પોરબંદર બીટ ગાર્ડ હેતલ હત્યા કેસ, હેતલ સરકારી કામે ગયેલી ત્યારે પતિ સાથે કેમ ગયો હતો ? પર્સનલ કારમાં કેમ ગઈ ?

ગેરકાયદેસર ચાલતી દેશીદારૂ બનાવવાની ભઠ્ઠી તોડવા માટે પોતાના શિક્ષક પતિ કીર્તિ સોલંકી અને રોજમદાર નાગાભાઈ સાથે પોતાની પર્સનલ કાર લઈને ગઈ હતી.

પોરબંદરઃ બરડા ડુંગરમાં ગર્ભવતી મહિલા બીટ ગાર્ડ અને તેના પતિ સહિત ત્રણ લોકોના હત્યાના પ્રકરણમાં ચોંકાવનારો ખુલાસો થયો છે. આ હત્યા અન્ય વનકર્મી લખમણ ઓડેદરા દ્વારા કરવામાં આવી હોવાનો અને લખમણ તથા હેતલ વચ્ચે પ્રેમ સંબધો હોવાનો ખુલાસો થયો છે. જોકે , આ હત્યા પ્રકરણમાં અનેક સવાલો ઉઠી રહ્યા છે. બીટગાર્ડ હેતલને બાતમી મળી હતી કે બરડા ડુંગરમાં દારૂની ભઠ્ઠીઓ ચાલી રહી છે. આ બાતમીને આધારે ગેરકાયદેસર ચાલતી દેશીદારૂ બનાવવાની ભઠ્ઠી તોડવા માટે પોતાના શિક્ષક પતિ કીર્તિ સોલંકી અને રોજમદાર નાગાભાઈ સાથે પોતાની પર્સનલ કાર લઈને ગઈ હતી. હવે આ હત્યા કેસમાં આરોપી તો સામે આવી ગયો છે, પરંતુ સવાલ ઉઠી રહ્યા છે કે, હેતલ સરકારી કામે જઈ રહી હતી, ત્યારે તેની સાથે તેનો શિક્ષક પતિ કેમ ગયો હતો ? એવો પણ સવાલ ઉઠ્યો છે કે, તે રેડ પાડવા જઈ રહી હતી, ત્યારે પોતાની પર્સનલ કાર લઈને કેમ ગઈ હતી ? આ સવાલો અંગે કોઈ સ્પષ્ટ ઉત્તરો મળતા નથી પણ એવી ધારણા છે કે, પત્ની ગર્ભવતી હોવાથી પતિ તેની કાળજી રાખવા માટે સાથે રહેતો હતો. આ અંગે કોઈ સચોટ વિગતો જાણવા મળી નથી કે કોઈ સ્પષ્ટતા કરાઈ નથી.