ઓપરેશન સિંદૂરની 5 મિનિટ બાદ જ ભારતે પાકિસ્તાનને લગાવ્યો હતો ફોન? CDS અનિલ ચૌહાણે કર્યો મોટો ખુલાસો

ભારતે પાકિસ્તાનને આપી સ્પષ્ટ ચેતવણી: "હુમલો કરશો તો વધુ કડક જવાબ મળશે," પહલગામ હુમલાની ક્રૂરતાનો ઉલ્લેખ.

સીડીએસ અનિલ ચૌહાણે ઓપરેશન સિંદૂરને લઈ કર્યો મોટો ખુલાસો

Source : PTI

CDS Anil Chauhan Pakistan statement: ભારતના ચીફ ઓફ ડિફેન્સ સ્ટાફ (CDS) અનિલ ચૌહાણે 'ઓપરેશન સિંદૂર' અંગે એક ચોંકાવનારો ખુલાસો કર્યો છે. તેમણે જણાવ્યું હતું કે ભારતીય સેના દ્વારા આતંકવાદી ઠેકાણાઓનો નાશ કર્યાના માત્ર પાંચ મિનિટ પછી જ ડાયરેક્ટર જનરલ ઓફ મિલિટરી ઓપરેશન્સ (DGMO) દ્વારા પાકિસ્તાની પક્ષને આ અંગે જાણ કરવામાં આવી હતી. આ ઉપરાંત, ભારતે પાકિસ્તાનને સ્પષ્ટ શબ્દોમાં ચેતવણી પણ આપી હતી કે જો તેઓ હુમલો કરશે તો તેનો જવાબ વધુ કડક રીતે આપવામાં આવશે.

ભારતના હુમલાનો હેતુ આતંકવાદનો સફાયો:

સાવિત્રીબાઈ ફૂલે પુણે યુનિવર્સિટીના 'ફ્યુચર વોર્સ એન્ડ વોરફેર' કાર્યક્રમમાં ભાગ લેતા CDS અનિલ ચૌહાણે જણાવ્યું હતું કે, "આતંકવાદી ઠેકાણાઓનો નાશ કર્યાના પાંચ મિનિટ પછી ડીજીએમઓએ પાકિસ્તાની પક્ષને જાણ કરી હતી. અમે પાકિસ્તાની જનરલને એમ પણ કહ્યું હતું કે જો તેઓ હુમલો કરશે તો અમે આ વખતે વધુ મજબૂત જવાબ આપીશું. અમારી પાસે પાકિસ્તાન કરતાં વધુ ઘાતક શસ્ત્રો છે." તેમણે ભારપૂર્વક જણાવ્યું કે ભારતનું લક્ષ્ય ફક્ત આતંકવાદીઓને ખતમ કરવાનું છે.

પહલગામ હુમલો અને ભારતમાં આતંકવાદનો ઇતિહાસ:

CDS ચૌહાણે તાજેતરના પહલગામ આતંકવાદી હુમલાનો ઉલ્લેખ કરતા તેની ક્રૂરતાની નિંદા કરી હતી. તેમણે કહ્યું, "પહલગામમાં જે બન્યું તે અત્યંત ક્રૂરતા હતી. હુમલામાં માર્યા ગયેલા લોકોના પરિવાર અને બાળકોની સામે ધર્મના નામે માથામાં ગોળી મારી દેવામાં આવી હતી. આ કોઈપણ રીતે સ્વીકાર્ય નથી. તેનાથી સમાજમાં નફરત ફેલાઈ હતી."

ચૌહાણે યાદ અપાવ્યું કે ભારતમાં આ પહેલી આતંકવાદી ઘટના નહોતી. તેમણે કહ્યું, "દેશમાં આ પહેલા પણ ઘણા આતંકવાદી હુમલા જોવા મળ્યા છે. ભારત સૌથી વધુ આતંકવાદી ઘટનાઓનો ભોગ બન્યું છે અને તેના કારણે લગભગ ૨૦,૦૦૦ લોકો મૃત્યુ પામ્યા છે."

પાકિસ્તાનના ડ્રોન હુમલાને ભારતની નિષ્ફળતા:

ભારતની સંરક્ષણ ક્ષમતા વિશે વાત કરતા CDS ચૌહાણે પાકિસ્તાનના ડ્રોન અને મિસાઈલ હુમલાને નિષ્ફળ બનાવવાનો ઉલ્લેખ કર્યો. તેમણે કહ્યું, "અમને ખબર હતી કે અમારી પાસે વધુ સારી એન્ટી-ડ્રોન સિસ્ટમ છે. બંને દેશોએ વિવિધ પ્રકારની ક્ષમતાઓ પ્રાપ્ત કરવાનો પ્રયાસ કર્યો છે. તેથી સ્પષ્ટપણે તેમાં જોખમ રહેલું છે. આપણી પાસે જે પણ ક્ષમતા છે, તેનો ઉપયોગ યુદ્ધના મેદાનમાં થયો નથી."