ગુજરાતમાં માર્ગ અકસ્માતોની બે ગમખ્વાર ઘટનાઓ: બનાસકાંઠા અને ડાંગમાં કુલ ચાર લોકોના મોત
બનાસકાંઠામાં બસ જીપ ટક્કરમાં ત્રણના મોત, ડાંગમાં પીકઅપ પલટતાં યુવકનું કરુણ અવસાન.
gujarat road accident news: ગુજરાતના બનાસકાંઠા અને ડાંગ જિલ્લામાં ગત રોજ માર્ગ અકસ્માતોની બે દુ:ખદ ઘટનાઓ બની હતી. આ અકસ્માતોમાં કુલ ચાર લોકોએ જીવ ગુમાવ્યા છે, જ્યારે અન્ય કેટલાક લોકો ગંભીર રીતે ઘાયલ થયા છે. આ ઘટનાઓએ રાજ્યમાં માર્ગ સલામતીના મુદ્દાને ફરી એકવાર ચિંતાજનક રીતે પ્રકાશમાં લાવ્યો છે.
બનાસકાંઠા જિલ્લાના અમીરગઢ તાલુકાના ખુંણીયા ગામ નજીક એક ગમખ્વાર અકસ્માત સર્જાયો હતો. આ અકસ્માતમાં રાજસ્થાન રાજ્યની એક બસ અને બોલેરો જીપ વચ્ચે જોરદાર ટક્કર થઈ હતી. આ દુર્ઘટનામાં બોલેરો જીપમાં સવાર ત્રણ વ્યક્તિઓ કમનસીબે ઘટનાસ્થળે જ મૃત્યુ પામ્યા હતા.
અકસ્માતની જાણ થતાં જ અમીરગઢ પોલીસ તાત્કાલિક ઘટનાસ્થળે પહોંચી આવી હતી અને તપાસ હાથ ધરી હતી. પોલીસ દ્વારા અકસ્માત કયા કારણોસર થયો તે જાણવા માટે વધુ તપાસ કરવામાં આવી રહી છે. હાલમાં પોલીસે મૃતકોના મૃતદેહને પોસ્ટમોર્ટમ માટે મોકલી આપ્યા છે અને તેમના પરિવારજનોને જાણ કરવાની કાર્યવાહી હાથ ધરી છે. આ અકસ્માતના કારણે સમગ્ર વિસ્તારમાં શોકનું મોજુ ફરી વળ્યું છે.
ડાંગ જિલ્લાના હનવતચોન્ડ ગામ નજીક એક પીકઅપ વાહન પલટી જતાં ગમખ્વાર અકસ્માત સર્જાયો હતો. આ દુર્ઘટનામાં 25 વર્ષીય યુવકનું સારવાર દરમિયાન કરુણ મૃત્યુ થયું હતું. અકસ્માતમાં અન્ય ઈજાગ્રસ્ત લોકોને તાત્કાલિક સારવાર માટે હોસ્પિટલમાં ખસેડવામાં આવ્યા છે.
પ્રાપ્ત માહિતી અનુસાર, આ અકસ્માત ઘાણીઆંબા ગામના વાલોડ અંબાજ કોલુ નજીક બન્યો હતો. ગોળ બનાવવાનું કામ પૂર્ણ કરીને મજૂરો પાછા ફરી રહ્યા હતા ત્યારે હનવતચોન્ડ ગામના ઉતરતીના રસ્તામાં પીકઅપ વાહનનું ટાયર અચાનક ફાટી ગયું હતું. ટાયર ફાટવાના કારણે વાહન નિયંત્રણ ગુમાવીને પલટી ગયું હતું અને શોર્ટ સર્કિટ થવાના કારણે આગ પણ લાગી હતી.
પીકઅપ વાહનમાં કુલ છ વ્યક્તિઓ સવાર હતા. જેમાં ડ્રાઇવર અને એક મહિલાને પણ ગંભીર ઈજાઓ પહોંચી હતી. રવિનાબેન બકારામ ભાઈ બાગુલ, ઉંમર 25 વર્ષ, જેઓ હારપાડાના વતની હતા, તેઓને ગંભીર ઈજાઓ થવાના કારણે 108 એમ્બ્યુલન્સ મારફતે આહવા સિવિલ હોસ્પિટલમાં ખસેડવામાં આવ્યા હતા, પરંતુ સારવાર મળે તે પહેલા જ તેમનું મૃત્યુ થયું હતું. આ ઘટનાથી સમગ્ર વિસ્તારમાં ભારે દુઃખની લાગણી છવાઈ ગઈ છે.
આ પણ વાંચો....
વાપી, અમરેલી અને લસકાણામાં ગમખ્વાર અકસ્માત: ડમ્પર, ટેમ્પો અને કારનો કહેર, 8 ના મોત, અનેક ઘાયલ
ટ્રેન્ડિંગ સમાચાર
ટોપ સ્ટોરી
