આધાર કાર્ડમાં આ ફેરફાર જીવનમાં 1 જ વાર થશે! જો ભૂલ કરી તો પસ્તાવાનો વારો આવશે

નામ, જન્મતારીખ અને લિંગ સુધારવા માટેની મર્યાદા અને સરનામા માટેના નિયમોની સંપૂર્ણ જાણકારી.

Aadhaar card update rules: શું તમે તમારા આધાર કાર્ડમાં સુધારો કરવા જઈ રહ્યા છો? તો થોભો અને UIDAI ના આ કડક નિયમો જાણી લો. આધાર કાર્ડમાં નામ, જન્મતારીખ અને લિંગ જેવી વિગતો બદલવા માટે ચોક્કસ મર્યાદા (Limit) નક્કી કરવામાં આવી છે. અમુક ફેરફારો જીવનમાં માત્ર 1 જ વાર શક્ય છે. જો તમે આ મર્યાદા પૂરી કરી દીધી, તો ભવિષ્યમાં તમારે મોટી મુશ્કેલીનો સામનો કરવો પડી શકે છે.

વર્તમાન સમયમાં બેંક એકાઉન્ટ ખોલાવવાથી લઈને સરકારી યોજનાઓનો લાભ લેવા સુધી, દરેક જગ્યાએ આધાર કાર્ડ એક અનિવાર્ય દસ્તાવેજ બની ગયું છે. ઘણીવાર ઉતાવળમાં કે ટાઈપિંગની ભૂલને કારણે આધાર કાર્ડમાં ખોટી માહિતી છપાઈ જાય છે. UIDAI નાગરિકોને ડેટા અપડેટ કરવાની સુવિધા આપે છે, પરંતુ ઘણા લોકો એ નથી જાણતા કે આ સુવિધા અમર્યાદિત નથી. વારંવાર માહિતી બદલવી તમને ભારે પડી શકે છે, કારણ કે UIDAI એ સુરક્ષાના કારણોસર અપડેટ કરવા માટે ચોક્કસ લિમિટ નક્કી કરી છે.

સૌ પ્રથમ નામમાં ફેરફારની વાત કરીએ તો, ઘણીવાર સ્પેલિંગ મિસ્ટેકને કારણે અથવા લગ્ન બાદ મહિલાઓને અટક (Surname) બદલવાની જરૂર પડે છે. UIDAI ના નિયમો અનુસાર, કોઈપણ આધાર ધારક પોતાના આખા જીવનકાળ દરમિયાન મહત્તમ 2 વાર જ નામમાં સુધારો કરાવી શકે છે. તેથી, જ્યારે પણ તમે નામમાં ફેરફાર કરાવો, ત્યારે સ્પેલિંગ અને સરનેમ બરાબર છે કે નહીં તેની ખાસ ચકાસણી કરી લેવી જોઈએ.

સૌથી વધુ સાવચેતી જન્મ તારીખ (Date of Birth) માં સુધારો કરતી વખતે રાખવી પડે છે. આ વિગત માટે નિયમો અત્યંત કડક છે. જો તમારા આધાર કાર્ડમાં જન્મ તારીખ ખોટી હોય, તો તેને સુધારવાની તક જીવનમાં ફક્ત 1 જ વાર મળે છે. એકવાર જન્મ તારીખ અપડેટ થઈ ગયા બાદ તેમાં ફરી ફેરફાર કરવો લગભગ અશક્ય બની જાય છે, સિવાય કે કોઈ અપવાદરૂપ કિસ્સો હોય.

જન્મ તારીખની જેમ જ લિંગ (Gender) એટલે કે સ્ત્રી/પુરુષ/અન્ય જેવી વિગતોમાં પણ સમાન નિયમ લાગુ પડે છે. જો જેન્ડર સિલેક્ટ કરવામાં ભૂલ થઈ હોય, તો તેને પણ જીવનમાં માત્ર 1 જ વાર સુધારી શકાય છે. આથી આ વિગતો ભરતી વખતે એકદમ ચોકસાઈ રાખવી જરૂરી છે, નહીંતર ભવિષ્યમાં મોટી મુશ્કેલી થઈ શકે છે.

જોકે, રહેઠાણ અને સંપર્કમાં આવતા ફેરફારોને ધ્યાનમાં રાખીને UIDAI એ સરનામા (Address) માટે કોઈ નિશ્ચિત મર્યાદા રાખી નથી. નોકરી કે વ્યવસાયને કારણે લોકો વારંવાર શહેર કે ઘર બદલે છે, તેથી તમે જરૂરિયાત મુજબ ગમે તેટલી વાર સરનામું અપડેટ કરાવી શકો છો. આ માટે તમારે ફક્ત માન્ય રહેઠાણનો પુરાવો આપવો પડે છે.

તેવી જ રીતે મોબાઈલ નંબર બદલવા પર પણ કોઈ પ્રતિબંધ નથી. OTP અને અન્ય એલર્ટ્સ માટે મોબાઈલ નંબર લિંક હોવો ખૂબ જ મહત્વપૂર્ણ છે. તમે જેટલી વાર તમારો નંબર બદલો, તેટલી વાર આધારમાં તેને અપડેટ કરાવી શકો છો. આ પ્રક્રિયા માટે કોઈ દસ્તાવેજની પણ જરૂર પડતી નથી, માત્ર આધાર સેન્ટર પર જઈને બાયોમેટ્રિક આપવું પડે છે.

અંતમાં, આધાર કાર્ડમાં સુધારો કરાવતી વખતે હંમેશા માન્ય દસ્તાવેજો (Valid Documents) સાથે રાખવા જોઈએ અને ફોર્મ સબમિટ કરતા પહેલા તમામ વિગતો બે વાર ચેક કરી લેવી હિતાવહ છે. જો તમે લિમિટ પૂરી કરી દીધી હશે, તો તમારે સુધારા માટે સીધા UIDAI ની રિજનલ ઓફિસનો સંપર્ક કરવો પડી શકે છે, જે એક લાંબી પ્રક્રિયા છે.