રાહુલ ગાંધી થયા 'ઘર બાર' વિહોણા, હવે મોદી સરકારે આપ્યો વધુ એક આંચકો

કોંગ્રેસના દિગ્ગજ નેતા રાહુલ ગાંધીની સાડા સાતી ચાલી રહી હોય તેમ લાગી રહ્યું છે. રાહુલની મુશ્કેલીઓ ઓછી થવાના બદલે એક પછી એક એમ ઉત્તરોત્તર વધી રહી છે.

રાહુલ ગાંધી

Rahul Gandhi Notice Bungalow: કોંગ્રેસના દિગ્ગજ નેતા રાહુલ ગાંધીની સાડા સાતી ચાલી રહી હોય તેમ લાગી રહ્યું છે. રાહુલની મુશ્કેલીઓ ઓછી થવાના બદલે એક પછી એક એમ ઉત્તરોત્તર વધી રહી છે. પહેલા સુરતની કોર્ટે 2 વર્ષની સજા ફટકારી, ત્યાર બાદ તેમનું સાંસદ પદ ગયું ને હવે તેમને સરકારી બંગલો ખાલી કરવો પડશે. આ મામલે રાહુલ ગાંધીને નોટિસ પણ ફટકારવામાં આવી છે.

કોંગ્રેસ નેતા રાહુલ ગાંધીને સરકારી બંગલો છોડવાની નોટિસ આપવામાં આવી હતી. સંસદની સદસ્યતા પાછી ખેંચી લીધા બાદ લોકસભાની ગૃહ સમિતિ દ્વારા આ નોટિસ જારી કરવામાં આવી છે. રાહુલ ગાંધી હાલ 12 તુગલક લેનમાં સરકારી બંગલામાં રહે છે. રાહુલ ગાંધીએ 22 એપ્રિલ સુધીમાં તેમનું સત્તાવાર નિવાસસ્થાન ખાલી કરવું પડશે. નોટિસ અનુસાર અયોગ્ય જાહેર થયાના એક મહિનાની અંદર રાહુલ ગાંધીએ તેમનું સત્તાવાર નિવાસસ્થાન ખાલી કરવું પડશે.

સુરતની એક અદાલતે ગુરુવારે કોંગ્રેસના નેતા રાહુલ ગાંધીને 'મોદી અટક' સંબંધિત તેમની ટિપ્પણી બદલ તેમની સામે 2019માં નોંધાયેલા ફોજદારી માનહાનિના કેસમાં દોષિત ઠેરવ્યા હતાં અને તેમને બે વર્ષની જેલની સજા ફટકારી હતી. ત્યાર બાદ શુક્રવારે રાહુલ ગાંધીને લોકસભાના સભ્યપદેથી અયોગ્ય ઠેરવવામાં આવ્યા હતા.

સંસદ સભ્યપદ રદ કરવામાં આવ્યું

લોકસભા સચિવાલય દ્વારા જારી કરવામાં આવેલા નોટિફિકેશનમાં કહેવામાં આવ્યું હતું કે, તેમને સાંસદ તરીકે અયોગ્ય ઠેરવતો આદેશ 23 માર્ચથી લાગુ થશે. નોટિફિકેશનમાં કહેવામાં આવ્યું છે કે, તેમને (રાહુલ ગાંધી)ને બંધારણની કલમ 102(1) અને જનપ્રતિનિધિત્વ અધિનિયમ, 1951ની કલમ 8 હેઠળ ગેરલાયક ઠેરવવામાં આવ્યા છે.

રાહુલ ગાંધીએ શું કહ્યું?

લોકસભામાંથી ગેરલાયક ઠેરવવામાં આવ્યાના એક દિવસ બાદ કોંગ્રેસના પૂર્વ અધ્યક્ષ રાહુલ ગાંધીએ શનિવારે કહ્યું હતું કે, ભલે તેઓ સંસદના સભ્ય રહે કે ન રહે અથવા ભલે તેમને જેલમાં નાખવામાં આવે, તેઓ લોકશાહી માટે લડતા રહેશે. તેમણે એમ પણ કહ્યું હતું કે, તેઓ ડરતા નથી અને માફી માંગશે નહીં કારણ કે તેમનું નામ ગાંધી છે, સાવરકર નથી અને ગાંધી માફી માગતા નથી.

"અદાણી કેસથી પીએમ ડરી ગયા"

રાહુલ ગાંધીએ કહ્યું હતું કે, ભારતીય જનતા પાર્ટી અદાણી જૂથ સાથે જોડાયેલા પ્રશ્નો પરથી ધ્યાન હટાવવા માટે તેમના પર OBC સમુદાયનું અપમાન કરવાનો આરોપ લગાવી રહી છે. ખરો પ્રશ્ન એ છે કે, અદાણી જૂથમાં રૂ. 20,000 કરોડનું રોકાણ કરવામાં આવ્યું છે, તે કોના પૈસા છે? તેમણે દાવો કર્યો હતો કે, તેમને લોકસભામાંથી ગેરલાયક ઠેરવવામાં આવ્યા હતા કારણ કે વડાપ્રધાન નરેન્દ્ર મોદી ડરતા હતા કે તેઓ ગૃહમાં અદાણી કેસ પર તેમનું આગામી ભાષણ આપવાના છે.