મોરબીમાં મોટો ખેલ: 17 બેઠકો સાથે બહુમતી છતાં ભાજપ પ્રમુખ પદથી વંચિત, કોંગ્રેસને મળ્યો તાજ!

Morbi District Panchayat election: આદિજાતિ મહિલા અનામત બેઠક પર ભાજપ હારતાં કોંગ્રેસને મળ્યો સત્તાનો તાજ; ઉપપ્રમુખ પદે ભાજપના વિપુલ ગરચર, પણ ખુરશી પાસે ભાણેજના બેસવાથી વિવાદ સર્જાયો.

morbi district panchayat election congress gitaben dubaria bjp majority

Source : ai

Show Quick Read

Key points generated by AI, verified by newsroom

• પ્રમુખની બાજુમાં ભાણેજ બેસીને હારતોરા સ્વીકારતા રાજકીય ચર્ચાનો વિષય બન્યા.

Morbi District Panchayat election: રાજકારણમાં ક્યારેક એવા ખેલ જોવા મળે છે કે સ્પષ્ટ બહુમતી હોવા છતાં પાર્ટી સત્તાના સર્વોચ્ચ શિખરે બેસી શકતી નથી. આવું જ કંઈક મોરબી જિલ્લા પંચાયતમાં જોવા મળ્યું છે. અહી કુલ 24 માંથી 17 બેઠકો જીતીને ભાજપે પોતાનો દબદબો તો જાળવી રાખ્યો, પરંતુ પ્રમુખ પદ આદિજાતિ મહિલા માટે અનામત હોવાથી અને ત્યાં ભાજપના ઉમેદવારની હાર થતાં, આ મહત્ત્વની ખુરશી કોંગ્રેસના ફાળે જતી રહી છે. પરિણામે નેકનામ બેઠક પરથી કોંગ્રેસના ગીતાબેન દુબરીયા બિનહરીફ પ્રમુખ તરીકે ચૂંટાયા છે, જ્યારે ઉપપ્રમુખ પદ ખાનપર બેઠકના ભાજપના સભ્ય વિપુલભાઈ ગરચરને મળ્યું છે.

બહુમતી ભાજપની, પણ તાજ કોંગ્રેસનો

આજે મોરબી જિલ્લા પંચાયતમાં આગામી અઢી વર્ષની ટર્મ માટે પ્રમુખ અને ઉપપ્રમુખની ચૂંટણી યોજાઈ હતી. પંચાયતનું સંખ્યાબળ જોઈએ તો 17 સભ્યો ભાજપના અને માત્ર 7 સભ્યો કોંગ્રેસના છે. પણ સમીકરણ કંઈક એવા હતા કે પ્રમુખ પદ આદિજાતિ મહિલા માટે અનામત હતું. પ્રમુખ પદ માટે માત્ર 1 જ ફોર્મ ભરાયું હતું, જેથી કોંગ્રેસના ગીતાબેન દુબરીયાની પ્રમુખ તરીકે બિનહરીફ પસંદગી થઈ ગઈ. બીજી તરફ, ઉપપ્રમુખ તરીકે ભાજપના વિપુલભાઈ ગરચરની વરણી કરવામાં આવી છે.

આ સાથે જ જિલ્લા પંચાયતના અન્ય હોદ્દાઓની પણ વહેંચણી કરવામાં આવી છે. જેમાં કારોબારી ચેરમેન તરીકે મનિષકુમાર કાંજીયા, પક્ષના નેતા તરીકે સવિતાબેન રાઠોડ અને દંડક તરીકે કાજલબેન વિઠ્ઠલાપરાની નિમણૂક કરવામાં આવી છે. અગાઉ તાલુકા પંચાયતની ચૂંટણી લડી ચૂકેલા ગીતાબેને પ્રથમ વખત જ જિલ્લા પંચાયતના પ્રમુખનો ચાર્જ સંભાળતાની સાથે જ જિલ્લાના તમામ વિકાસના કાર્યો પૂરા કરવાની ખાતરી આપી હતી.

આ પણ વાંચોઃ જામનગર: લાલપુરમાં બહુમતી છતાં AAP સત્તાથી દૂર, ભાજપના દિવ્યાબા બન્યા પ્રમુખ, જાણો શું થયો ખેલ?

ખુરશી પર પ્રમુખ, અને બાજુમાં ભાણેજનો વટ!

આ બધી રાજકીય ગતિવિધિઓ વચ્ચે આજની આ વરણીમાં એક દ્રશ્ય ભારે ચર્ચાનો વિષય બન્યું હતું. ગીતાબેન પ્રમુખની ખુરશી પર બેઠા હતા, પરંતુ તેમની બરાબર બાજુમાં જ તેમના ભાણેજ પંકજભાઈ ગજેરા ગોઠવાઈ ગયા હતા! સામાન્ય નિયમ મુજબ, હોદ્દા પર બેઠેલા પ્રમુખની ખુરશીની બાજુમાં અન્ય કોઈ વ્યક્તિ બેસી શકે નહીં. છતાં, ભાણેજ માત્ર ત્યાં બેઠા જ નહીં, પરંતુ તેમણે કોંગ્રેસના આગેવાનો અને અન્ય લોકો તરફથી આવતા હારતોરા પણ હરખભેર સ્વીકાર્યા હતા. આ દ્રશ્ય જોઈને હવે રાજકીય વર્તુળોમાં એવા સવાલો ઉઠી રહ્યા છે કે શું પ્રમુખ માત્ર નામના જ રહેશે અને પંચાયતનો આખો વહીવટ તેમના ભાણેજ જ સંભાળશે?