પહેલગામ હુમલાના શહીદ લેફ્ટનન્ટ વિનય નરવાલનાની પત્ની હિમાંશીનું મોટું નિવેદન: 'મુસ્લિમો વિરુદ્ધ.....'
શહીદની યાદમાં કરનાલમાં રક્તદાન શિબિરનું આયોજન, પત્ની હિમાંશી અને માતા ભાવુક, 'અન્યાય કરનારને સજા થવી જોઈએ, પણ નફરત નહિ'.
Vinay Narwal wife Himanshi: જમ્મુ અને કાશ્મીરના પહલગામમાં તાજેતરમાં થયેલા આતંકવાદી હુમલામાં શહીદ થયેલા ભારતીય નૌકાદળના લેફ્ટનન્ટ વિનય નરવાલનો આજે (૧ મે, ૨૦૨૫) જન્મદિવસ છે. શહીદ વિનય નરવાલના જન્મદિવસ નિમિત્તે, હરિયાણાના કરનાલમાં તેમના પરિવાર દ્વારા એક રક્તદાન શિબિરનું આયોજન કરવામાં આવ્યું હતું, જેમાં અનેક લોકોએ ભાગ લીધો હતો. આ હૃદયસ્પર્શી અવસરે, વિનય નરવાલના પત્ની હિમાંશીએ એક મોટું અને અત્યંત ભાવુક નિવેદન આપ્યું છે.
હિમાંશીએ ઉપસ્થિતોને અને દેશવાસીઓને વિનય માટે પ્રાર્થના કરવા અપીલ કરી હતી કે, 'હું ઈચ્છું છું કે આખો દેશ તેમના માટે પ્રાર્થના કરે કે તેઓ જ્યાં પણ હોય, સ્વસ્થ અને ખુશ રહે.'
આ ગંભીર દુર્ઘટના બાદ દેશમાં ફેલાઈ રહેલા નફરતના માહોલ અંગે હિમાંશીએ અત્યંત સંવેદનશીલ વાત કહી. તેમણે જણાવ્યું, "જે થઈ રહ્યું છે તેના માટે હું કોઈના પ્રત્યે કોઈ નફરત ઇચ્છતી નથી." તેમણે ખાસ કરીને અપીલ કરી કે, "લોકો મુસ્લિમો કે કાશ્મીરીઓ વિરુદ્ધ નફરત ફેલાવી રહ્યા છે, અમને આ નથી જોઈતું. અમને શાંતિ જોઈએ છે."
જોકે, શાંતિની અપીલ સાથે તેમણે ન્યાયની માંગણી પણ કરી. તેમણે કહ્યું, "અલબત્ત અમે ન્યાય ઇચ્છીએ છીએ, જેમણે તેની સાથે અન્યાય કર્યો છે તેમને સજા થવી જોઈએ." તેમણે ઉમેર્યું કે આજે તેઓ બધા વિનયની યાદમાં રક્તદાન કરીને તેમને શ્રદ્ધાંજલિ આપી રહ્યા છે.
રક્તદાન શિબિર અને ભાવુક ક્ષણો
કરનાલમાં આયોજિત રક્તદાન શિબિર દરમિયાનનો માહોલ ખૂબ જ ભાવુક હતો. સ્ટેજ પર બેઠેલી હિમાંશી ઘણી વખત ભાવુક થઈ ગઈ હતી અને તેમની આંખોમાં આંસુ આવી ગયા હતા. પરિવારજનો પણ ઓમ શાંતિનો જાપ કરતા જોવા મળ્યા હતા. આ પ્રસંગે ધારાસભ્ય જગમોહન આનંદ અને કરનાલના મેયર રેણુ બાલા ગુપ્તા પણ ઉપસ્થિત રહ્યા હતા. કાર્યક્રમ દરમિયાન, હિમાંશીએ મેયરને પોતાના હાથ પરની મહેંદી પણ બતાવી હતી, જેમાં તેમના શહીદ પતિ વિનયનું નામ લખેલું હતું. કાર્યક્રમ સ્થળે "ભારતના પુત્ર, વિનય નરવાલ" લખેલું એક પોસ્ટર પણ લગાવવામાં આવ્યું હતું.
