Rain Forecast: આજથી અતિ ભારે વરસાદની આગાહી, આ જિલ્લામાં મૂશળધાર વરસાદનું રેડ એલર્ટ, શાળામાં રજા જાહેર

Gujarat Weather Forecast: હવામાન વિભાગની આગાહી મુજબ ગુજરાતમાં વધુ એક ભારે વરસાદનો રાઉન્ડ 31 જુલાઇથી એટલે કે આજથી થશે શરૂ. હવામાન વિભાગે ગુજરાત રિઝનમાં ભારે વરસાદનું એલર્ટ જાહેર કર્યું છે.

પ્રતીકાત્મક તસવીર

Source : abp live

Show Quick Read

Key points generated by AI, verified by newsroom

• બંગાળની ખાડીના ડીપ ડિપ્રેશનથી રાજ્યમાં વરસાદનો નવો રાઉન્ડ.
• ઉત્તર, મધ્ય, પૂર્વ, દક્ષિણ ગુજરાતમાં ભારે વરસાદ, ઓરેન્જ એલર્ટ.
• ચોટાઉદેપુર, નર્મદા, અમદાવાદમાં અતિભારે વરસાદનું રેડ એલર્ટ.
• અમદાવાદ સહિત ૧૩ જિલ્લામાં શાળાઓ-કોલેજોમાં રજા જાહેર.

Gujarat Weather Forecast: બંગાળની ખાડીમાં સર્જાયેલા ડીપ ડિપ્રેશનની અસર હવે ગુજરાત સુધી પહોંચી શકે છે. હવામાનના વિવિધ મોડલ અને હવામાન વિભાગની આગાહી મુજબ 31 જુલાઈથી એટલે કે આજથી  રાજ્યમાં ફરી ભારે વરસાદનો નવો રાઉન્ડ શરૂ થવાની સંભાવના છે. ઉત્તર, મધ્ય, પૂર્વ અને દક્ષિણ ગુજરાતના અનેક જિલ્લાઓ માટે ઓરેન્જ એલર્ટ જાહેર કરવામાં આવ્યું છે.

 બંગાળની ખાડીમાં સર્જાયેલા ડીપ ડિપ્રેશનના કારણે હાલમાં ઓડિશા, ઝારખંડ અને આંધ્રપ્રદેશમાં ભારે વરસાદ પડી રહ્યો છે. હવામાનના કેટલાક મોડલ મુજબ આ સિસ્ટમ પશ્ચિમ બંગાળ, ઝારખંડ અને મધ્યપ્રદેશ થઈને ગુજરાત તરફ આગળ વધી શકે છે.  હવામાનના મોડલ મુજબ રાજ્યમાં 31 જુલાઈથી  એટલે કે આજે ફરી ભારે વરસાદનો વધુ એક રાઉન્ડ શરૂ થવાની શક્યતા છે.

આ પણ વાંચો:અંબાલાલ પટેલની મોટી આગાહી: 48 કલાક અતિભારે વરસાદની શક્યતા, સિસ્ટમ મજબૂત થશે તો 20 ઈંચ ખાબકશે

હવામાનના મોડલ અનુસાર દક્ષિણ ગુજરાત, ઉત્તર ગુજરાત, મધ્ય ગુજરાત અને પૂર્વ ગુજરાતમાં ભારે વરસાદની સંભાવના વ્યક્ત કરવામાં આવી છે. બીજી તરફ કચ્છ અને સૌરાષ્ટ્રમાં પણ મધ્યમથી સારો વરસાદ નોંધાઈ શકે છે.

હવામાન વિભાગે 30 જુલાઈથી ગુજરાત રિજનના અનેક વિસ્તારો માટે ઓરેન્જ એલર્ટ જાહેર કર્યું છે. ઉત્તર ગુજરાત, મધ્ય ગુજરાત, પૂર્વ ગુજરાત અને દક્ષિણ ગુજરાતમાં 30 જુલાઈથી 2 ઓગસ્ટ દરમિયાન ભારેથી અતિભારે વરસાદ પડી શકે છે, તેવી આગાહી કરવામાં આવી છે. આ સિસ્ટમની અસર જુલાઈના અંતથી શરૂ થઇને 3 કે 4 ઓગસ્ટ  સુધી  રહેવાની  શક્યતા છે, જેના કારણે રાજ્યના અનેક વિસ્તારોમાં મધ્યમથી હળવો વરસાદ પણ ચાલુ રહી શકે છે.

