આગામી ત્રણ કલાકમાં રાજ્યમાં વાવાઝોડા સાથે ભારે વરસાદ તૂટી પડશે, 9 જિલ્લામાં 'રેડ એલર્ટ'
Gujarat Weather: હવામાન વિભાગ દ્વારા ચેતવણી જાહેર, 7 વાગ્યા સુધીમાં અનેક વિસ્તારોમાં ભારે મેઘગર્જના સાથે વરસાદની સંભાવના.
Gujarat Rain Alert: ગુજરાત રાજ્યના અનેક જિલ્લાઓમાં આગામી ત્રણ કલાકમાં તોફાની પવન, ભારે વરસાદ અને વીજળી પડવાની આગાહી કરવામાં આવી છે. હવામાન વિભાગે આ અંગે એલર્ટ જાહેર કર્યું છે અને લોકોને સાવચેત રહેવા તથા જરૂરી સાવચેતીનાં પગલાં લેવા સૂચના આપી છે.
આ જિલ્લાઓમાં 'રેડ એલર્ટ' જાહેર
અમદાવાદ, સુરેન્દ્રનગર, મોરબી, જામનગર, દેવભૂમિ દ્વારકા, પોરબંદર, રાજકોટ, સાબરકાંઠા અને બનાસકાંઠા જિલ્લાઓમાં 'રેડ એલર્ટ' જાહેર કરવામાં આવ્યું છે. આ વિસ્તારોમાં મધ્યમ તોફાની પવન સાથે 40 કિલોમીટર પ્રતિ કલાકથી ઓછી ઝડપે પવન ફૂંકાવાની શક્યતા છે. આ સાથે, પ્રતિ કલાક 15 મીલીમીટરથી વધુ ભારે વરસાદ અને વીજળી પડવાની મધ્યમ સંભાવના (60%) વ્યક્ત કરવામાં આવી છે. તંત્ર દ્વારા આ વિસ્તારોના લોકોને સલામત સ્થળે રહેવાની અને બિનજરૂરી કામ માટે બહાર ન જવાની ખાસ સલાહ આપવામાં આવી છે.
આ જિલ્લાઓમાં 'ઓરેન્જ એલર્ટ'
પાટણ, મહેસાણા, અરવલ્લી, ગાંધીનગર, કચ્છ, બોટાદ, અમરેલી, જૂનાગઢ, ભાવનગર, ગીર સોમનાથ, દીવ, સુરત, તાપી, ડાંગ, નવસારી, વલસાડ, દમણ અને દાદરા નગર હવેલીમાં 'ઓરેન્જ એલર્ટ' જાહેર કરાયું છે. અહીં હળવા તોફાન સાથે પવનની ઝડપ 40 કિલોમીટર પ્રતિ કલાકથી ઓછી રહેશે. આ વિસ્તારોમાં પ્રતિ કલાક 5 થી 15 મીલીમીટરના મધ્યમ વરસાદની શક્યતા છે, જ્યારે વીજળી પડવાની સંભાવના 30% થી 60% જેટલી ઓછી છે.
આ જિલ્લાઓમાં 'યલો એલર્ટ'
મહિસાગર, ખેડા, આણંદ, વડોદરા, પંચમહાલ, દાહોદ, છોટા ઉદેપુર, ભરૂચ અને નર્મદા જિલ્લામાં 'યલો એલર્ટ' જારી કરાયું છે. આ વિસ્તારોમાં પ્રતિ કલાક 5 મીલીમીટરથી ઓછા હળવા વરસાદની શક્યતા વ્યક્ત કરવામાં આવી છે.
ગુજરાતમાં આગામી 7 દિવસ મેઘમહેર
ગુજરાત રાજ્યમાં આગામી 7 દિવસ સુધી ભારે વરસાદની આગાહી કરવામાં આવી છે. ભારતીય હવામાન વિભાગ (IMD) દ્વારા જાહેર કરાયેલા પૂર્વાનુમાન મુજબ, હાલમાં 3 વરસાદી સિસ્ટમ સક્રિય હોવાથી રાજ્યભરમાં સારો વરસાદ જોવા મળશે. ખાસ કરીને, આજે એટલે કે ગુરુવારે કેટલાક વિસ્તારોમાં ભારેથી અતિભારે વરસાદ પડવાની સંભાવના છે.
આજે ક્યાં પડશે અતિભારે વરસાદ?
હવામાન વિભાગની આગાહી મુજબ, આજે કચ્છ, જામનગર, દેવભૂમિ દ્વારકા, બનાસકાંઠા, પાટણ, મહેસાણા અને સાબરકાંઠા જેવા જિલ્લાઓમાં ભારેથી અતિભારે વરસાદ પડી શકે છે. આ વિસ્તારોમાં તંત્ર અને લોકોને વિશેષ સાવચેતી રાખવા જણાવવામાં આવ્યું છે.
આ જિલ્લાઓમાં ભારે વરસાદની આગાહી
ઉપરોક્ત જિલ્લાઓ ઉપરાંત, પોરબંદર, રાજકોટ, જૂનાગઢ, ગીર સોમનાથ, અમરેલી, ભાવનગર, બોટાદ, મોરબી, અમદાવાદ, ગાંધીનગર, અરવલ્લી, મહીસાગર, સુરત, તાપી, નવસારી, વલસાડ, ડાંગ, દમણ અને દાદરા નગર હવેલીમાં પણ આજે ભારે વરસાદની આગાહી કરવામાં આવી છે. આ વિસ્તારોમાં પણ લોકોને સાવચેત રહેવા અને બિનજરૂરી બહાર ન નીકળવા સૂચના અપાઈ છે.
આ 3 વરસાદી સિસ્ટમ સક્રિય થવાથી રાજ્યના ખેડૂતો માટે સારા સમાચાર છે, જોકે નીચાણવાળા વિસ્તારો અને શહેરોમાં પાણી ભરાવાની સ્થિતિ પણ સર્જાઈ શકે છે. આગામી 7 દિવસ સુધી રાજ્યભરમાં ચોમાસું સક્રિય રહેશે અને સારો વરસાદ નોંધાશે તેવી શક્યતાઓ વ્યક્ત કરાઈ છે.
ટોપ સ્ટોરી
ટ્રેન્ડિંગ સમાચાર
