અમરેલીમાં ખરાખરીનો ખેલ: એક જ રસોડું, પણ રણમેદાન જુદા! અમરેલીમાં ભાજપના જેઠાણી સામે કોંગ્રેસના દેરાણીનો જંગ

ભાજપે જેઠાણી રેણુકાબેન અને કોંગ્રેસે દેરાણી કાજલબેનને મેદાનમાં ઉતાર્યા; રાજકીય લડાઈ છતાં પરિવારમાં કોઈ મનદુઃખ ન હોવાનો દાવો.

Amreli Ward 9 Election 2026: The Exciting Derani vs Jethani Face-off

Source : abp asmita

Show Quick Read

Key points generated by AI, verified by newsroom

• અમરેલી નગરપાલિકા ચૂંટણીમાં વોર્ડ ૯ માં દેરાણી-જેઠાણી વચ્ચે ટક્કર.
• ભાજપે જેઠાણી રેણુકાબેન, કોંગ્રેસે દેરાણી કાજલબેનને ટિકિટ આપી.
• ચૂંટણી રાજકીય હોવા છતાં પરિવારમાં કોઈ મનદુઃખ નથી.

Amreli Local Body Election 2026: અમરેલી નગરપાલિકાની ચૂંટણીનો માહોલ અત્યારે બરાબરનો ગરમાયો છે. આ વખતે સૌથી રસપ્રદ અને અનોખો મુકાબલો વોર્ડ નંબર 9 માં જોવા મળી રહ્યો છે, જ્યાં રાજકીય જંગ હવે સીધો ઘરની અંદર પહોંચી ગયો છે! અહીં ભાજપ અને કોંગ્રેસે એક જ પરિવારની બે મહિલાઓને ટિકિટ આપતા, હવે મેદાનમાં દેરાણી અને જેઠાણી વચ્ચે સીધી અને કાંટાની ટક્કર થવા જઈ રહી છે. એક જ ઘરની બે વહુઓ સામસામે આવી જતા આ બેઠક સમગ્ર અમરેલી શહેરમાં ભારે ચર્ચાનો વિષય બની ગઈ છે.

પરિવારની બે વહુઓ સામસામે

અમરેલી નગરપાલિકાના વોર્ડ નંબર 9 માં ભાજપ અને કોંગ્રેસ વચ્ચેનો આ મુકાબલો ખરેખર જોવા જેવો બની ગયો છે. ભારતીય જનતા પાર્ટી (BJP) તરફથી જેઠાણી રેણુકાબેન સોલંકીને ઉમેદવાર બનાવવામાં આવ્યા છે, જ્યારે તેમની જ સામે કોંગ્રેસે દેરાણી કાજલબેન સોલંકી પર પોતાનો વિશ્વાસ મૂકીને તેમને ટિકિટ આપી છે. આ બંને મહિલા ઉમેદવારોએ ગઈકાલે જ પોતપોતાના પક્ષ તરફથી વિધિવત રીતે ઉમેદવારી પત્રો ભરીને ચૂંટણીના રણમાં ઝંપલાવ્યું છે.

રાજકીય લડાઈ, પણ મનદુઃખ નહીં!

એક જ પરિવારની દેરાણી અને જેઠાણી વચ્ચેનો આ મુકાબલો ભલે રાજકીય હોય, પણ લોકોમાં તેની વ્યક્તિગત સ્તરે પણ ખૂબ ચર્ચા થઈ રહી છે. સ્થાનિક મતદારો પણ આ 'ફેમિલી ફાઇટ' ને લઈને ખાસ્સા ઉત્સાહિત છે. આ અંગે વાત કરતા કોંગ્રેસના ઉમેદવાર અને દેરાણી કાજલબેન સોલંકીએ ભારે આશાવાદ વ્યક્ત કર્યો છે. તેમણે કહ્યું કે તેમને જનતાના પૂરા આશીર્વાદ મળશે અને તેઓ આવનારા દિવસોમાં પોતાના વિસ્તારમાં ખૂબ સારા કામો કરશે. સૌથી સારી અને નોંધનીય વાત એ છે કે, ભલે બંને મહિલાઓ ચૂંટણી મેદાનમાં એકબીજાની હરીફ હોય, પરંતુ પરિવારમાં આ ચૂંટણીને લઈને કોઈ જ મનદુઃખ નથી અને ભવિષ્યમાં પણ આવું કોઈ મનદુઃખ રહેશે નહીં તેવો સ્પષ્ટ દાવો કરવામાં આવ્યો છે.

કોણ પહેરશે જીતનો તાજ?

હવે એ જોવું ખરેખર રસપ્રદ રહેશે કે વોર્ડ નંબર 9 ના મતદારો આ દેરાણી-જેઠાણીમાંથી કોના પર પોતાનો કળશ ઢોળે છે! રાજકારણ અને પરિવારના આ અનોખા જંગમાં જીતનો તાજ કોના શિરે બંધાય છે, તેનો ફેંસલો તો હવે આવનારો સમય જ બતાવશે.

આ પણ વાંચો

સ્થાનિક ચૂંટણીઓ વચ્ચે મનસુખ વસાવાનો મોટો ધડાકો: લોકસભા ચૂંટણી ન લડવાની કરી જાહેરાત!