈ ઈજા થઈ છે કે કેમ તે અંગે હજુ સુધી કોઈ સ્પષ્ટ માહિતી મળી નથી.
આ સમગ્ર મામલે હવે પોલીસ ફરિયાદ નોંધાવવાની તૈયારી ચાલી રહી છે. જો કે, હજુ સુધી કોઈ સત્તાવાર પોલીસ ફરિયાદ નોંધાઈ નથી. પોલીસ ફરિયાદ નોંધાયા બાદ જ આ ઘટના અંગે વધુ વિગતો બહાર આવી શકશે.
દેવાયત ખવડ અવારનવાર પોતાના નિવેદનો અને કાર્યક્રમોને લઈને વિવાદમાં રહેતા હોય છે. ત્યારે આ નવી ઘટના તેમના વિવાદોની યાદીમાં વધુ એક ઉમેરો કરે તેવી શક્યતા છે. આ સમગ્ર મામલે પોલીસની તપાસ બાદ જ સત્ય હકીકત સામે આવી શકશે.
ટોપ સ્ટોરી
ટ્રેન્ડિંગ સમાચાર