આ જિલ્લાઓમાં ભારે વરસાદની આગાહી

હવામાન વિભાગના અનુમાન મુજબ છોટાઉદેપુર, ડાંગ, પંચમહાલ, દાહોદ, નર્મદા, સુરત, વલસાડ, તાપી, ભરૂચ, ગાંધીનગર, અમદાવાદ, મહીસાગર, અરવલ્લી, બોટાદ, ભાવનગર, સુરેન્દ્રનગર અને રાજકોટ જિલ્લામાં ભારે વરસાદની શક્યતા છે.                  

31 જુલાઈએ ક્યાં કેટલું એલર્ટ?

31 જુલાઈથી રાજ્યમાં વરસાદી પ્રવૃત્તિ વધુ સક્રિય બનશે. ખાસ કરીને છોટાઉદેપુર અને નર્મદા જિલ્લામાં ભારે વરસાદને લઈને રેડ એલર્ટ જાહેર કરવામાં આવ્યું છે. જ્યારે રાજ્યના અન્ય 10 જિલ્લાઓમાં ઓરેન્જ એલર્ટ જાહેર કરાયું છે. આ દરમિયાન શુક્રવારથી લાંબા સમયથી વરસાદથી વંચિત રહેલા કચ્છ અને દેવભૂમિ દ્વારકા જિલ્લામાં પણ વરસાદી માહોલ જામે તેવી શક્યતા વ્યક્ત કરવામાં આવી છે.

 

13 જિલ્લાની શાળા-કોલેજોમાં રજા જાહેર

ભારે વરસાદની સંભાવનાને પગલે અમદાવાદ, વડોદરા, ગાંધીનગર, જામનગર, સુરત, આણંદ, ભરૂચ, નવસારી, ડાંગ, તાપી, દાહોદ અને ખેડા સહિત કુલ 13 જિલ્લાઓમાં શાળા અને કોલેજોમાં આવતીકાલે રજા જાહેર કરવામાં આવી છે. વિદ્યાર્થીઓને વરસાદ દરમિયાન મુસાફરીમાં મુશ્કેલી ન પડે અને કોઈ અનિચ્છનીય ઘટના ન બને તે માટે આ નિર્ણય લેવામાં આવ્યો હોવાનું તંત્રએ જણાવ્યું છે. 

અમદાવાદમાં આંગણવાડીઓ પણ રહેશે બંધ

અમદાવાદમાં ભારે વરસાદની આગાહીને ધ્યાનમાં રાખીને શાળા અને કોલેજોની સાથે આંગણવાડીઓને પણ 3 ઓગસ્ટ સુધી બંધ રાખવાનો નિર્ણય લેવામાં આવ્યો છે. નાના બાળકોની સુરક્ષાને ધ્યાનમાં રાખીને આ નિર્ણય લેવામાં આવ્યો હોવાનું અધિકારીઓએ જણાવ્યું છે.

ત્રણ દિવસ રાજ્યમાં ભારે વરસાદની આગાહી

હવામાન વિભાગના અનુમાન મુજબ આવતીકાલથી રાજ્યના વિવિધ વિસ્તારોમાં વરસાદનું જોર વધશે. કેટલાક વિસ્તારોમાં ભારે પવન સાથે અતિભારે વરસાદની શક્યતા છે. નીચાણવાળા વિસ્તારોમાં પાણી ભરાવા, નદીઓ અને નાળાઓમાં જળસ્તર વધવા તેમજ વાહનવ્યવહાર પ્રભાવિત થવાની સંભાવના વ્યક્ત કરવામાં આવી છે.કાલ માટે અમદાવાદ જિલ્લામાં અત્યંત ભારે વરસાદનું રેડ એલર્ટ જાહેર કરવામાં આવ્યું છે. ઉપરાંત આણંદ, વડોદરા અને ભરૂચ જિલ્લામાં પણ અતિભારે વરસાદની સંભાવનાને પગલે રેડ એલર્ટ જાહેર કરાયું છે. સ્થાનિક વહીવટી તંત્રને જરૂરી સાવચેતી રાખવા અને બચાવ દળોને સ્ટેન્ડબાય રાખવા સૂચના આપવામાં આવી છે.