Local Body Election Result 2025: ધોરાજી પાલિકામાં BJPનો ભગવો લહેરાયો, જાણો કેટલી બેઠકો જીતી
સ્થાનિક સ્વરાજની ચૂંટણીના પરિણામો આજે જાહેર થઈ રહ્યા છે. સવારે 9 વાગ્યાથી મતગણતરી શરૂ કરવામાં આવી હતી.
Local Body Election Result 2025 : સ્થાનિક સ્વરાજની ચૂંટણીના પરિણામો આજે જાહેર થઈ રહ્યા છે. સવારે 9 વાગ્યાથી મતગણતરી શરૂ કરવામાં આવી હતી. જૂનાગઢ મહાનગરપાલિકા, 68 નગરપાલિકા અને 3 તાલુકા પંચાયતની ચૂંટણી માટે સરેરાશ 57 ટકા મતદાન થયું હતું. સ્થાનિક સ્વરાજની ચૂંટણીમાં ભારતીય જનતા પાર્ટીનો દબદબો જોવા મળી રહ્યો છે. ધોરાજી નગરપાલિકામાં ભાજપનો ભગવો લહેરાયો છે. કૉંગ્રેસનો ગઢ ગણાતી ધોરાજી પાલિકામાં ભાજપે શાનદાર જીત મેળવી છે.
ધોરાજી પાલિકામાં ભાજપનો ભગવો લહેરાયો
ધોરાજી પાલિકામાં ભાજપનો ભગવો લહેરાયો છે. ધોરાજી પાલિકાની 9 વોર્ડ ની 36 બેઠકો પરથી 24 બેઠક પર ભાજપની શાનદાર જીત થઈ છે. કોંગ્રેસના ફાળે 12 બેઠકો આવી છે. ધોરાજી પાલિકામા કોંગ્રેસનો ગઢ ભાજપે તોડી નાખ્યો છે. ભાજપે ધોરાજી નગરપાલિકા ઉપર કબજો કર્યો છે.
જેતપુરમાં જયેશ રાદડિયા ફરી બન્યા કિંગ મેકર
જેતપુરમાં ફરી જયેશ રાદડિયા કિંગ મેકર બન્યા છે. જેતપુર પાલિકાની 44 બેઠકો પરથી 32 બેઠક પર ભાજપનો કબજો જોવા મળ્યો છે. અહીં પાલિકાની વોર્ડ 11 માં 44 બેઠકોમાંથી ભાજપના 32 ઉમેદવારોની જીત થઈ છે. જ્યારે અપક્ષ 11 બેઠકો જીતવામાં સફળ થયું છે. જેતપુર પાલિકામાં કોંગ્રેસને માત્ર 1 બેઠક મળી છે. જયેશ રાદડિયાના ગઢમાં ભાજપનો ભગવો લહેરાયો છે. જેતપુર પાલિકાની ચૂંટણીમાં ભાજપે આપ અને કોંગ્રેસનો વાઇટ વોશ કર્યો છે. ધારાસભ્ય જયેશ રાદડિયાએ પાલિકાના સદસ્યોને વધાવ્યા હતા.
અમરેલી જિલ્લાની ચારેય નગરપાલિકા પર ભાજપનો દબદબો
સ્થાનિક સ્વરાજની ચૂંટણીમાં અમરેલી જિલ્લાની ચારેય નગરપાલિકા પર ભાજપનો દબદબો જોવા મળ્યો હતો. રાજુલા અને જાફરાબાદમાં કોંગ્રેસના સૂપડા સાફ થયા હતા.
ચલાલા નગર પાલિકાની ચૂંટણીમાં તમામ 6 વોર્ડમાં ભાજપના ઉમેદવારો વિજેતા જાહેર કરાયા છે. આ સાથે ભાજપના 24 ઉમેદવારો જીતી ગયા છે અને જેના પગલે ધારાસભ્ય જે.વી.કાકડીયા સહિતના નેતાઓ અને કાર્યકરોમાં ભારે ઉત્સાહ જોવા મળી રહ્યો છે.
લાઠી નગરપાલિકામાં કુલ બેઠકો 24માંથી ભારતીય જનતા પાર્ટીએ 18 બેઠકો પર જીત મેળવી છે. જ્યારે કોંગ્રેસને 5 બેઠકો મળી છે. અહીં અપક્ષને 1 બેઠક મળી છે.
5 હજાર ઉમેદવારો મેદાનમાં હતા
સ્થાનિક સ્વરાજ્યની ચૂંટણીમાં 5775 દાવેદારો મેદાનમાં ઉતર્યા હતા અને કુલ 36 લાખ 71 હજાર 479 મતદારોને મતાધિકાર મળ્યો હતો. રાજ્યમાં પાલિકા-પંચાયતના યોજાયેલા મતદાનમાં ઘણા મતદાન મથકો પર મતદારોની લાંબી લાંબી કતારો પણ જોવા મળી હતી.
ઉલ્લેખનીય છે કે, આ વખતે સ્થાનિક સ્વરાજ્યની ચૂંટણી માટે કુલ 7036 ઉમેદવારીપત્રો દાખલ થયા હતા, જેમાંથી 1261 પત્રો અમાન્ય ઠર્યા, જ્યારે કે 5775 ઉમેદવારોની ઉમેદવારી માન્ય રાખવામાં આવી. જે બાદ 478 ઉમેદવારોએ ઉમેદવારીપત્ર પરત ખેંચ્યા, જેના કારણે 213 બેઠકો બિનહરીફ થઈ ગઈ. જેના પગલે હરિફાઇ હેઠળની બેઠકો માટે કુલ 5 હજાર 84 ઉમેદવારો ચૂંટણીના જંગમાં મેદાને ઉતર્યા હતાં.
Local Body Election: દ્વારકાની તમામ 28 બેઠક પર ભાજપની જીત, 68માંથી 31માં નગરપાલિકામાં વિજય
ટોપ સ્ટોરી
ટ્રેન્ડિંગ સમાચાર
