જૂનાગઢમાં રાજકીય ભૂકંપ! જવાહર ચાવડાએ 'રોજગાર'ની વાત કરી અને ભાજપના જ વિરોધીઓએ ભૂતકાળની 'ફાઈલો' ખોલી

પૂર્વ કેબિનેટ મંત્રી જવાહર ચાવડાએ સોશિયલ મીડિયા પર એક વિડીયો પોસ્ટ કરી 01 થી 03 સપ્ટેમ્બર દરમિયાન વંથલી, મેંદરડા અને માણાવદરનો પ્રવાસ કરીને બેરોજગાર યુવાનો અને મહિલાઓ સાથે સંવાદ કરવાની જાહેરાત કરી છે.

જૂનાગઢ જિલ્લામાં ગરમાઈ રાજનીતિ

Source : social media

Junagadh politics news: જૂનાગઢ જિલ્લામાં રાજકારણ ગરમાયું છે. ભાજપથી નારાજ હોવાનું મનાતા પૂર્વ કેબિનેટ મંત્રી જવાહર ચાવડાએ સોશિયલ મીડિયા પર એક વિડીયો પોસ્ટ કરી 01 થી 03 સપ્ટેમ્બર દરમિયાન વંથલી, મેંદરડા અને માણાવદરનો પ્રવાસ કરીને બેરોજગાર યુવાનો અને મહિલાઓ સાથે સંવાદ કરવાની જાહેરાત કરી છે. આ જાહેરાત બાદ તરત જ રાજનીતિમાં હલચલ મચી ગઈ હતી. માણાવદરના ધારાસભ્ય અરવિંદ લાડાણી અને સાવજ ડેરીના ચેરમેન દિનેશ ખાટરીયાએ સોશિયલ મીડિયા લાઈવ કરીને જવાહર ચાવડા પર આકરા શાબ્દિક પ્રહારો કર્યા છે અને તેમના ભૂતકાળના કાર્યકાળ પર ગંભીર આરોપો લગાવ્યા છે.

પૂર્વ મંત્રી જવાહર ચાવડા દ્વારા શરૂ કરાયેલા 'રોજગાર સંવાદ' અભિયાનને પગલે જૂનાગઢનું રાજકારણ ગરમાયું છે. માણાવદરના ધારાસભ્ય અરવિંદ લાડાણીએ જવાહર ચાવડા પર જીનિંગ ઉદ્યોગને નુકસાન પહોંચાડવા અને સિંચાઈના કામો ન કરવા જેવા આરોપો લગાવ્યા છે. આ સાથે સાવજ ડેરીના ચેરમેન દિનેશ ખાટરીયાએ વધુ ગંભીર આરોપ લગાવતા કહ્યું કે ચાવડાએ માર્કેટ યાર્ડના ચેરમેન તરીકેના 30 વર્ષના કાર્યકાળ દરમિયાન 'SEZ' ની ₹50 કરોડની રકમ ચૂંટણીમાં વાપરી નાખી હતી. આ સામ-સામેના આરોપોથી સ્પષ્ટ છે કે જૂનાગઢમાં રાજકીય ખેંચતાણ શરૂ થઈ ચૂકી છે.

જવાહર ચાવડાનું 'રોજગાર સંવાદ' અભિયાન

જવાહર ચાવડાએ પોતાના સોશિયલ મીડિયા એકાઉન્ટ પર એક વિડીયો પોસ્ટ કરીને જણાવ્યું કે તેઓ આગામી 01 થી 03 સપ્ટેમ્બર દરમિયાન વંથલી, મેંદરડા અને માણાવદર તાલુકામાં પ્રવાસ કરશે. આ પ્રવાસનો મુખ્ય ઉદ્દેશ બેરોજગાર મહિલાઓ અને યુવાનો સાથે બેરોજગારીના મુદ્દે સંવાદ કરવાનો છે.

ધારાસભ્ય અરવિંદ લાડાણીનો પ્રહાર

જવાહર ચાવડાની આ જાહેરાત બાદ, માણાવદરના ધારાસભ્ય અરવિંદ લાડાણીએ સોશિયલ મીડિયા પર લાઈવ થઈને ચાવડા પર તીવ્ર પ્રહારો કર્યા. લાડાણીએ આરોપ લગાવ્યો કે જવાહર ચાવડાના કાર્યકાળ દરમિયાન માણાવદરમાં જીનિંગ ઉદ્યોગ પડી ભાગ્યો, સિંચાઈના કામો થયા નહીં અને રિવરફ્રન્ટ જેવા પ્રોજેક્ટ્સમાં રૂપિયાનો બેફામ વેડફાટ થયો. તેમણે સવાલ ઉઠાવ્યો કે જે વ્યક્તિએ સત્તામાં રહીને આ મુદ્દાઓ પર કામ કર્યું નથી, તે હવે બેરોજગારીની વાત કેવી રીતે કરી શકે?

દિનેશ ખાટરીયાના ગંભીર આરોપો

ધારાસભ્ય અરવિંદ લાડાણીના આરોપોને સાવજ ડેરીના ચેરમેન દિનેશ ખાટરીયાએ વધુ વેગ આપ્યો. તેમણે સોશિયલ મીડિયા લાઈવ દરમિયાન જવાહર ચાવડા પર અત્યંત ગંભીર આરોપ લગાવ્યો. ખાટરીયાએ જણાવ્યું કે જવાહર ચાવડા 30 વર્ષ સુધી માર્કેટ યાર્ડના ચેરમેન રહ્યા, અને આ સમયગાળામાં તેમણે 'SEZ' ની ₹50 કરોડ જેટલી મોટી રકમનો ઉપયોગ ચૂંટણીઓમાં કર્યો. આ આરોપથી રાજકીય વર્તુળોમાં ભારે ચર્ચા જાગી છે.

આ પણ વાંચો

‘વરસાદ આવે એટલે પાંખું વાળા મકોડા આવે, ચૂંટણી આવે એટલે આમ આદમીવાળા આવે’: ગોપાલ ઈટાલિયા પર ભાજપના ધારાસભ્ય ઉદય કાનગડનો કટાક્ષ