Gujarat Rain: દક્ષિણ ગુજરાતમાં ફરી મેઘરાજાની ધમાકેદાર બેટિંગ, વલસાડ-વાપી-પારડીમાં ધોધમાર વરસાદ
ગુજરાતમાં આજે વહેલી સવારથી જ વરસાદી માહોલ જામ્યો છે. લાંબા વિરામ બાદ રાજ્યના અનેક જિલ્લાઓમાં વરસાદ વરસી રહ્યો છે.
- લાંબા વિરામ બાદ ગુજરાતમાં વરસાદી માહોલ ફરી જામ્યો.
- વલસાડ, તાપી, સુરત, નવસારી સહિત દક્ષિણ ગુજરાતમાં વરસાદ.
- વરસાદથી ખેડૂતોમાં ઉત્સાહ, ડાંગર પાકને મોટો લાભ થશે.
Gujarat Rain: ગુજરાતમાં આજે વહેલી સવારથી જ વરસાદી માહોલ જામ્યો છે. લાંબા વિરામ બાદ રાજ્યના અનેક જિલ્લાઓમાં વરસાદ વરસી રહ્યો છે. દક્ષિણ ગુજરાતમાં એક અઠવાડિયાના વિરામ બાદ ફરી વરસાદી માહોલ જામ્યો છે. વલસાડ જિલ્લાના પારડીમાં ધોધમાર વરસાદ વરસ્યો હતો, જ્યારે વલસાડ, વાપી, તાપી, સુરત અને નવસારી જિલ્લામાં પણ વરસાદી ઝાપટાં નોંધાયા હતા. વરસાદના આગમનથી વાતાવરણમાં ઠંડક પ્રસરી ગઈ છે અને લાંબા સમયથી વરસાદની રાહ જોઈ રહેલા ખેડૂતોમાં નવી આશા જાગી છે. ખાસ કરીને ડાંગરના પાક માટે આ વરસાદ અત્યંત લાભદાયી માનવામાં આવી રહ્યો છે.
પારડીમાં ધોધમાર વરસાદ, વલસાડ જિલ્લામાં વરસાદી માહોલ
વલસાડ જિલ્લાના પારડીમાં બપોર બાદ ધોધમાર વરસાદ વરસતા રસ્તાઓ પર પાણી ફરી વળ્યા હતા. જિલ્લાના અન્ય વિસ્તારોમાં પણ વરસાદી ઝાપટાં પડતાં વાતાવરણ ખુશનુમા બન્યું હતું. ગરમી અને ઉકળાટથી પરેશાન લોકોને વરસાદથી રાહત મળી હતી. વાપી પંથકમાં વહેલી સવારથી જ વાદળછાયું વાતાવરણ જોવા મળ્યું હતું. બપોરે પડેલા વરસાદી ઝાપટાં બાદ સમગ્ર વિસ્તારમાં ઠંડક પ્રસરી ગઈ હતી. એક અઠવાડિયાના વિરામ બાદ વરસાદ શરૂ થતાં ખેડૂતોમાં ઉત્સાહનો માહોલ જોવા મળ્યો હતો.
ડાંગરના પાક માટે વરસાદ બન્યો આશીર્વાદ
ખેડૂતોના જણાવ્યા મુજબ હાલનો વરસાદ ડાંગરના પાક માટે કાચા સોના સમાન સાબિત થશે. વરસાદને કારણે ખેતરોમાં પૂરતો ભેજ મળતાં પાકના વિકાસને વેગ મળશે અને આગામી દિવસોમાં ઉત્પાદન સારું રહેવાની આશા વ્યક્ત કરવામાં આવી રહી છે.
તાપી જિલ્લાના વાલોડમાં પણ મેઘમહેર
તાપી જિલ્લાના વાલોડ સહિતના વિસ્તારોમાં પણ વરસાદી માહોલ જામ્યો હતો. વરસાદને કારણે ખેડૂતો અને ગ્રામજનોમાં ખુશીનો માહોલ જોવા મળ્યો હતો. વરસાદથી ચોમાસાની ખેતીને નવી તાકાત મળશે તેવી આશા વ્યક્ત કરવામાં આવી રહી છે.
આ પણ વાંચો- Rajkot Rain: રાજકોટમાં 8 દિવસના લાંબા વિરામ બાદ મેઘમહેર, શહેર અને ગ્રામ્ય વિસ્તારમાં વરસાદ
સુરત અને નવસારી જિલ્લામાં પણ વરસાદની શરૂઆત
વલસાડ અને તાપી ઉપરાંત સુરત અને નવસારી જિલ્લામાં પણ વરસાદ શરૂ થતાં સમગ્ર દક્ષિણ ગુજરાતમાં ચોમાસાએ ફરી જોર પકડ્યું છે. હવામાનમાં આવેલા બદલાવથી લોકોને ગરમીમાંથી રાહત મળી છે, જ્યારે ખેડૂતો હવે આગામી દિવસોમાં વધુ સારા વરસાદની રાહ જોઈ રહ્યા છે.
Before You Go
Hun To Bolish : હું તો બોલીશ : ખેલૈયા બેહાલ, આયોજકો માલામાલ
ટોપ સ્ટોરી
ટ્રેન્ડિંગ સમાચાર
