સુરતમાં દિવાળી પહેલાં નકલી ઘીનું મહાકૌભાંડ: SOG એ ત્રણ ફેક્ટરીમાંથી 10,000 કિલોથી વધુનો જથ્થો જપ્ત કર્યો, 4ની ધરપકડ

પકડાયેલી ફેક્ટરીઓમાં શ્રી માધવ ડેરી પ્રોડક્ટ, ન્યુ આદીનાથ ડેરી પ્રોડક્ટ અને ઇવા ઇમ્બ્રો પાર્ક ખાતે આવેલી ફેક્ટરીઓનો સમાવેશ થાય છે.

સુરત નકલી ઘી કૌભાંડ

Source : abp asmita

Surat fake ghee scam: દિવાળીના તહેવારની શરૂઆત પહેલાં જ સુરતની સ્પેશિયલ ઓપરેશન ગ્રુપ (SOG) ટીમે મોટી કાર્યવાહી કરીને નકલી ઘી બનાવતી ત્રણ ફેક્ટરીઓ અને તેના ગોડાઉનોનો પર્દાફાશ કર્યો છે. અમરોલી અને કોસાડ વિસ્તારમાં થયેલા આ દરોડામાં પોલીસે 9,919 કિલોગ્રામ ભેળસેળયુક્ત ઘી સહિત કુલ ₹1,20,56,500 ની કિંમતનો મુદ્દામાલ જપ્ત કર્યો છે અને આ ગેરકાયદેસર પ્રવૃત્તિમાં સંડોવાયેલા ચાર આરોપીઓને ઝડપી પાડ્યા છે. પોલીસની પ્રાથમિક તપાસમાં બહાર આવ્યું છે કે, આ ઘી બનાવવા માટે પામોલીન તેલ, કોરમ અને SS જેવા જોખમી કેમિકલ અને કલરનો ઉપયોગ થતો હતો, જે ખાનારાઓને કેન્સર થવા સુધીની ગંભીર બીમારીઓનું જોખમ ઊભું કરી શકે છે. છેલ્લા 2 વર્ષથી ચાલી રહેલું આ નેટવર્ક માત્ર ગુજરાતમાં જ નહીં, પણ મહારાષ્ટ્ર સુધી વેચાણ કરતું હતું, અને તહેવારોની માંગને પહોંચી વળવા 24 કલાક ઉત્પાદન કરતું હતું.

નકલી ઘીના ઉત્પાદન અને વેચાણનું સુનિયોજિત નેટવર્ક

સુરતમાં ઝડપાયેલું આ નકલી ઘી કૌભાંડ ખૂબ જ મોટા પાયે અને સુનિયોજિત રીતે ચલાવવામાં આવી રહ્યું હતું. પકડાયેલી ફેક્ટરીઓમાં શ્રી માધવ ડેરી પ્રોડક્ટ, ન્યુ આદીનાથ ડેરી પ્રોડક્ટ અને ઇવા ઇમ્બ્રો પાર્ક ખાતે આવેલી ફેક્ટરીઓનો સમાવેશ થાય છે. આ ફેક્ટરીઓમાં અદ્યતન ઓટોમેટિક મશીનો મૂકવામાં આવ્યા હતા, જે માત્ર એકવાર ઓપરેટ કર્યા બાદ સીધું પેકેજ્ડ ઘી જ બહાર પાડતા હતા.

ભેળસેળ અને સ્વાસ્થ્યનું જોખમ: SOG ના પીઆઇ અતુલ સોનારાએ વિગતો આપતા જણાવ્યું કે આ નકલી ઘીમાં દૂધનું કોઈ મૂળ તત્વ નહોતું. આરોપીઓ મુખ્યત્વે વનસ્પતિજન્ય તેલો (જેમ કે પામોલીન તેલ અને સોયાબીન તેલ), કોરમ નામના કેમિકલનું મિશ્રણ કરીને બનાવતા હતા. ઘીને અસલી જેવી સુગંધ આપવા માટે ખાસ કેમિકલ અને ઓરિજિનલ દેશી ઘી જેવો પીળો રંગ આપવા માટે કલરનો ઉપયોગ થતો હતો. સૌથી ચોંકાવનારી વાત એ છે કે, દાણાદારતા (જે શુદ્ધ ઘીની ઓળખ છે) લાવવા માટે SS નામનું જોખમી કેમિકલ વપરાતું હતું. પીઆઇ સોનારાએ સ્પષ્ટ કર્યું છે કે આ કેમિકલયુક્ત ઘી ખાવાથી કેન્સર થવાની સંભાવનાઓ છે, અને આ અંગે ડોકટરોના અભિપ્રાય લેવાની કાર્યવાહી શરૂ કરવામાં આવી છે.

ઓછી કિંમતે મોટો નફો અને વ્યાપક વેચાણ નેટવર્ક

આ કૌભાંડ પાછળનું મુખ્ય કારણ આર્થિક ગેરલાભ હતો. આરોપીઓને એક કિલોગ્રામ નકલી ઘી બનાવવાનો ખર્ચ ₹100 થી પણ ઓછો થતો હતો, જ્યારે તેઓ તેને માર્કેટમાં ગ્રાહકોને ₹680 પ્રતિ કિલોના ભાવે વેચતા હતા. વધુમાં, તેઓ ઘીના ડબ્બા પર ₹800 થી ₹1000 સુધીની MRP છાપીને ગ્રાહકોને ડિસ્કાઉન્ટમાં શુદ્ધ ઘી મળતું હોવાનો ભ્રમ પેદા કરતા હતા.

વેચાણની પદ્ધતિ: આ ભેળસેળયુક્ત ઘી રીધમ, મૌલી પ્રીમિયમ દેશી ઘી, શ્રી મૌલી પ્રિમિયમ શુદ્ધ દેશી ઘી અને શાશ્વત પ્રીમિયમ ઘી જેવા બ્રાન્ડના નામે 100 ગ્રામના પાઉચથી લઈને 15 કિલો સુધીના મોટા ટીનમાં વેચાતું હતું. આ નેટવર્ક માત્ર દક્ષિણ ગુજરાત સુધી સીમિત નહોતું, પરંતુ મહારાષ્ટ્રના નંદુરબાર સુધી ફેલાયેલું હતું. તેમના મુખ્ય ગ્રાહકોમાં સુરતના સ્ટ્રીટ ફૂડ વિક્રેતાઓ, કેટરિંગ સર્વિસ, નાની હોટેલો અને ખાણીપીણીની લારીઓ ચલાવતા લોકો હતા. આ વેચાણ નેટવર્કમાં ગ્રાહકોનો વિશ્વાસ જીતવા માટે સેલ્સમેન પણ રાખવામાં આવ્યા હતા, જેઓ કંપનીના નામવાળા ટી-શર્ટ પણ પહેરતા હતા. ઝડપાયેલા આરોપીઓ (જયેશકુમાર મહેસુરીયા, અંકિતભાઈ પંચીવાલા, સુમીતકુમાર મૈસુરીયા, અને દિનેશકુમાર ગેહલોત) મૂળ બનાસકાંઠાના ડીસાના છે, અને આમાંથી એક આરોપીના ભાઈ વિરુદ્ધ પણ બનાસકાંઠામાં નકલી ઘીનો કેસ નોંધાયેલો હોવાથી, આ કૌભાંડની ચેનલ વધુ લાંબી હોવાની સંભાવના છે. SOG દ્વારા આ સમગ્ર મામલે બારીકાઈથી તપાસ ચલાવવામાં આવી રહી છે.