મહાકુંભમાં આસ્થાની ડૂબકી લગાવા રાહુલ ગાંધી અને પ્રિયંકા ક્યારે જશે? જાણો વિગતે

કોંગ્રેસ નેતાઓ 16 ફેબ્રુઆરીએ જઈ શકે છે પ્રયાગરાજ: સૂત્રો દ્વારા સંભવિત તારીખની માહિતી.

મહાકુંભમાં આસ્થાની ડૂબકી લગાવા રાહુલ ગાંધી અને પ્રિયંકા ક્યારે જશે?

Source : PTI

Rahul Gandhi Maha Kumbh visit: લોકસભામાં વિપક્ષના નેતા રાહુલ ગાંધી અને તેમના બહેન અને સાંસદ પ્રિયંકા ગાંધી ટૂંક સમયમાં પ્રયાગરાજમાં ચાલી રહેલા મહાકુંભની મુલાકાત લઈ શકે છે. સૂત્રોના જણાવ્યા અનુસાર, કોંગ્રેસના આ બંને ટોચના નેતાઓ મહાકુંભમાં પવિત્ર સંગમમાં ડૂબકી લગાવવા માટે પ્રયાગરાજ જઈ શકે છે. ઉત્તર પ્રદેશ કોંગ્રેસ સમિતિ દ્વારા આ મુલાકાતની તૈયારીઓ પણ શરૂ કરી દેવામાં આવી છે.

જો કે, રાહુલ ગાંધી અને પ્રિયંકા ગાંધીના પ્રયાગરાજ પ્રવાસની તારીખ હજુ સુધી નક્કી થઈ નથી, પરંતુ ટૂંક સમયમાં આ અંગે નિર્ણય લેવામાં આવી શકે છે. સૂત્રો પાસેથી મળતી માહિતી મુજબ, રાહુલ ગાંધી અગાઉ 4 ફેબ્રુઆરીએ મહાકુંભમાં જવાના હતા, પરંતુ સંસદ સત્ર ચાલુ હોવાના કારણે તેમની આ મુલાકાત રદ્દ કરવામાં આવી હતી.

હવે સંસદ સત્રનો પ્રથમ તબક્કો પૂર્ણ થઈ ગયો છે, ત્યારે કોંગ્રેસના બંને નેતાઓ ટૂંક સમયમાં મહાકુંભની મુલાકાત લે તેવી શક્યતા છે. સૂત્રોનું કહેવું છે કે રાહુલ ગાંધી પોતે જ પ્રયાગરાજ મુલાકાતની તારીખ નક્કી કરશે. જો કે, કેટલાક અહેવાલો સૂચવે છે કે સંભવતઃ 16 ફેબ્રુઆરીના રોજ રાહુલ અને પ્રિયંકા ગાંધી મહાકુંભમાં પવિત્ર સ્નાન માટે જઈ શકે છે.

મહત્વપૂર્ણ છે કે, હાલમાં વિશ્વભરમાંથી લાખો શ્રદ્ધાળુઓ મહાકુંભમાં પવિત્ર સ્નાન કરવા માટે પ્રયાગરાજ પહોંચી રહ્યા છે. મહાકુંભ આગામી 26 માર્ચ સુધી ચાલવાનો છે, ત્યારે રાહુલ ગાંધી અને પ્રિયંકા ગાંધીની સંભવિત મુલાકાત રાજકીય વર્તુળોમાં પણ ચર્ચાનો વિષય બની છે. શુક્રવારે મહાકુંભમાં ભક્તોની ભારે ભીડ જોવા મળી હતી અને બપોર સુધીમાં 53.95 લાખ લોકોએ સંગમમાં સ્નાન કર્યું હતું.

નોંધનીય છે કે, છત્તીસગઢના રાજ્યપાલ રામેન ડેકા, મુખ્યમંત્રી વિષ્ણુ દેવ સાઈ, તેમના કેબિનેટ સાથીદારો, ધારાસભ્યો અને સાંસદોએ ગુરુવારે પ્રયાગરાજના મહાકુંભમાં પવિત્ર સંગમમાં ડૂબકી લગાવીને ધન્યતા અનુભવી. અધિકારીઓએ ગુરુવારે આ માહિતી આપતા જણાવ્યું કે રાજ્યના ટોચના નેતાઓ અને જનપ્રતિનિધિઓએ મહાકુંભમાં શ્રદ્ધા અને ભક્તિભાવ સાથે ભાગ લીધો હતો.

અધિકારીઓના જણાવ્યા અનુસાર, રાજ્યપાલ, મુખ્યમંત્રી, વિધાનસભા અધ્યક્ષ રમણ સિંહ અને છત્તીસગઢના અન્ય વરિષ્ઠ જનપ્રતિનિધિઓ ગુરુવારે સવારે રાયપુરથી વિમાન દ્વારા ઉત્તર પ્રદેશના પ્રયાગરાજ પહોંચ્યા હતા. પ્રયાગરાજ પહોંચ્યા બાદ તેઓ સીધા આરેલ ઘાટ ગયા હતા. જ્યાંથી તેઓ મોટર બોટમાં બેસીને પવિત્ર ત્રિવેણી સંગમ પહોંચ્યા હતા. ત્રિવેણી સંગમ ખાતે રાજ્યપાલ, મુખ્યમંત્રી અને અન્ય પ્રતિનિધિઓએ શાસ્ત્રોક્ત વિધિ વિધાન સાથે પૂજા અર્ચના કરી અને સંગમમાં પવિત્ર સ્નાન કર્યું હતું.

આ પણ વાંચો....