Karnal, Haryana: On the birthday of the late Indian Navy Lieutenant Vinay Narwal, who was killed in the Pahalgam terror attack, his wife Himanshi says, "I just want the entire nation to pray for him, that wherever he is, he remains healthy and happy..." pic.twitter.com/8MdugaqmOg
— IANS (@ians_india) May 1, 2025
ખાસ કરીને, હિમાંશી અને વિનયની માતા ઘણી વખત ભાવુક થતી જોવા મળી હતી. એક ક્ષણ તો એવી આવી જ્યારે તેઓ સ્ટેજ પરથી નીચે આવ્યા અને એકબીજાને ગળે લગાવીને રડી પડ્યા. આ દ્રશ્ય જોઈને ત્યાં હાજર લોકોની આંખો પણ ભીની થઈ ગઈ હતી.
શહીદ વિનય નરવાલની બહેન સૃષ્ટિનું નિવેદન
આ શોકપૂર્ણ અવસરે, શહીદ વિનય નરવાલની બહેન સૃષ્ટિએ પણ પ્રતિક્રિયા આપી. તેમણે રક્તદાન માટે આવેલા તમામ લોકોનો આભાર વ્યક્ત કર્યો અને કહ્યું કે તેઓ બધા લોકોને રક્તદાન માટે આવવા અપીલ કરે છે. તેમણે કહ્યું કે લોકો દૂર-દૂરથી આવ્યા છે અને આ હેતુ માટે તેમનામાં જુસ્સો અને ઉત્સાહ જોઈ શકાય છે. વિનયને શહીદનો દરજ્જો આપવા અંગે સૃષ્ટિએ કહ્યું કે, "મારા પિતાએ સરકારને આ અંગે વાત કરી છે અને સરકાર તેના પર કામ કરી રહી છે. લોકોની ભાગીદારી વિનયની વિચારધારાને આગળ વધારવામાં મદદ કરશે."
લગ્નના થોડા દિવસો બાદ પત્ની સામે જ હત્યા
ઉલ્લેખનીય છે કે, લેફ્ટનન્ટ વિનય નરવાલ અને હિમાંશીના લગ્ન ૧૬ એપ્રિલ, ૨૦૨૫ના રોજ થયા હતા અને તેઓ હનીમૂન માટે જમ્મુ અને કાશ્મીરના પહલગામ ગયા હતા. ૨૨ એપ્રિલે પહલગામની બૈસરન ખીણમાં આતંકવાદીઓએ તેમને નિશાન બનાવ્યા હતા. આતંકવાદીઓએ વિનયનો ધર્મ પૂછ્યા બાદ તેમની પત્ની હિમાંશીની સામે જ તેમની નિર્દયતાપૂર્વક હત્યા કરી દીધી હતી. આ ભયાનક આતંકી હુમલામાં કુલ ૨૬ લોકોના મોત થયા હતા અને ૧૭ લોકો ઘાયલ થયા હતા.
શહીદની પત્ની હિમાંશીનું આ નિવેદન, જેણે પોતાના પતિને પોતાની આંખો સામે ગુમાવ્યો છે, તે દર્શાવે છે કે દુઃખની આ પરાકાષ્ઠામાં પણ તેઓ નફરતને બદલે શાંતિ અને માનવતાનો સંદેશ આપી રહ્યા છે. તેમની ન્યાયની માંગણી યોગ્ય છે, પરંતુ તેમની નફરત ન ફેલાવવાની અપીલ વર્તમાન તણાવપૂર્ણ માહોલમાં ખૂબ જ મહત્વપૂર્ણ અને પ્રેરણાદાયી છે.
ટોપ સ્ટોરી
ટ્રેન્ડિંગ સમાચાર
