ગુજરાતમાં કાળઝાળ ગરમી વચ્ચે માવઠાની આગાહી: 18 થી 20 માર્ચ સુધી પલટાશે વાતાવરણ, જાણો ક્યાં પડશે વરસાદ

વેસ્ટર્ન ડિસ્ટર્બન્સની અસરથી રાજ્યના અનેક જિલ્લાઓમાં 30 થી 40 કિમીની ઝડપે પવન ફૂંકાશે; વરસાદ પડવાથી ગરમીમાંથી 2 થી 3 ડિગ્રીની રાહત મળવાની શક્યતા.

Gujarat rain alert

Source : ai

Show Quick Read

Key points generated by AI, verified by newsroom

• વેસ્ટર્ન ડિસ્ટર્બન્સ સક્રિય થતાં રાજ્યમાં માવઠું પડશે.
• 18-20 માર્ચે ઉત્તર, સૌરાષ્ટ્ર, મધ્ય ગુજરાતમાં વરસાદ.
• પવન, ગાજવીજ સાથે વરસાદથી તાપમાન ઘટશે.
• આગામી દિવસોમાં ગરમીથી મળશે રાહત.

ગુજરાતમાં છેલ્લા કેટલાક દિવસોથી ગરમીનો પારો સતત ઊંચે જઈ રહ્યો છે અને લોકો પરસેવે રેબઝેબ થઈ રહ્યા છે. પરંતુ, આ કાળઝાળ ગરમી વચ્ચે હવામાન વિભાગે ખેડૂતો અને સામાન્ય નાગરિકો માટે ચિંતાજનક પણ ગરમીથી રાહત આપતા સમાચાર આપ્યા છે. રાજ્યમાં 'વેસ્ટર્ન ડિસ્ટર્બન્સ' સક્રિય થવાને કારણે આવતી 18, 19 અને 20 માર્ચના રોજ કમોસમી વરસાદ (માવઠું) પડવાની આગાહી કરવામાં આવી છે. આ દિવસો દરમિયાન 30 થી 40 કિલોમીટરની ઝડપે પવન ફૂંકાશે અને ગાજવીજ સાથે વરસાદ પડવાથી મહત્તમ તાપમાનમાં 2 થી 3 ડિગ્રીનો ઘટાડો થવાની શક્યતા છે.

હવામાન વિભાગની તારીખ મુજબની આગાહી નીચે પ્રમાણે છે:

18 માર્ચ: ક્યાં પલટાશે વાતાવરણ?

18મી માર્ચે ખાસ કરીને ઉત્તર ગુજરાત અને સૌરાષ્ટ્રના કેટલાક ભાગોમાં વાતાવરણમાં પલટો જોવા મળશે. આ દિવસે બનાસકાંઠા, પાટણ અને સાબરકાંઠાની સાથે-સાથે સૌરાષ્ટ્રના જામનગર, મોરબી, દેવભૂમિ દ્વારકા અને કચ્છ જિલ્લામાં હળવો વરસાદ પડી શકે છે.

19 માર્ચ: સૌથી વધુ જિલ્લાઓમાં અસર

19મી માર્ચે વરસાદનું જોર અને વિસ્તાર બંને વધશે. આ દિવસે રાજ્યના મોટાભાગના વિસ્તારોમાં મધ્યમ વરસાદની વકી છે:

ઉત્તર અને મધ્ય ગુજરાત: બનાસકાંઠા, પાટણ, સાબરકાંઠા, દાહોદ, પંચમહાલ, વડોદરા અને છોટાઉદેપુર.

દક્ષિણ ગુજરાત: નર્મદા, ભરૂચ, સુરત, ડાંગ, તાપી, નવસારી, વલસાડ તેમજ કેન્દ્રશાસિત પ્રદેશ દમણ અને દાદરા નગર હવેલી.

સૌરાષ્ટ્ર અને કચ્છ: રાજકોટ, જામનગર, પોરબંદર, જૂનાગઢ, અમરેલી, ભાવનગર, મોરબી, દેવભૂમિ દ્વારકા, ગીર સોમનાથ, બોટાદ સહિત કચ્છ અને દીવ.

20 માર્ચ: ઉત્તર ગુજરાતમાં માવઠાની અસર

20મી માર્ચે વરસાદની અસર ધીમી પડશે, પરંતુ ઉત્તર ગુજરાતના વિસ્તારો જેમ કે બનાસકાંઠા, સાબરકાંઠા, પાટણ, અરવલ્લી, મહેસાણા અને પાલનપુરમાં વાદળછાયું વાતાવરણ રહેશે અને હળવો વરસાદ વરસી શકે છે.

હવામાન વિભાગના ડાયરેક્ટરનું શું કહેવું છે?

હવામાન વિભાગના ડાયરેક્ટર એ. કે. દાસના જણાવ્યા અનુસાર, 16 અને 17 તારીખથી જ વાતાવરણમાં પલટો આવવાનું શરૂ થઈ જશે. જ્યારે 18, 19 અને 20 તારીખે હળવાથી મધ્યમ વરસાદની સાથે 40 થી 50 કિમીની ઝડપે પવન ફૂંકાવાની અને ગાજવીજ થવાની પૂરી સંભાવના છે. એક વેસ્ટર્ન ડિસ્ટર્બન્સ છેક ગુજરાત સુધી વિસ્તરેલું હોવાથી આ માવઠું પડશે.

જોકે, સારી વાત એ છે કે આ વરસાદને કારણે આગામી ચાર દિવસમાં તાપમાન ઘટશે અને ગરમીથી થોડી રાહત મળશે. નોંધનીય છે કે હાલમાં રાજકોટમાં સૌથી વધુ 39.2 ડિગ્રી તાપમાન નોંધાયું છે, જ્યારે અમદાવાદમાં પારો 39 ડિગ્રીની આસપાસ છે.

આ પણ વાંચો

દેશમાં એકસાથે 4 સાયક્લોનિક સિસ્ટમ એક્ટિવ, 7 દિવસ ભારે વરસાદ અને કરા પડવાની આગાહી